लंडन : आपल्या सर्वांच्या आयुष्यात प्लास्टिकचा वापर खूप वाढला आहे. आपण बाजारातून फॉईलमध्ये भाजी आणतो आणि मसाले घरी प्लास्टिकच्या डब्यात ठेवतो. एवढेच नाही, तर काही लोक प्लास्टिकच्या बाटल्यांमधील पाणीही सतत पितात; पण प्लास्टिकच्या बाटल्यांमधील पाणी पिणे तुमच्या आरोग्यासाठी किती हानिकारक आहे, हे तुम्हाला माहीत आहे का? नाही, तर जाणून घेऊया. न्यूयॉर्क पोस्टमध्ये प्रकाशित झालेल्या एका लेखानुसार, अलीकडील अभ्यासात असे दिसून आले आहे की, प्लास्टिकच्या बाटलीतील पाणी पिल्याने उच्च रक्तदाब होऊ शकतो. ऑस्ट्रियातील डॅन्यूब प्रायव्हेट युनिव्हर्सिटीमध्ये हा अभ्यास करण्यात आला.
या अभ्यासात असे आढळून आले की, जेव्हा प्लास्टिकच्या बाटलीतून पाणी प्यायले जाते तेव्हा प्लास्टिकचे छोटे कण पाण्यात मिसळतात आणि त्यानंतर ते पाण्याद्वारे आपल्या शरीरात प्रवेश करतात. या प्लास्टिक कणांना मायक्रोप्लास्टिक्स म्हणतात. ते आपल्या शरीरात रक्तप्रवाहात प्रवेश करतात आणि बराच वेळ रक्तात राहून आपले बीपी वाढवतात. विद्यापीठाने काही लोकांवर एक संशोधन केले, ज्यामध्ये त्यांनी काही लोकांना आठवडाभर प्लास्टिकच्या बाटल्यांमधून पाणी पिण्यास मनाई केली. आठवडाभरानंतर असे आढळून आले की, प्लास्टिकच्या बाटल्यांमधून पाणी पिणार्यांपेक्षा बाटलीतील पाणी न पिणार्यांचा रक्तदाब कमी होता. काही वर्षांपूर्वी एका शास्त्रज्ञाने असा दावा केला होता की, एका आठवड्यात सुमारे 5 ग्रॅम मायक्रोप्लास्टिक मानवी शरीरात प्रवेश करते. जे आरोग्यासाठी अत्यंत घातक आहे. यामुळे बीपी तर वाढतोच; पण हृदयाच्या समस्या आणि कॅन्सरचा धोकाही वाढतो.
