नवी दिल्ली : क्रिकेटच्या सर्वात लहान प्रारूपात भारतीय फलंदाजांच्या बॅटमधून धावांचा असा काही वणवा पेटला आहे की, संघाने आंतरराष्ट्रीय टी-२० क्रिकेटच्या इतिहासात अभूतपूर्व सुवर्णपान लिहिले आहे. एका कॅलेंडर वर्षात तब्बल ४०० षटकार खेचणारा भारतीय संघ जगातील पहिलाच संघ ठरला असून, आजवर एकाही देशाला ही किमया साधता आलेली नाही. न्यूझीलंडविरुद्ध हॅमिल्टन येथील सेडन पार्क मैदानावर खेळल्या गेलेल्या पाचव्या आणि अंतिम टी-२० सामन्यात भारतीय फलंदाजांनी या ऐतिहासिक विक्रमावर शिक्कामोर्तब केले.
या निर्णायक लढतीत भारतीय फलंदाजांनी एकूण ११ उत्तुंग षटकार ठोकले. यासह भारताच्या खात्यात चालू वर्षात अवघ्या ४० सामन्यांत ४०० आंतरराष्ट्रीय षटकारांची विक्रमी नोंद झाली. विशेष म्हणजे, या वर्षातील ४०० षटकारांपैकी एकट्या न्यूझीलंडविरुद्ध भारतीय संघाने तब्बल १४२ षटकार लगावले आहेत. आंतरराष्ट्रीय टी-२० मध्ये एकाच वर्षात एखाद्या विशिष्ट प्रतिस्पर्धी संघाविरुद्ध कोणत्याही संघाने मारलेले हे सर्वाधिक षटकार ठरले आहेत. या विक्रमी कामगिरीसह भारतीय संघाने आंतरराष्ट्रीय टी-२० क्रिकेटच्या इतिहासात एकूण २,००० षटकारांचा टप्पाही ओलांडला असून, वेस्ट इंडिजच्या सार्वकालिक विक्रमाशी बरोबरी करण्याच्या दिशेने भक्कम पाऊल टाकले आहे.
चालू वर्षात भारताकडून सर्वाधिक षटकार ठोकणाऱ्यांमध्ये सलामीवीर अभिषेक शर्मा अव्वल स्थानी असून त्याने ८६ षटकार खेचले आहेत. त्यापाठोपाठ ईशान किशन ६० षटकारांसह दुसऱ्या, तर संजू सॅमसन ५० षटकारांसह तिसऱ्या क्रमांकावर आहे.
ऐतिहासिक विक्रमाची पार्श्वभूमी लाभलेल्या या अंतिम सामन्यात नाणेफेक गमावून प्रथम फलंदाजी करताना भारताची सुरुवात अडखळती झाली होती. अवघ्या १९ धावांवर भारताने दोन्ही सलामीवीर गमावले. मात्र, संकटमोचक ठरलेल्या ईशान किशन आणि कर्णधार श्रेयस अय्यर यांनी तिसऱ्या विकेटसाठी ९३ धावांची तुफानी भागीदारी रचून डावाला गती दिली. ईशान किशनने अवघ्या ३१ चेंडूंत ५ चौकार व ५ षटकारांच्या जोरावर ६१ धावांची आक्रमक खेळी साकारली, तर कर्णधार श्रेयस अय्यरने केवळ २३ चेंडूंत ३ चौकार आणि ४ षटकारांची आतषबाजी करत ५० धावांचे तडाखेबंद अर्धशतक झळकावले. त्यानंतर नमन धीरने २३ चेंडूंत ३३ धावांचे, तर नितीश कुमार रेड्डीने १७ चेंडूंत २२ धावांचे महत्त्वपूर्ण योगदान दिले.
भारताचा संघ २०० धावांचा टप्पा ओलांडणार असे दिसत असतानाच न्यूझीलंडचा अनुभवी वेगवान गोलंदाज ॲडम मिलनेने भारताच्या धावगतीला वेसण घातली. डेथ ओव्हर्समध्ये टिच्चून मारा करत मिलनेने अवघ्या १९ धावांत ४ बळी टिपले. त्यामुळे भारताचा डाव निर्धारित २० षटकांत ८ बाद १९१ धावांवर मर्यादित राहिला.
प्रत्युत्तरात १९२ धावांच्या आव्हानाचा पाठलाग करण्यासाठी उतरलेल्या यजमान किवी संघाची सुरुवात निराशाजनक झाली. भारताचा डावखुरा वेगवान गोलंदाज अर्शदीप सिंगने न्यूझीलंडचा धोकादायक सलामीवीर फिन ॲलनला बाद करून सुरुवातीलाच मोठा धक्का दिला. पाच सामन्यांच्या या मालिकेत भारताने आधीच ३-१ अशी विजयी आघाडी घेतली असून, मालिका ४-१ अशा फरकाने खिशात घालून दौऱ्याची सांगता करण्याचा भारतीय संघाचा मानस आहे.