बीजिंग : काही काळापूर्वी हाँगकाँगमधील एका तलावातून एक विचित्र प्राणी बाहेर आला होता. या प्राण्याला 24 डोळे होते. शास्त्रज्ञांनी दिलेल्या माहितीनुसार, हा प्राणी प्रत्यक्षात अत्यंत विषारी जेलीफिशच्या नवीन प्रजातीचा सदस्य आहे. या प्राण्याचे शरीर एक इंचापेक्षा कमी लांबीचे आहे आणि तो पारदर्शक आहे. हाँगकाँगच्या माई पो येथे एका लहान तलावात हा प्राणी आढळला आहे. त्याचे तीन लांब-लांब पाय असून ते पसरल्यानंतर 10 सेंमीपर्यंत वाढू शकतात.
बॉक्स जेलीफिशची ही एक नवीन प्रजाती आहे. या प्राण्याला 24 डोळे असून ते प्रत्येकी चार यानुसार सहा गटांत विभागले आहेत. हे डोळे त्याच्या अवयवांमध्ये लपलेले असतात. यास रहोपॉलियम म्हणतात, बॉक्स जेलीफिशला त्याच्या शरीरावरून हे नाव देण्यात आले आहेत. त्याचे पाय लांब आणि पातळ असतात. त्यातूनच हा प्राणी विष सोडतो. या विषामुळे अर्धांगवायू, हृदयविकाराचा झटका आणि काही मिनिटांत मृत्यूही होऊ शकतो. या जेलीफिशची जवळची प्रजाती ऑस्ट्रेलियन बॉक्स जेलीफिश आहे. तीसुद्धा जगातील सर्वात विषारी सागरी प्राण्यांपैकी एक आहे.
सर्वात विषारी प्राण्यांपैकी एक
चौकोनी आकारामुळे सामान्यतः याला बॉक्स जेलीफिश म्हणून ओळखले जाते. 'झूलॉजिकल स्टडीज' या शैक्षणिक जर्नलमध्ये प्रसिद्ध झालेल्या संशोधनानुसार याच्या सुमारे 50 प्रजाती आहेत. ही जेलीफिश जगातील सर्वात विषारी प्राण्यांपैकी एक आहे. हाँगकाँग बाप्टिस्ट युनिव्हर्सिटीच्या नेतृत्वाखालील शास्त्रज्ञांच्या पथकाने तीन वर्षे जेलीफिशचा अभ्यास केला आणि माई पो नेचर रिझर्व्ह येथील तलावात कोळंबीपेक्षा जास्त जेलीफिश असल्याचे त्यांना आढळून आले आहे.
एकमेव प्रजाती सध्या चीनमध्येच
शास्त्रज्ञांनी रिझर्व्हच्या सन्मानार्थ याला ट्रिपेडेलिया मायपोएन्सिस असे नाव दिले आहे. प्रमुख संशोधक प्रोफेसर किऊ जियानवेन यांनी सांगितले की, ही प्रजाती सध्या फक्त माई पोमध्ये आढळते. हा शोध अतिशय महत्त्वाचा मानला जात आहे, कारण, हा जेलीफिश चीनमधील पाण्यात प्रथमच दिसला आहे.
