पुढारी ऑनलाईन डेस्क : नीट यूजी (NEET-UG 2024) शी संबंधित याचिका उच्च न्यायालयातून सर्वोच्च न्यायालयात हस्तांतरित करण्याच्या मागणीसाठी नॅशनल टेस्टिंग एजन्सीने (NTA) दाखल केलेल्या याचिकेवर सर्वोच्च न्यायालयाने नोटीस जारी केली. तसेच सर्वोच्च न्यायालयाने उच्च न्यायालयातील याबाबतच्या खटल्यांच्या कार्यवाहीला स्थगिती दिली. पण विद्यार्थ्यांचे समुपदेशन ((काऊन्सिलिंग) थांबवले जाणार नाही, असा पुनरुच्चारही सर्वोच्च न्यायालयाने गुरुवारी केला.
न्यायमूर्ती विक्रमनाथ आणि न्यायमूर्ती एस.व्ही.एन भाटी यांच्या खंडपीठाने या प्रकरणाची पुढील सुनावणी ८ जुलैपर्यंत सरकार आणि एनटीएकडे उत्तर मागितले आहे.
सर्वोच्च न्यायालयाने EET UG 2024 मधील कथित पेपर फुटीसंदर्भात राजस्थान, कोलकाता आणि मुंबई उच्च न्यायालयात दाखल झालेल्या याचिकांवरील कार्यवाहीला स्थगिती दिली. नॅशनल टेस्टिंग एजन्सीने दाखल केलेल्या हस्तांतरण याचिकांवर नोटीस जारी करताना सर्वोच्च न्यायालयाने हा आदेश दिला.
एनटीएने देशातील विविध उच्च न्यायालयांमध्ये सुरू असलेल्या कार्यवाहीला स्थगिती देण्याची मागणी केली होती. विद्यार्थिनी तन्मयासह २० विद्यार्थ्यांनी दाखल केलेल्या याचिकेवर आज सर्वोच्च न्यायालयात सुनावणी झाली. ५ मे रोजी झालेल्या परीक्षेची सर्वोच्च न्यायालयाच्या देखरेखीखाली सीबीआय अथवा अन्य कोणत्याही स्वतंत्र यंत्रणेमार्फत चौकशी करण्यात यावी, अशी मागणी या विद्यार्थ्यांनी केली होती.
