गुवाहाटी : आयपीएल २०२६ च्या रणधुमाळीत नियमांचे उल्लंघन करणे राजस्थान रॉयल्सच्या टीम मॅनेजरला चांगलेच महागात पडले आहे. रॉयल चॅलेंजर्स बेंगळुरूविरुद्धच्या सामन्यादरम्यान डगआऊटमध्ये मोबाईल फोनचा वापर केल्याप्रकरणी भारतीय क्रिकेट नियामक मंडळाने (BCCI) राजस्थान रॉयल्सचे व्यवस्थापक रोमी भिंडर यांच्यावर कडक कारवाई करत १ लाख रुपयांचा दंड ठोठावला आहे.
गुवाहाटी येथील बरसापारा स्टेडियमवर राजस्थान रॉयल्स आणि रॉयल चॅलेंजर्स बेंगळुरू यांच्यात सामना पार पडला. या सामन्यादरम्यान रोमी भिंडर डगआऊटमध्ये बसून फोन वापरताना कॅमेऱ्यात कैद झाले होते. या घटनेचा व्हिडिओ सोशल मीडियावर व्हायरल झाल्यानंतर बीसीसीआयने याची गंभीर दखल घेतली. आयपीएलच्या भ्रष्टाचारविरोधी नियमांनुसार, 'पीएमओए' क्षेत्रात म्हणजेच डगआऊटमध्ये मोबाईल फोन वापरण्यास सक्त मनाई आहे. या नियमाचा भंग झाल्याचे स्पष्ट झाल्यामुळे बीसीसीआयने भिंडर यांना कारणे दाखवा नोटीस बजावली होती.
बीसीसीआयचे सचिव देवजीत सैकिया यांनी या कारवाईला दुजोरा दिला आहे. 'हिंदुस्तान टाइम्स'शी बोलताना त्यांनी स्पष्ट केले की, अँटी-करप्शन युनिट (ACSU) रोमी भिंडर यांनी दिलेल्या उत्तरावर समाधानी नाही. भिंडर यांनी प्रकृती अस्वास्थ्याचे कारण देत फोन वापरल्याचे स्पष्टीकरण दिले होते. नियमानुसार, संघ व्यवस्थापक ड्रेसिंग रूममध्ये फोन वापरू शकतात, मात्र डगआऊटमध्ये तो वापरणे प्रोटोकॉलचे उल्लंघन मानले जाते.
सैकिया यांनी पुढे सांगितले की, "रोमी भिंडर यांनी नियमांचे उल्लंघन केल्याचे चौकशीत समोर आले आहे. त्यांना आपली बाजू मांडण्यासाठी ४८ तासांचा वेळ देण्यात आला होता. परंतु, त्यांचे स्पष्टीकरण समाधानकारक नसल्याने त्यांना १ लाख रुपयांचा दंड करण्यात आला आहे. हे त्यांचे पहिलेच उल्लंघन असल्याने त्यांना केवळ आर्थिक दंड आणि ताकीद देऊन सोडण्यात आले आहे, अन्यथा त्यांच्यावर बंदीची कारवाई देखील होऊ शकली असती."
खेळाची विश्वासार्हता आणि सुरक्षा जपण्यासाठी बीसीसीआयने हे पाऊल उचलले आहे. "या घटनेतून इतर सर्व संघ आणि संबंधित पदाधिकाऱ्यांनी धडा घ्यावा. खेळावर कोणताही विपरीत परिणाम होऊ नये, यासाठी सर्वांनी मार्गदर्शक तत्त्वांचे काटेकोरपणे पालन करावे," असे आवाहनही सैकिया यांनी केले आहे.
या वादानंतर आता राजस्थान रॉयल्सचा संघ मैदानातील कामगिरीवर लक्ष केंद्रित करत आहे. राजस्थानचा पुढील सामना १९ एप्रिल रोजी कोलकाता येथील ऐतिहासिक ईडन गार्डन्स मैदानावर कोलकाता नाईट रायडर्सविरुद्ध होणार असून, विजयाचा मार्ग पुन्हा शोधण्याचे आव्हान त्यांच्यासमोर असेल.
