लॉस एंजेलिस; वृत्तसंस्था : फिफा विश्वचषक स्पर्धेतील आपल्या सलामीच्या लढतीत यजमान अमेरिकेने येथील सोफी स्टेडियमवर पॅराग्वेचा ४-१ असा धुव्वा उडवला. या सामन्यातील पूर्वार्धात सातव्या मिनिटाला यजमानांतर्फे सर्वात वेगवान गोलाचा नवा विक्रम प्रस्थापित झाला. पॅराग्वेच्या डॅमियनकडून यावेळी स्वयंगोल झाला. यासह विश्वचषकाच्या इतिहासात सलामीच्या सामन्यात सर्वात वेगवान गोल करणाऱ्या यजमान देशांच्या यादीत अमेरिकेने तिसरे स्थान पटकावले.
स्टेडियममध्ये उपस्थित ७०,४९२ चाहत्यांच्या साक्षीने रंगलेल्या या सामन्यात अमेरिकेने सुरुवातीपासूनच पॅराग्वेच्या बचाव फळीवर प्रचंड दडपण आणले. सातव्या मिनिटाला वेस्टन मॅकेनीने पॅराग्वेच्या डी-बॉक्समध्ये एक अत्यंत वेगवान आणि भेदक पास टाकला. हा हल्ला परतवून लावताना पॅराग्वेचा डिफेंडर डॅमियन बोबाडिला पुरता गडबडला. अमेरिकेच्या आक्रमक दबावापुढे बोबाडिलाच्या पायाला लागून चेंडू थेट त्याच्याच गोलपोस्टमध्ये गेला. हा 'स्वयंगोल' ठरला असला, तरी याने संपूर्ण स्टेडियममध्ये एकच जल्लोष निर्माण केला आणि अमेरिकेला १-० अशी महत्त्वपूर्ण आघाडी मिळवून दिली.
या सातव्या मिनिटाला झालेल्या गोलने अमेरिकेला विश्वचषकाच्या इतिहासात मानाचे स्थान मिळवून दिले. सलामीच्या सामन्यात यापेक्षा वेगवान गोल केवळ दोनच यजमान देशांना करता आले आहेत.
१९३८ फ्रान्स वि. बेल्जियम पहिले मिनिट (अद्यापही सर्वात वेगवान).
२००६ जर्मनी वि. कोस्टारिका फिलिप लाम ६ वे मिनिट.
२०२६ अमेरिका वि. पॅराग्वे डॅमियन बोबाडिला (स्वयंगोल) ७ वे मिनिट.
२०२६ मेक्सिको वि. द. आफ्रिका ज्युलियन क्विनोनेस ९ वे मिनिट.
