लंडन : अंतराळ संशोधनाच्या क्षेत्रात एक अत्यंत मोठी आणि खळबळजनक माहिती समोर आली आहे. आतापर्यंत पृथ्वीवरून मंगळ ग्रहावर जाण्यासाठी साधारणपणे नऊ महिने लागतात, परंतु शास्त्रज्ञांनी आता असा एक मार्ग शोधला आहे ज्यामुळे मंगळावर जाणे आणि परत येणे हा संपूर्ण प्रवास केवळ १५३ दिवसांत पूर्ण होऊ शकतो.
ब्राझीलमधील 'स्टेट युनिव्हर्सिटी ऑफ नॉर्दर्न रिओ डी जेनेरो'च्या शास्त्रज्ञांनी हा शोध लावला आहे. त्यांनी अंतराळातील '२००१ CA21' नावाच्या एका लघुग्रहाचा मार्ग अभ्यासला आहे. तसेच मंगळ प्रतियुतीचेही निरीक्षण केले आहे. दर २६ महिन्यांनी पृथ्वी, सूर्य आणि मंगळ एका रेषेत येतात, त्यामुळे मंगळ पृथ्वीच्या सर्वात जवळ असतो. २०११, २०२९ आणि २०३१ मधील प्रतियुतीचा अभ्यास करताना शास्त्रज्ञांना २०३१ मध्ये एक मोठी संधी दिसली आहे. २०३१ मध्ये '२००१ CA21' हा लघुग्रह पृथ्वी आणि मंगळ या दोन्ही ग्रहांच्या कक्षेला ओलांडून जाणार आहे. जर एखादे अंतराळयान या लघुग्रहाच्या मार्गाचा आणि गुरुत्वाकर्षणाचा योग्य वापर करू शकले, तर प्रवासाचा वेळ कमालीचा कमी होईल.
संशोधक मार्सेलो डी ऑलिव्हेरा सौझा यांनी स्पष्ट केले की, १५३ दिवसांची मोहीम ही 'एक्सट्रीम' (टोकाची) आहे, कारण यासाठी प्रचंड ऊर्जेची गरज भासणार आहे. मात्र, त्यांनी दुसरा एक अधिक 'वास्तववादी' पर्यायही दिला आहे, जो २२६ दिवसांत पूर्ण होऊ शकतो. हा पर्याय सध्याच्या आधुनिक इंधन तंत्रज्ञानाशी सुसंगत आहे.
नासा २०३० च्या दशकाच्या सुरुवातीला मानवाला मंगळावर पाठवण्याचे ध्येय ठेवून काम करत आहे. सध्याच्या तंत्रज्ञानाने मंगळावर जाऊन परत येण्यासाठी साधारण ३ वर्षे लागू शकतात, ज्यामुळे अंतराळवीरांच्या आरोग्यावर परिणाम होऊ शकतो. अशा परिस्थितीत १५३ किंवा २२६ दिवसांचा हा नवा पर्याय अंतराळ संशोधनासाठी 'गेम चेंजर' ठरू शकतो.
पृथ्वीवरून प्रस्थान: २० एप्रिल २०३१
मंगळावर आगमन: २३ मे २०३१
(प्रवासाला फक्त १ महिना लागेल)
मंगळावरील वास्तव्य : ३० दिवस (२३ मे ते २२ जून)
मंगळावरून परतीचा प्रवास : २२ जून २०३१
पृथ्वीवर आगमन:** २० सप्टेंबर २०३१
एकूण कालावधी:** १५३ दिवस
