South Africa vs Australia Test Series 2026 : दक्षिण आफ्रिका आणि ऑस्ट्रेलिया यांच्यात तीन सामन्यांच्या कसोटी मालिकेतील अतिशय रंगतदार झालेला अखेरचा सामना शनिवारी संपला. केपटाऊनच्या न्यूलँड्स मैदानावर खेळल्या गेलेल्या या निर्णायक सामन्यात दक्षिण आफ्रिकेने ऑस्ट्रेलियाचा १७६ धावांनी दणदणीत पराभव केला. पाचव्या आणि अखेरच्या दिवसापर्यंत रंगलेल्या या लढतीत अखेर दक्षिण आफ्रिका संघाने बाजी मारली.
दक्षिण आफ्रिकेने तब्बल ८ वर्षांनंतर ऑस्ट्रेलियाविरुद्ध कसोटी मालिका खिशात घातली आहे. याआधी २०१७-१८ मध्ये दक्षिण आफ्रिकेने कांगारूंना ४ सामन्यांच्या मालिकेत ३-१ असे पराभूत केले होते. त्यानंतर मालिका विजयासाठी ८ वर्षे वाट पाहावी लागली, जी प्रतीक्षा आज संपली.
मालिकेच्या पहिल्या सामन्यात ऑस्ट्रेलियाने २१४ धावांनी मोठा विजय मिळवून दणक्यात सुरुवात केली होती. मात्र, या मोठ्या पराभवानंतर पुनरागमन करत दक्षिण आफ्रिकेने पुढचे दोन्ही सामने जिंकत मालिका २-१ अशी जिंकली. दुसऱ्या सामन्यात आफ्रिकेने ऑस्ट्रेलियाचा डाव एक डाव आणि ३१ धावांनी संपुष्टात आणला होता, तर तिसऱ्या सामन्यात १७६ धावांनी विजय मिळवत मालिका आपल्या नावावर केली.
२७ ऑक्टोबरपासून सुरू झालेल्या या सामन्यात ऑस्ट्रेलियन कर्णधार पॅट कमिन्सने नाणेफेक जिंकून प्रथम गोलंदाजीचा निर्णय घेतला. प्रथम फलंदाजी करताना दक्षिण आफ्रिकेने पहिल्या डावात ३२९ धावांपर्यंत मजल मारली. एडेन मार्करमने ७८, मार्कस एकरम्यानने ९५ आणि डेव्हिड बेडिंघमने ५० धावांची खेळी केली. याशिवाय यष्टीरक्षक फलंदाज रायन रिकल्टनने ४२ आणि अष्टपैलू मार्को यान्सेनने ५२ धावांचे महत्त्वपूर्ण योगदान दिले.ऑस्ट्रेलियाकडून पहिल्या डावात मिचेल स्टार्कने ६, नॅथन लायनने २ तर कूपर कॉनोली आणि जोश हेझलवूडने प्रत्येकी १ बळी टिपला. कर्णधार पॅट कमिन्सला मात्र एकही विकेट मिळवता आली नाही.
दक्षिण आफ्रिकेच्या ३२९ धावांना उत्तर देताना ऑस्ट्रेलियन फलंदाजांनी दमदार फलंदाजी केली. जोश इंग्लिसचे शतक (१०२ धावा) आणि कॅमेरॉन ग्रीन (६५), ॲलेक्स कॅरी (८०), मॅट रेनशॉ (७४) यांच्या अर्धशतकी खेळीच्या जोरावर कांगारूंनी १२५.१ षटकांत ४२९ धावांचा डोंगर उभा केला. ट्रॅव्हिस हेडने ४१ आणि कूपर कॉनोलीने २९ धावांचे योगदान दिले. पहिल्या डावाच्या आधारे ऑस्ट्रेलियाने दक्षिण आफ्रिकेवर १०० धावांची महत्त्वपूर्ण आघाडी घेतली.आफ्रिकेकडून या डावात फिरकीपटू सायमन हार्मरने ४ तर मार्को यान्सेनने ३ बळी घेतले. कागिसो रबाडा, गेराल्ड कोएत्झी आणि वियान मुल्डर यांना प्रत्येकी १ विकेट मिळाली.
पहिल्या डावातील १०० धावांची पिछाडी भरून काढण्यासाठी मैदानात उतरलेल्या दक्षिण आफ्रिकेच्या दुसऱ्या डावात रायन रिकल्टन (१०१) आणि वियान मुल्डर (११५) यांनी शतके झळकावली, तर मार्कस एकरम्यानने ६० धावांची खेळी करत संघाला मजबूत स्थितीत पोहोचवले. कर्णधार टेंबा बावुमा (३५) आणि मॅथ्यू बीट्जके (४३) यांनीही मोलाची साथ दिली.दक्षिण आफ्रिकेने दुसऱ्या डावात १३४.४ षटकांत ३८७ धावा करत ऑस्ट्रेलियासमोर विजयासाठी २८८ धावांचे लक्ष्य ठेवून २८७ धावांची आघाडी घेतली. ऑस्ट्रेलियाकडून मिचेल स्टार्कने ३, पॅट कमिन्स आणि नॅथन लायनने प्रत्येकी २ बळी टिपले, तर जोश हेझलवूडला १ विकेट मिळाली.
केपटाऊनच्या मैदानावर २८८ धावांच्या आव्हानाचा पाठलाग करण्यासाठी उतरलेली ऑस्ट्रेलियन संघ अखेरच्या दिवशी शेवटच्या सत्रात अवघ्या १११ धावांत गडगडला. नॅथन लायनने सर्वाधिक ३३ धावांची लढाऊ खेळी केली. कॅमेरॉन ग्रीनने २७, पॅट कमिन्सने ११ आणि ट्रॅव्हिस हेडने १४ धावा केल्या. उर्वरित फलंदाजांना दुहेरी आकडाही गाठता आला नाही. दुसऱ्या डावात सायमन हार्मरने ६ तर कागिसो रबाडाने ३ बळी घेत कांगारूंच्या डावाला सुरुंग लावला, तर जोश इंग्लिस धावबाद झाला.
पहिल्या डावात ४ आणि दुसऱ्या डावात ६ अशा एकूण १० बळींची शानदार कामगिरी करत संघाच्या विजयात मोलाचा वाटा उचलणाऱ्या सायमन हार्मर यांना ‘प्लेयर ऑफ द मॅच’ घोषित करण्यात आले.: संपूर्ण मालिकेत १४६ धावा करत १० बळी टिपणाऱ्या अष्टपैलू मार्को यान्सेन हा ‘प्लेयर ऑफ द सीरीज’ ठरला.