नवी दिल्ली : चॉकलेट खाणे आवडत नाही असे म्हणणं म्हणजे उगाचच प्रौढपणा मिरवण्यासारखे आहे. आबालवृद्ध अशा सर्वांनाच चॉकलेट खाणे आवडत असते. त्यातही चॉकलेट हे हृदय व मेंदूसाठी लाभदायक ठरतात असे संशोधक म्हणत असल्याने खाण्यासाठी तेही एक ‘आरोग्यदायी’ निमित्त मिळालेलं आहे. बाजारात वेगवेगळ्या प्रकारचे आणि फ्लेवरचे चॉकलेट पाहायला मिळतात. पण तुम्हाला माहिती आहे का की, फ्लेवर चॉकलेटपेक्षा किंवा इतर चॉकलेटपेक्षा डार्क चॉकलेट अधिक आरोग्यदायी मानले जाते. कारण त्यात लोह, मॅग्नेशियम, तांबे, मॅंगनीज, फायबर आणि फ्लेव्होनॉइड्स यांसारखे अँटिऑक्सिडंट्स असतात, जे शरीराला अनेक फायदे देऊ शकतात.
हेल्थलाइननुसार, डार्क चॉकलेटमध्ये फ्लेव्होनॉइड्स नावाचे अँटिऑक्सिडंट्स असतात, जे शरीराला पेशींचे नुकसान करणाऱ्या फ्री रॅडिकल्सपासून वाचवण्यास मदत करतात. त्यातील लोह शरीराला लाल रक्तपेशी तयार करण्यास मदत करते, तर मॅग्नेशियम स्नायू, नसा आणि शरीरातील इतर अनेक महत्त्वाच्या प्रक्रियांसाठी आवश्यक असते. तांबे आणि मॅंगनीजदेखील चांगले आरोग्य राखण्यात महत्त्वाची भूमिका बजावतात. डार्क चॉकलेटमध्ये फायबर देखील असते, जे पचनासाठी फायदेशीर ठरू शकते.
काही संशोधनानुसार त्यात असलेले अँटिऑक्सिडंट्स हृदयाचे आरोग्य जपण्यास, रक्तप्रवाह सुधारण्यास आणि रक्तदाब निरोगी ठेवण्यास मदत करू शकतात. त्यामुळे जास्त कोको असलेले डार्क चॉकलेट इतर चॉकलेट्सपेक्षा एक चांगला पर्याय मानले जाते. डार्क चॉकलेट खरेदी करताना सर्वात महत्त्वाचं म्हणजे लेबल काळजीपूर्वक वाचा. किमान ७० टक्के कोको असलेले डार्क चॉकलेट निवडा. तसेच शक्यतो कमी साखर असलेले चॉकलेट निवडा. ज्या चॉकलेटमध्ये साखरेचे किंवा इतर गोड पदार्थांचे प्रमाण जास्त असते त्याचे सेवन शरीरासाठी आरोग्यदायी फायदे कमी मिळतात. तसेच चांगल्या दर्जाचे डार्क चॉकलेट निवडा आणि त्याचे अतिसेवन टाळा. मधुमेह असलेल्या, कॅफीनची संवेदनशीलता असलेल्या आणि मायग्रेनचा त्रास असलेल्या व्यक्तींनी डार्क चॉकलेटचे सेवन करताना सावधगिरी बाळगावी. चॉकलेटमधील कोणत्याही घटकाची ॲलर्जी असलेल्या व्यक्तींनी डार्क चॉकलेटचे सेवन करू नये. याव्यतिरिक्त जर तुमच्या डॉक्टरांनी तुम्हाला एखाद्या विशिष्ट आरोग्य समस्येमुळे चॉकलेट न खाण्याचा सल्ला दिला असेल तर त्यांच्या सल्ल्याचे पालन करा. डार्क चॉकलेट खाल्ल्यानंतर तुम्हाला काही अस्वस्थता जाणवल्यास ते खाणे थांबवा आणि तुमच्या डॉक्टरांचा सल्ला घ्या.
