रांची : भारतीय क्रिकेट संघाचा 'रन मशीन' आणि मास्टर क्लास फलंदाज विराट कोहलीने क्रिकेटच्या इतिहासात आपले नाव सुवर्णाक्षरांनी कोरले आहे. भारत आणि दक्षिण आफ्रिका यांच्यातील एकदिवसीय मालिकेच्या पहिल्या सामन्यात, रांची येथील JSCA आंतरराष्ट्रीय स्टेडियमवर, विराटने अविस्मरणीय शतक झळकावून एक नवा विश्वविक्रम प्रस्थापित केला आहे.
या शानदार शतकासह, विराट कोहली आंतरराष्ट्रीय क्रिकेटमध्ये एकाच फॉरमॅटमध्ये सर्वाधिक शतके झळकावणारा फलंदाज बनला आहे. या विक्रमाच्या शर्यतीत त्याने क्रिकेटचा देव मानल्या जाणाऱ्या सचिन तेंडुलकरलाही मागे टाकले आहे.
या निर्णायक सामन्यात विराट कोहलीने केवळ १०२ चेंडूंमध्ये आपले शतक पूर्ण केले. एकदिवसीय क्रिकेटमधील हे त्याचे ५२वे शतक आहे. यापूर्वी, आंतरराष्ट्रीय क्रिकेटमध्ये एकाच फॉरमॅटमध्ये सर्वाधिक शतके करण्याचा विक्रम महान फलंदाज सचिन तेंडुलकर याच्या नावावर होता. सचिनने कसोटी क्रिकेटमध्ये ५१ शतके झळकावली होती. विराट कोहलीने या सामन्यात ५२वे शतक झळकावून सचिनचा हा तब्बल दोन दशकांहून अधिकचा जुना विक्रम मोडीत काढला. यासह किंग कोहलीने क्रिकेटच्या इतिहासात नवा अध्याय लिहिला आहे.
विराट कोहलीने या सामन्यात केवळ शतकाचाच नाही, तर मायदेशात आणखी एका विक्रमावर आपले नाव कोरले. वनडे इंटरनॅशनलमध्ये भारताच्या भूमीवर सर्वाधिक ५० किंवा त्याहून अधिक धावा करणाऱ्या फलंदाजांच्या यादीत कोहलीने आता प्रथम स्थान पटकावले आहे. हा त्याचा भारतातील या फॉरमॅटमधील ५९वा ५०+ स्कोअर ठरला आहे.
यापूर्वी, सचिन तेंडुलकरने मायदेशात ५८ वेळा ५०+ स्कोअर केले होते. या यादीत दक्षिण आफ्रिकेचा जॅक कॅलिस (४६) आणि ऑस्ट्रेलियाचा रिकी पॉन्टिंग (४५) खूप मागे आहेत.
या सामन्यात भारताची सुरुवात संथ झाली होती. सलामीवीर यशस्वी जैस्वाल (१८ धावा) लवकर बाद झाल्यानंतर, रोहित शर्मा आणि विराट कोहली यांनी भारतीय डावाची सूत्रे हाती घेतली. या दोन्ही दिग्गजांनी मैदानात जमून, शानदार फलंदाजीचा नमुना पेश केला. रोहित आणि विराट यांच्यात दुसऱ्या विकेटसाठी १३६ धावांची दमदार भागीदारी झाली. रोहित शर्मा ५१ चेंडूत ५७ धावा करून बाद झाला, तर त्यानंतर विराटने संघाचा डाव यशस्वीपणे पुढे नेला.
