तणाव आणि चिंता ही एक अशी परिस्थिती आहे, जी नकारात्मक परिस्थितीमुळे उद्भवते. मात्र, तुम्ही वारंवार तणावात राहिल्यास त्याकडे गांभीर्याने लक्ष देणे आवश्यक आहे. अति तणावाचा मानसिक आरोग्यावरच नव्हे, तर शारीरिक आरोग्यावरही नकारात्मक परिणाम होतो. अतिप्रमाणात मानसिक तणाव हे सामान्यतः नैराश्यासारख्या समस्यांचे कारण मानले जाते; परंतु तुम्हाला माहीत आहे का? की यामुळे हृदयविकार, रोगप्रतिकारकशक्ती समस्या, पचनाचे विकारदेखील होऊ शकतात. तणावामुळे निर्माण होणार्या समस्यांची ही माहिती...
आरोग्यतज्ज्ञ सांगतात, जेव्हा तुम्हाला तणाव जाणवतो तेव्हा शरीर काही विशिष्ट हार्मोन्स सोडते. हार्मोन्स हे रासायनिक सिग्नल आहेत, जे तुमचे शरीर संपूर्ण शरीर प्रणालींना कोणत्या वेळी काय करावे हे सांगण्यासाठी वापरतात. तणावाच्या प्रतिसादादरम्यान, तुमचे शरीर हृदय गती, श्वासोच्छ्वासाची गती आणि रक्तदाब वाढवून समस्येचा सामना करण्याचा प्रयत्न करते.
तणावाच्या काळात, तुमचे यकृत शरीराला ऊर्जा देण्यासाठी अतिरिक्त रक्तातील साखर (ग्लुकोज) तयार करू लागते. जर तुम्ही सतत तणावाखाली असाल, तर तुमचे शरीर ग्लुकोजच्या या अतिरिक्त वाढीवर नियंत्रण ठेवू शकत नाही, ज्यामुळे तुम्हाला टाईप-2 मधुमेह होण्याचा धोका वाढू शकतो.
तणाव संप्रेरक कॉर्टिसोल वाढल्यामुळे, जलद श्वासोच्छ्वास आणि हृदय गती वाढण्याचा धोकादेखील असतो, ज्यामुळे तुमच्या पचनसंस्थेवर परिणाम होऊ शकतो. पोटात अॅसिडचे प्रमाण वाढल्यामुळे तुम्हाला छातीत जळजळ किंवा अॅसिड रिफ्लक्स होण्याची अधिक शक्यता असते.
अधिक प्रमाणात स्ट्रेस हार्मोन्समुळे श्वसन तसेच हृदय व रक्तवाहिन्यासंबंधी प्रणालींवर परिणाम होऊ लागतो. तणावाच्या प्रतिसादादरम्यान, ऑक्सिजनयुक्त रक्त जलद वितरित करण्याच्या प्रयत्नात तुमचे शरीर तुम्हाला जलद श्वास घेण्याचे संकेत देते. अशा परिस्थितीत, ज्या लोकांना आधीच दमा किंवा श्वासोच्छ्वासाचा त्रास आहे, त्यांच्या समस्या आणखी वाढू शकतात.
तणावादरम्यान तुमचे हृदयही वेगाने धडधडते. ताणतणाव संप्रेरकांचा अतिरेक रक्तवाहिन्या संकुचित करू शकतो, ज्यामुळे रक्तदाब वाढू शकतो आणि हृदयविकाराच्या इतर समस्या उद्भवू शकतात.
दीर्घकालीन तणावामुळे इतर अनेक गंभीर आरोग्य समस्या उद्भवू शकतात. मानसिक आरोग्य समस्या, जसे की नैराश्य, चिंता आणि व्यक्तिमत्त्व विकार, हृदयरोग, उच्च रक्तदाब, हृदयाची असामान्य लय, हृदयविकाराचा झटका आणि स्ट्रोक, लठ्ठपणा आणि इतर खाण्याचे विकार, लैंगिक समस्या तसेच त्वचा व केसांच्या समस्या.
