सूर्यकुमार यादव टी-२० विश्वचषक २०२४ च्या फायनलमध्ये डेव्हिड मिलरच्या मॅच विनिंग कॅचबद्दल बोलला. इंडिया टुडेला दिलेल्या खास मुलाखतीत त्याने हा खुलासा केला.
मिलरने हार्दिक पंड्याच्या पहिल्या फुलटॉस चेंडूवर मोठा फटका मारला, हा चेंडू हवेत उंच उडाला आणि सीमारेषेच्या दिशेने गेला. तिथे सूर्यकुमार सीमारेषेच्या जवळ होता. क्षणभर असे वाटत होते की चेंडू सीमारेषा ओलांडून जाईल, पण सूर्यकुमारने अद्भुत कामगिरी केली.
सूर्यकुमारने आधी पाय सीमारेषेला टच होणार नाही याची काळजी घेत झेल घेतला; परंतु तोल जाऊ लागल्याने त्याने चेंडू हवेत उडवला. सूर्यान शिताफीने सीमारेषेच्या आत येताना झेल पुन्हा घेतला, यावेळी त्याने चेंडू हातात येत असताना पाय हवेत राहील याचीही दक्षता घेतली. या अफलातून झेलमुळे टीम इंडियाचा विजय निश्चित झाला.
शेवटच्या षटकाच्या पहिल्या चेंडूवर डेव्हिड मिलरने मारलेला फटका जेव्हा माझ्या दिशेने आला तेव्हा मी तो झेल घेण्यासाठी धावलो; परंतु तो माझ्यापासून थोडा लांब आणि उंच होता, सीमारेषेपार हवेतून चाललेला चेंडू पाहून एक क्षण असे वाटले की चेंडू नाही ट्रॉफी सीमारेषा ओलांडून पलीकडे जात आहे, अशा शब्दांत सूर्यकुमार यादवने अफलातून झेलचा लाईव्ह थरार वर्णन केला.
सूर्यकुमार झेलबद्दल म्हणाला, आता हे सांगणे सोपे वाटत आहे, पण त्यावेळी असे वाटले की चेंडू नाही ट्रॉफी सीमारेषा ओलांडून पलीकडे जात आहे. त्यावेळेला मला जे शक्य होते ते सर्व केले आणि त्या वेळी वारादेखील मदतीला होता. तसेच, आम्ही आमच्या क्षेत्ररक्षण प्रशिक्षकासोबत भरपूर सराव केला आहे आणि असे अनेक झेल यशस्वीपणे टिपले आहेत. त्यामुळे जेव्हा सामन्यात एवढा मोठा क्षण येतो, तेव्हा प्रसंगावधानत आपल्यासाठी खूप महत्त्वाची असते.
सूर्यकुमारने असेही सांगितले की, एक क्षण असा आला की जेव्हा त्यांना वाटले की सामना आता त्यांच्यापासून दूर जात आहे. मात्र, जसप्रीत बुमराह आणि अर्शदीप सिंग सामना पुन्हा भारताच्या बाजूने फिरवू शकतात, असा त्याला विश्वास होता.
