तब्बल 74 दिवस पाण्याखाली राहण्याचा विक्रम
वॉशिंग्टन : अमेरिकेतील एका संशोधकाने पाण्याखाली 74 दिवस राहण्याचा विश्वविक्रम केला आहे. या माणसाचे नाव आहे डॉ. जोसेफ डिटुरी. अर्थात, आपला प्रयोग अद्याप पूर्ण न झाल्याने या माणसाने पाण्याखालील आपले वास्तव्य सुरूच ठेवलेले आहे. फ्लोरिडाच्या की लार्गो येथे समुद्राच्या तळाशी तो हा शंभर दिवसांचा प्रयोग करीत आहे.
डिटुरी हे सोशल मीडियात आपल्या पाण्याखालील साहसाचे अनेक व्हिडीओही शेअर करीत असतात. आता हा विश्वविक्रम केल्यानंतर त्यांनी पाण्याखाली राहण्याचा आपला अनुभव व पुढील योजना सांगितल्या आहेत. पाण्याच्या पृष्ठभागाखाली ते कसे राहत आहेत, याची माहिती या क्लिपमधून मिळते.
73 व्या दिवशी त्यांनी आपण पाण्याखाली राहण्याचा जुना विक्रम आज मोडत आहोत, असे म्हटले होते. हा प्रयोग केवळ विक्रमासाठी नसून पाण्याखालचे जीवन कसे असते हे पाहण्यासाठी तसेच मनुष्याचे शरीर अशा स्थितीत कसे कार्य करते हे तपासण्यासाठीही आहे, असे त्याने म्हटले आहे. एकूण शंभर दिवस पाण्याखाली राहण्याचा हा प्रयोग आहे. ते की लार्गो येथील तीस फूट खोल लगूनच्या तळाशी राहत आहेत.
1 मार्चला ते पाण्याखाली राहण्यासाठी गेले होते. ते अंडी व सामन माशांचा उच्च प्रोटीनयुक्त आहार घेतात. एका मायक्रोवेव्हच्या सहाय्याने ते आपले अन्न शिजवतात. रेझिस्टंट बँडस्च्या सहाय्याने ते व्यायामही करतात. यापूर्वी टेनेसीमधील ब्रुस कँट्रेल व जेसिका फेन या दोन प्राध्यापकांनी पाण्याखाली 73 दिवस, 2 तास आणि 34 मिनिटे राहण्याचा विक्रम केला होता.
