रिओ डी जनैरो : या जगात कधी काय घडेल हे काही सांगता येत नाही. काही गोष्टी तर थक्क करणार्याच असतात. काही लोकांना भलत्यासलत्या गोष्टींचीही अॅलर्जी असते व त्यामुळे अनेक समस्या निर्माण होतात. ब्राझीलमध्ये तर एका तरुणीने मिरचीचा वास घेतला आणि तिला अनेक दिवस कोमात राहावे लागले!
मनुष्याचे शरीर ही एक अतिशय गुंतागुंतीची रचना आहे. आपले शरीर कोणत्या गोष्टीला कसा प्रतिसाद देईल हे सांगता येत नाही. विशेषतः अॅलर्जीच्या समस्येत या गोष्टी प्रकर्षाने दिसून येतात. ब्राझीलमधील थायस मेडेइरोस या तरुणीबाबतही असेच घडले आहे. तिने एका फार तिखट असलेल्या मिरचीचा वास घेता. तिच्या आईने सांगितले की ती जेवण बनवण्यासाठी मदत करीत होती. त्यावेळी तिने तिखट मिरचीचा वास घेण्यासाठी ही मिरची नाकाला लावली. या वासाने तितच्या मेंदूवर गंभीर सूज आली.
या घटनेनंतर ती अनेक दिवस कोमात राहिली. तिला नंतर हॉस्पिटलमधून घरी सोडण्यात आले. मात्र, नंतर पुन्हा ताप आल्याने तिला हॉस्पिटलमध्ये दाखल केले गेले. यावेळी तिच्या फुफ्फुसात समस्या जाणवत होती. तिला आधीच ब्रोंकायटिस आणि अस्थमासारखे आजार होते. ही घटना याचवर्षी फेब्रुवारीमध्ये घडली होती. तिला 31 जुलैला डॉक्टरांनी घरी पाठवले होते. मात्र, पुन्हा हॉस्पिटलमध्ये दाखल केल्यापासून अद्याप ती हॉस्पिटलमध्येच आहे! डॉक्टरांनी तिला एडिमाची समस्या असल्याचे सांगितले. यामध्ये मेंदूवर सूज येते. सध्या ती बोलू किंवा चालू शकत नाही.
