Vinesh Phogat’s Big Revelation in Harassment Case Against Brij Bhushan Singh
नवी दिल्ली : भारताची स्टार कुस्तीपटू विनेश फोगटने रविवारी एक खळबळजनक खुलासा केला आहे. भारतीय कुस्ती महासंघाचे (WFI) माजी अध्यक्ष ब्रिजभूषण शरण सिंह यांच्याविरोधात लैंगिक छळाची तक्रार करणाऱ्या सहा महिला कुस्तीपटूंमध्ये स्वतःचाही समावेश असल्याचे तिने जाहीर केले आहे.ब्रिजभूषण यांच्यावरील खटला सध्या न्यायालयात सुरू असून साक्ष नोंदवण्याची प्रक्रिया सुरू आहे. विनेशने सांगितले की, तिने यापूर्वी आपली ओळख गुप्त ठेवण्याचा निर्णय घेतला होता आणि तिला कायदेशीर प्रक्रिया पूर्ण होऊ द्यायची होती.
सोशल मीडियावर आज (दि. ३ मे) शेअर केलेल्या व्हिडिओमध्ये विनेश म्हणाली, "सर्वोच्च न्यायालयाच्या मार्गदर्शक तत्त्वांनुसार, पीडितेची ओळख उघड केली जाऊ नये, कारण हा त्यांच्या सन्मानाचा आणि प्रतिष्ठेचा विषय असतो; पण आज काही विशिष्ट परिस्थितींमुळे मला सर्वांना काहीतरी सांगायचे आहे. खटला प्रलंबित असताना मला बोलायचे नव्हते... पण मी हे सांगू इच्छिते की, ज्या सहा पीडितांनी तक्रार दाखल केली होती, त्यापैकी मी एक आहे आणि आमची साक्ष अद्याप सुरू आहे." दरम्यान, २०२३ मध्ये दिल्लीतील जंतरमंतर येथे ब्रिजभूषण यांच्या विरोधात झालेल्या आंदोलनातील मुख्य चेहरा विनेश फोगट होती.
विनेशने आता जाहीरपणे बोलण्याचा निर्णय घेण्याचे मुख्य कारण म्हणजे भारतीय कुस्ती महासंघाने (WFI) उत्तर प्रदेशातील गोंडा येथे रँकिंग स्पर्धा आणि चाचण्या (Trials) घेण्याचे ठरवले आहे. विनेशच्या मते, गोंडा हे ब्रिजभूषण यांच्या प्रभावाखालील क्षेत्र आहे. या चाचण्या त्यांच्या मालकीच्या एका खासगी कॉलेजमध्ये घेतल्या जात आहेत, ज्यामुळे खेळाडूंना न्याय मिळेल की नाही, अशी शंका तिने उपस्थित केली आहे.
विनेशने भीती व्यक्त केली की, "जर नॅशनल ओपन रँकिंग स्पर्धेदरम्यान मला किंवा माझ्या टीमला काही झाले, तर त्याला भारत सरकार जबाबदार असेल. स्पर्धा अशा ठिकाणी आयोजित केली जात आहे जिथे त्यांचा (ब्रिजभूषण) मोठा प्रभाव आहे. कोणता सामना कोण हाताळणार, किती गुण दिले जाणार, मॅट चेअरमन कोण असेल, या सर्व गोष्टींवर त्यांचे नियंत्रण असू शकते."
सुमारे १८ महिन्यांनंतर पुनरागमन करत असलेल्या ३१ वर्षीय विनेशने सांगितले की, ती ५७ किलो वजनी गटात खेळणार आहे. मात्र, अशा वातावरणात १०० टक्के कामगिरी करणे कठीण असल्याचे म्हटलं आहे. "मी कोणतीही सवलत किंवा विशेष वागणूक मागत नाही. माझी इच्छा फक्त इतकीच आहे की निकालांमधून खेळाडूंच्या कष्टाचे प्रतिबिंब दिसावे. अशा वातावरणात खेळणे जिथे उपस्थित असलेले बहुतांश लोक त्यांच्याशी (ब्रिजभूषण) संबंधित असू शकतात, माझ्यावर प्रचंड मानसिक दडपण आणत आहे."
विनेशने सरकार आणि क्रीडा मंत्रालयावरही निशाणा साधला. अधिकारी कोणतीही कारवाई करत नसून सरकार केवळ 'प्रेक्षक' म्हणून पाहत आहे आणि त्यांनी ब्रिजभूषण यांना मोकळे रान दिले आहे, असा आरोप तिने केला.२०२४ च्या पॅरिस ऑलिम्पिकमध्ये अंतिम फेरीतून वजन जास्त भरल्यामुळे अपात्र ठरल्यानंतर विनेशची ही पहिलीच स्पर्धा असेल. २०२३ मध्ये सुरू झालेल्या कुस्तीपटूंच्या आंदोलनानंतर अनेक महिला कुस्तीपटूंनी ब्रिजभूषण यांच्यावर लैंगिक छळाचे आरोप करत तक्रारी दाखल केल्या होत्या. ब्रिजभूषण शरण सिंह यांनी हे सर्व आरोप फेटाळून लावले आहेत.
