Corona : कोव्हिडने वाढवला हृदयविकाराचा धोका
केंद्रीय आरोग्य मंत्री मनसुख मांडविया यांनी ऑक्टोबरमध्ये सांगितले होते की, ’आयसीएमआर’ने नुकताच एक अभ्यास केला आहे. यानुसार ज्यांना गंभीर कोव्हिड संसर्ग झाला होता आणि त्यानंतर जास्त वेळ गेलेला नाही, अशा लोकांनी हृदयविकाराचा झटका टाळण्यासाठी किमान एक किंवा दोन वर्षे अधिक धावणे किंवा व्यायाम करणे टाळले पाहिजे. केवळ भारतातच नाही तर जगभरातील डॉक्टर आणि शास्त्रज्ञ कोरोनाशी संबंधित धोक्यांमुळे चिंतेत आहेत. न्यूयॉर्क युनिव्हर्सिटी स्कूल ऑफ मेडिसिनच्या संशोधनातून असे दिसून आले आहे की जे लोक कोव्हिड संसर्गातून बरे झाले आहेत, त्यांना बरे झाल्यानंतरही घातक रोगांचा धोका जास्त असतो आणि त्यांना अधिक सतर्क राहण्याची गरज आहे. कोव्हिडमुळे त्यांची प्रतिकारशक्ती कमकुवत होते आणि त्यांच्या शरीराची रोगांशी लढण्याची नैसर्गिक क्षमताही तुलनेने कमी होते. या संशोधनात, कोव्हिड संसर्ग आणि हृदयविकाराचा झटका यांच्यातील काही संबंध समोर आले, जे खाली तपशीलवार समजले आहेत.
मॅक्रोफेज पेशी ः आपल्या रक्तातील मॅक्रोफेज नावाच्या पेशी परजीवी खाण्याचे काम करतात. असे केल्याने ते आपले रोग आणि संक्रमणांपासून संरक्षण करतात. या पेशी रक्तातील कोलेस्टेरॉलचे प्रमाण कमी करण्यासही मदत करतात. जर हे कोलेस्टेरॉल जास्त प्रमाणात वाढले तर ते रक्तवाहिन्यांमध्ये जमा होऊ लागते आणि हृदयविकाराचा झटका येतो. न्यूयॉर्क युनिव्हर्सिटी स्कूल ऑफ मेडिसिनमधील संशोधनात असे आढळून आले की कोरोना व्हायरस या मॅक्रोफेज पेशींवर नकारात्मक परिणाम करतो, ज्यामुळे रक्तातील कोलेस्टेरॉल कमी करण्याच्या प्रक्रियेत व्यत्यय येतो.
निरोगी पेशींचे नुकसान ः अमेरिकेतील जॉन हॉपकिन्स हॉस्पिटलच्या हृदयरोगतज्ज्ञ निशा अग्रवाल सांगतात की, संक्रमणाशी लढण्यासाठी आपले शरीर सायटोकाइन नावाचे रसायन सोडते. हे रसायन परजीवी पेशी नष्ट करण्याचे काम करते. परंतु, काहीवेळा कोरोनासारख्या धोकादायक संसर्गाच्या बाबतीत सायटोकाइन्स मोठ्या प्रमाणात बाहेर पडू लागतात आणि हे रसायन आपल्या शरीरातील निरोगी पेशींना नुकसान पोहोचवू लागते. या कारणास्तव, कोव्हिड संसर्गानंतर हृदयाच्या पेशी खराब होतात, ज्यामुळे हृदयविकाराचा धोका वाढतो.
मोठ्या आवाजाचा धोका ः जर्मनीतील मेंझ युनिव्हर्सिटी मेडिकल सेंटरमध्ये यावर संशोधन करण्यात आले. सुमारे पंधरा हजार लोकांवर केलेल्या या संशोधनात असे आढळून आले की, मोठ्या आवाजात संगीत एका मर्यादेपेक्षा जास्त ऐकले तर हृदयाचे ठोके वाढू शकतात. व्यायाम किंवा धावल्यानंतर हृदयाचे ठोके अचानक वाढतात तसे हे घडते. परंतु व्यायामाच्या विपरीत, मोठ्या आवाजातील संगीतामुळे वाढलेले हृदयाचे ठोके अनियमित आणि धोकादायक असतात. यामुळे स्ट्रोक आणि हृदयविकाराचा झटका देखील येऊ शकतो. आपल्या देशात पार्ट्या आणि लग्नसमारंभात असेच वातावरण असते. मोठ्या आवाजातील संगीत, उष्णता, गर्दी आणि गोंधळ या सर्व गोष्टी हृदयविकाराच्या झटक्यासारख्या समस्यांसाठी मैदान तयार करतात. यासोबतच चुकीचा आहार, उच्च रक्तदाब, मधुमेह आणि अनियमित जीवनशैलीमुळेही या आजारांचा धोका वाढतो. म्हणून, या परिस्थितीत राहणार्‍या लोकांनी विशेष खबरदारी घेणे आवश्यक आहे.