Jasprit Bumrah Test Cricket : भारताचा वेगवान गोलंदाज जसप्रीत बुमराह सध्याच्या काळातील सर्वोत्तम गोलंदाजांपैकी एक आहे. अत्यंत कठीण परिस्थितीतही एकहाती सामना फिरवण्याची क्षमता त्याने वारंवार सिद्ध केली आहे. पाकिस्तानचा माजी वेगवान गोलंदाज वकार युनिसने बुमराहचे कौतुक केले असले, तरी एका बाबतीत ते अजूनही पूर्णपणे समाधानी नाहीत.
शुभंकर मिश्रा यांच्या यूट्यूब चॅनेलवरील पॉडकास्टमध्ये बोलताना वकार युनिस म्हणाला, बुमराह 'व्हाइट-बॉल' (मर्यादित षटकांच्या) क्रिकेटमध्ये अपवादात्मक गोलंदाज आहे, परंतु कसोटी क्रिकेटमध्ये सर्वोत्तम गोलंदाजांच्या श्रेणीत येण्यासाठी त्याला अजूनही खूप काही सिद्ध करायचे आहे. आतापर्यंत बुमराहने ५२ कसोटी सामने खेळले असून, त्यात २३४ बळी (विकेट्स) मिळवले आहेत; त्याची सरासरी ९.७ आणि स्ट्राईक रेट ४२.८ इतका आहे.
वकार म्हणाला, " कसोटी क्रिकेटचा विचार करायचा तर, त्याला अजूनही बरेच काही सिद्ध करायचे आहे; त्याने या फॉरमॅटमध्ये पुरेसे सामने खेळलेले नाहीत. कसोटी क्रिकेटमध्ये मिचेल स्टार्क आणि जोश हेझलवूडसारखे इतरही गोलंदाज आहेत. तसेच काही इंग्लिश गोलंदाजांकडेही दुर्लक्ष करून चालणार नाही.
टी-२० आणि एकदिवसीय (ODI) क्रिकेटचा प्रश्न येतो, तेव्हा मला वाटते की प्रभावाच्या बाबतीत बुमराह कठीण प्रसंगांत सातत्याने उत्कृष्ट कामगिरी करतो. तुम्ही १०० धावा केल्या, पण तरीही तुमचा संघ सामना हरला, तर त्या शतकाचा काहीही उपयोग नाही. पण तुम्ही कठीण परिस्थितीत ४० धावा केल्या किंवा एखादी महत्त्वाची विकेट घेतली, तर त्याला खरोखर अर्थ असतो कारण त्यामुळे सामना जिंकण्यास मदत होते. माझ्या मते, बुमराह अशा प्रकारचा गोलंदाज आहे जो कठीण प्रसंगी चेंडू हातात घेतल्यावर नेहमीच अपेक्षित कामगिरी करून दाखवतो आणि हेच सर्वात महत्त्वाचे असते. त्याने हे केवळ एकदा किंवा दोनदाच नव्हे, तर अनेक प्रसंगी सिद्ध करून दाखवले आहे," असेही वकार यांनी स्‍पष्‍ट केले.
वकार युनिस सध्या बुमराहला कसोटी क्रिकेटमधील सर्वोत्तम गोलंदाजांपैकी एक मानत नसले, तरी त्याची कामगिरी आणि आकडेवारी मात्र काहीतरी वेगळेच दर्शवते. बुमराहने जानेवारी २०१८ मध्ये कसोटी क्रिकेटमध्ये पदार्पण केले. त्याने आपल्या केवळ ११ व्या सामन्यात ५० कसोटी बळींचा टप्पा गाठला. अशी कामगिरी करणारा तो सर्वात जलद भारतीय वेगवान गोलंदाज ठरला आहे. त्यानंतर, २४ व्या सामन्यात त्याने आपली १०० वी कसोटी विकेट घेतली. २०१९ मध्ये, कसोटी क्रिकेटमध्ये हॅट्ट्रिक घेणारा तो तिसरा भारतीय गोलंदाज बनला. बुमराहने 'आयसीसी मेन्स टेस्ट क्रिकेटर ऑफ द इयर २०२४' हा पुरस्कारही पटकावला आहे.
२०२४-२५ च्या बॉर्डर-गावस्कर ट्रॉफीदरम्यान, त्याने पाच कसोटी सामन्यांत एकूण ३२ बळी घेतले. इंग्लंडमध्येही त्याने प्रभावी कामगिरी केली असून, तिथे ११ कसोटी सामन्यांत ५१ बळी मिळवले आहेत. हे लक्षात घेण्यासारखे आहे की, ऑस्ट्रेलियाचे मिचेल स्टार्क आणि जोश हेझलवूड यांच्या तुलनेत, दुखापतींमुळे बुमराहला कसोटी क्रिकेटमध्ये सातत्याने खेळता आलेले नाही. वर्कलोड मॅनेजमेंटचा भाग म्हणून, त्याने यावर्षी आतापर्यंत भारतासाठी एकही कसोटी सामना खेळलेला नाही. तो कदाचित पुढच्या महिन्यात न्यूझीलंडविरुद्ध होणाऱ्या दोन कसोटी सामन्यांच्या मालिकेत पुन्हा मैदानात उतरू शकतो.
