महाराष्ट्राला वैचारिक दिशा देणारे प्रबोधनकार ठाकरे… | पुढारी

महाराष्ट्राला वैचारिक दिशा देणारे प्रबोधनकार ठाकरे…

Visual Portfolio, Posts & Image Gallery for WordPress

संयुक्त महाराष्ट्र चळवळीतील अग्रणी, लेखक, पत्रकार, इतिहास संशोधक, वक्ते प्रबोधनकार ठाकरे यांची आज जयंती.

त्यांचा जन्म १७ सप्टेंबर १८८५ ला रायगड जिल्ह्यातील (पूर्वीचा कुलाबा जिल्हा) पनवेल येथे झाला.

झंझावती व्यक्तिमत्व असलेल्या प्रबोधनकार ठाकरे यांचं पूर्ण नाव केशव सीताराम ठाकरे.

शिवसेना प्रमुख बाळासाहेब ठाकरे हे प्रबोधनकारांचे पुत्र, तर विद्यमान मुख्यमंत्री उद्धव ठाकरे यांचे आजोबा .

केशव सीताराम ठाकरे यांनी सुरु केलेल्या ‘प्रबोधन’ या नियतकालिकातून त्यांनी संपूर्ण महाराष्ट्राला दिशादर्शक ठरेल असे लेखन केले. त्यामुळे त्यांच्या प्रबोधनात्मक लेखनावरून ‘प्रबोधनकार’ ही उपाधी मिळाली. १६ ऑक्टोंबर, १९२१ ला प्रबोधन चा पहिला अंक सुरू केला.

त्यांनी महिलांचे केशवपन, अस्पृश्यता, हुंडा, पुजाऱ्यांची अरेरावी, हुकूमशाही, सामाजिक विषमता, अंधश्रद्धा, देवधर्म, कर्मकांड यांसारख्या अनिष्ट रुढी, प्रथांवर आवाज उठविला.

‘कोदंडाचा टणत्कार’, ‘भिक्षुकशाहीचे बंड’, ‘देवळांचा धर्म आणि धर्माची देवळे’, ‘कुमारिकांचे शाप’, ‘देवांची परिषद’ आदी प्रबोधनात्मक पुस्तकांतून त्यांनी अनिष्ट रुढींवर, सामाजिक विसंगतीवर परखड लेखन केले आहे.

प्रबोधनकार ठाकरे यांनी केवळ लेखन केले नाही तर तशी कृतीही केली. लेखनाबरोबरच अमोघ आणि आक्रमक वत्कृत्वाने त्यांनी महाराष्ट्राला वैचारिक दिशा दिली.

हुंडाप्रतिबंधक चळवळ हाती घेवून त्यांनी मुंबई येथे हुंडा विंध्वसक सभेची स्थापना केली.

“धर्माने मनुष्य जन्माला घातला नाही, तर माणसानेच धर्माला जन्म दिला आहे” – प्रबोधनकार ठाकरे

“आजवर ठाकरे कुटुंबाचा असलेला हा बाळ मी तुम्हाला, या महाराष्ट्राला आज अर्पण करत आहे” – प्रबोधनकार ठाकरे

प्रबोधनकार ठाकरे यांनी ‘माझी जीवनगाथा’ या आत्मचरित्रात आपल्या ८८ वर्षांच्या आठवणी सांगितल्या आहेत.

प्रबोधनकार ठाकरे आणि महाराष्ट्रातील समाजसुधारकांमध्ये सुसंवाद होता किंबहुना त्यांनी महाराष्ट्राची सामाजिक चळवळ पुढे नेली.

बाळासाहेब ठाकरे यांच्यासारख्या उत्कृष्ट व्यंगचित्रकाराच्या कुंचल्यातून साकारलेले प्रबोधनकार ठाकरे.

२० नोव्हेंबर, १९७३ रोजी त्यांचे निधन झाले. त्यांच्या निधनामुळे महाराष्ट्राची प्रबोधनज्योत मालवली. मात्र, त्यांच्या पुस्तकांमधून वैचारिक यज्ञ अखंड तेवत आहे.

 

आणखी पहा

Visual Portfolio, Posts & Image Gallery for WordPress
Load More Loading More… You’ve reached the end of the list

 

 

Back to top button