अनधिकृत चार दिवसीय कसोटी सामना : तिसरा दिवस
भारत ‘अ’ संघाकडे 254 धावांनी भक्कम आघाडी
ऑस्ट्रेलियासमोर मोठे आव्हान ठेवण्याची संधी
अंतिम टप्प्यात खेळपट्टी फिरकीसाठी अनुकूल
ब्रिस्बेन : वृत्तसंस्था
सलामीवीर शेफाली वर्मा (52) आणि मधल्या फळीतील फलंदाज राघवी बिश्त (86) यांच्या अर्धशतकांच्या जोरावर भारताने ऑस्ट्रेलिया ‘अ’ संघाविरुद्ध अनधिकृत चार दिवसीय कसोटी सामन्याच्या तिसर्या दिवसअखेर 254 धावांची भक्कम आघाडी घेतली आहे. भारत ‘अ’ संघाने आपल्या पहिल्या डावात सर्वबाद 299 धावा जमवल्यानंतर ऑस्ट्रेलिया ‘अ’ संघाने सर्वबाद 305 धावा जमवत डावाअखेर 6 धावांची नाममात्र आघाडी घेतली. त्यानंतर भारत ‘अ’ ने आपल्या दुसर्या डावात 73 षटकांत 8 बाद 260 धावांपर्यंत मजल मारली आहे.
सलामीवीर शेफाली वर्मा (52) आणि मधल्या फळीतील फलंदाज राघवी बिश्त (86) यांच्या अर्धशतकांच्या जोरावर भारताने ऑस्ट्रेलिया ‘अ’ संघाविरुद्ध अनधिकृत चार दिवसीय कसोटी सामन्याच्या तिसर्या दिवसअखेर 254 धावांची भक्कम आघाडी घेतली आहे. भारत ‘अ’ संघाने आपल्या पहिल्या डावात सर्वबाद 299 धावा जमवल्यानंतर ऑस्ट्रेलिया ‘अ’ संघाने सर्वबाद 305 धावा जमवत डावाअखेर 6 धावांची नाममात्र आघाडी घेतली. त्यानंतर भारत ‘अ’ ने आपल्या दुसर्या डावात 73 षटकांत 8 बाद 260 धावांपर्यंत मजल मारली आहे.
शनिवारी, ऑस्ट्रेलियन ‘अ’ संघाने 5 बाद 158 धावसंख्येवरून पुढे खेळताना, सियाना जिंजरने भारतीय गोलंदाजांचा समर्थपणे सामना केला. तिला निकोल फाल्टमची (54) मोलाची साथ मिळाली. या दोघींनी सहाव्या गड्यासाठी 102 धावांची महत्त्वपूर्ण भागीदारी रचून संघाला केवळ संकटातून बाहेर काढले नाही, तर पहिल्या डावात 6 धावांची नाममात्र आघाडी मिळवून दिली. अखेर सायमा ठाकोरने (3/31) ही जोडी फोडत ऑस्ट्रेलियाचा डाव 305 धावांवर गुंडाळला.
त्यानंतर दुसर्या डावात फलंदाजीसाठी उतरलेल्या भारताला सलामीवीर शेफाली वर्माने आपल्या नेहमीच्या आक्रमक शैलीत सुरुवात करून दिली. तिने 52 धावांची वेगवान खेळी करत संघाचा पाया रचला. मात्र, शेफाली बाद झाल्यानंतर ऑफ स्पिनर एमी एडगरने (4/53) भारतीय मधल्या फळीला खिंडार पाडले. ठराविक अंतराने गडी बाद होत असल्याने भारतीय संघ काहीसा अडचणीत सापडला होता.
अशा परिस्थितीत राघवी बिश्तने एका बाजूने किल्ला लढवत संघाचा डाव सावरला. तिने आधी तनुश्री सरकारसोबत पाचव्या गड्यासाठी 68 धावांची निर्णायक भागीदारी केली, ज्यामुळे भारताची आघाडी वाढत गेली. बिश्तने संयम आणि आक्रमकता यांचा सुंदर मिलाफ साधत 119 चेंडूंत 86 धावांची अविस्मरणीय खेळी साकारली. दिवसाचा खेळ संपण्यास काही षटके शिल्लक असताना ती एडगरची शिकार ठरली, पण तोपर्यंत तिने संघाला सामन्यात मजबूत स्थितीत पोहोचवले होते.
तिसर्या दिवसाचा खेळ थांबला तेव्हा भारत ‘अ’ संघाने 8 गडी गमावून 260 धावा केल्या होत्या. सामन्याच्या शेवटच्या दिवशी आता भारतीय संघ आणखी काही धावांची भर घालून ऑस्ट्रेलियासमोर विजयासाठी मोठे आव्हान ठेवण्याचा प्रयत्न करेल. खेळपट्टी फिरकीला साथ देत असल्याने, ऑस्ट्रेलियाच्या फलंदाजांसाठी भारतीय फिरकी गोलंदाजांचा सामना करणे सोपे नसेल, असे चित्र आहे.
भारत ‘अ’ पहिला डाव : सर्वबाद 299
ऑस्ट्रेलिया ‘अ’ पहिला डाव : 76.2 षटकांत सर्वबाद 305 (सियाना जिंजर 103, निकोल फाल्टम 54; सायमा ठाकोर 3/31, राधा यादव 2/68).
भारत ‘अ’ दुसरा डाव : 73 षटकांत 8 बाद 260 (राघवी बिश्त 86, शेफाली वर्मा 52; एमी एडगर 4/53).
