Azhar Mahmood
पाकिस्तानी संघाला कसोटी क्रिकेटमध्ये नवीन प्रशिक्षक मिळाला आहे. पाकिस्तान क्रिकेट बोर्डाने (पीसीबी) सोमवारी माजी अष्टपैलू खेळाडू आणि राष्ट्रीय संघाचे सहाय्यक प्रशिक्षक अझहर महमूद यांची कसोटी संघाचे कार्यकारी मुख्य प्रशिक्षक म्हणून नियुक्ती केली. त्यांनी आकिब जावेद यांची जागा घेतली आहे. महमूद यांनी संघाचे गोलंदाजी प्रशिक्षक आणि सहाय्यक मुख्य प्रशिक्षक म्हणून खूप काळ काम केले आहे.
डिसेंबर २०२४ मध्ये जेसन गिलेस्पी यांनी राजीनामा दिल्यापासून पाकिस्तानच्या कसोटी संघासाठी पूर्णवेळ मुख्य प्रशिक्षक नाही. त्यानंतर आकिब जावेद यांनी दक्षिण आफ्रिकेच्या दोन कसोटी सामन्यांच्या दौऱ्यासाठी आणि वेस्ट इंडिजविरुद्धच्या दोन कसोटी सामन्यांच्या मालिकेसाठी अंतरिम पदभार स्वीकारला होता. २०२४ च्या सुरुवातीला पाकिस्तानच्या न्यूझीलंड दौऱ्यापूर्वी अंतरिम आधारावर नियुक्ती झाल्यापासून अझहर राष्ट्रीय संघाचे सहाय्यक प्रशिक्षक होते. १९९६ पासून २० वर्षांच्या कालावधीत १४३ एकदिवसीय आणि २१ कसोटी सामन्यांमध्ये त्यांनी पाकिस्तानचे प्रतिनिधित्व केले. त्यांनी १६२ आंतरराष्ट्रीय विकेट्स आणि तीन शतके घेऊन निवृत्ती घेतली.
अझहर महमूद यांच्या समोर पहिले मोठे आव्हान म्हणजे यावर्षी ऑक्टोबरमध्ये पाकिस्तानमध्ये होणारी दक्षिण आफ्रिकेविरुद्ध दोन कसोटी सामन्यांची मालिका असेल. पीसीबीने आपल्या निवेदनात म्हटले आहे, “अझहर महमूद या पदावर मोठ्या अनुभवासह पाऊल ठेवत आहेत. राष्ट्रीय संघाचे सहाय्यक मुख्य प्रशिक्षक म्हणून त्यांनी दीर्घकाळ संघाच्या रणनीतीमध्ये महत्त्वाची भूमिका बजावली आहे. खेळातील त्यांचे सखोल ज्ञान आणि आंतरराष्ट्रीय अनुभवामुळे ते या पदासाठी अत्यंत योग्य आहेत.”
