‘मायग्रेन’ हा केवळ एक सामान्य डोकेदुखीचा प्रकार नसून, ती एक गंभीर समस्या आहे. यात असह्य वेदना, मळमळ आणि तीव्र प्रकाश किंवा आवाजाचा त्रास होतो. जे लोक मायग्रेनने ग्रस्त आहेत, त्यांना वारंवार तीव्र डोकेदुखीचा सामना करावा लागतो. विशेष म्हणजे मायग्रेनचा त्रास आपल्या काही सवयींमुळे होऊ शकतो. प्रत्येक व्यक्तीसाठी ही कारणे वेगवेगळी असू शकतात. आपल्या रोजच्या काही सवयी अशा आहेत, ज्या मायग्रेनवर जास्त परिणाम करतात. आपण अनेकदा या सवयींकडे दुर्लक्ष करतो, ज्यामुळे मायग्रेनचा त्रास वारंवार होऊ शकतो. जर तुम्हालाही ही समस्या असेल, तर या सवयी ओळखणे आणि त्यात सुधारणा करणे खूप महत्त्वाचे आहे. चला तर मग जाणून घेऊया अशा पाच सवयी, ज्या मायग्रेनचा त्रास वाढवू शकतात आणि त्यापासून कसे वाचावे.
तणाव : मायग्रेनचे सर्वात सामान्य कारण मानसिक तणाव आहे. जेव्हा आपण जास्त तणावाखाली असतो, तेव्हा आपले शरीर ‘कोर्टिसोल’सारखे स्ट्रेस हार्मोन्स सोडते. हे हार्मोन्स मायग्रेनला कारणीभूत ठरू शकतात. विशेषतः जेव्हा तणाव हळूहळू कमी होतो, जसे की आठवड्याच्या सुट्टीच्या दिवशी, तेव्हा हा त्रास वाढू शकतो. म्हणून सुरुवातीपासूनच तणावावर नियंत्रण ठेवणे महत्त्वाचे आहे. यासाठी तुम्ही ध्यान आणि दीर्घ श्वास घेण्याचा सराव करू शकता.
अल्कोहोल आणि कॅफीन : काहींना वाटते की, कॉफी प्यायल्याने मायग्रेनमध्ये आराम मिळतो. पण हे पूर्णपणे खरे नाही. अल्कोहोल आणि कॅफीन दोन्ही मायग्रेन वाढवू शकतात. जास्त प्रमाणात दारू प्यायल्याने शरीरात पाण्याची कमतरता होते, ज्यामुळे डोकेदुखी होऊ शकते. त्याचप्रमाणे कॅफीनची मात्रा अचानक कमी केल्यास देखील डोकेदुखी सुरू होऊ शकते.तीव्र प्रकाश आणि आवाज : सूर्यप्रकाश किंवा फ्लॅशिंग लाईटस्सारखा तीव्र प्रकाश आणि मोठा आवाज मायग्रेनला ट्रिगर करू शकतो. ज्या लोकांना प्रकाश आणि आवाजाची जास्त संवेदनशीलता असते, त्यांना याचा जास्त त्रास होतो. म्हणून, उन्हात बाहेर पडण्यापूर्वी सनग्लासेस घालणे आणि मोठ्या आवाजाच्या ठिकाणांपासून दूर राहणे महत्त्वाचे आहे.
झोपेच्या वेळापत्रकात बदल : अनियमित झोपेचे वेळापत्रक देखील मायग्रेनचे कारण बनू शकते. खूप जास्त किंवा खूप कमी झोप घेणे, दोन्हीमुळे आपल्या शरीराची ‘सर्केडियन रिदम’ बिघडते. दररोज एकाच वेळी झोपण्याची आणि उठण्याची सवय लावल्याने मायग्रेनची शक्यता कमी होण्यास मदत होते.
शारीरिक ताण : जास्त शारीरिक श्रम किंवा अचानक केलेले जोरदार व्यायाम मायग्रेनला वाढवू शकतात. जेव्हा आपण कठोर व्यायाम करतो, तेव्हा शरीरातील हार्मोन्सची पातळी बदलते, ज्यामुळे डोकेदुखी सुरू होऊ शकते.
