सँटियागो (चिली) : एफआयएच ज्युनिअर महिला हॉकी विश्वचषकातील 9 ते 16 क्रमांकासाठी झालेल्या पात्रता सामन्यात भारतीय ज्युनिअर महिला हॉकी संघाने वेल्सवर 3-1 असा प्रभावी विजय नोंदविला. सँटियागो येथे सोमवारी झालेल्या या सामन्यात भारताकडून हिना बानो (14’), सुनिलिता टोप्पो (24’) आणि इशिका (31’) यांनी गोल केले, तर वेल्सकडून एलोइस मोआत (52’) हिने एकमेव गोल केला.
सामन्याच्या पहिल्याच 30 सेकंदांत पेनल्टी कॉर्नर मिळवत भारताने आक्रमक सुरुवात केली. सातत्याने संधी निर्माण करत खेळावर वर्चस्व मिळवण्याचा प्रयत्न भारतीय संघ करत होता; मात्र सुरुवातीला गोल करता आला नाही. वेल्सला पेनल्टी स्ट्रोकची संधी मिळाली होती. पण, भारतीय गोलरक्षक निधीने चतुराईने बचाव करत त्यांना रोखले. अखेरीस पहिल्या सत्राच्या शेवटी साक्षी राणाच्या कौशल्यपूर्ण खेळावर हिना बानोने (14’) सहज गोल करत भारताला आघाडी मिळवून दिली.
दुसऱ्या सत्राच्या सुरुवातीला सुनिलिता टोप्पोने (24’) जवळून अचूक फायदा घेत भारताला 2-0 अशी आघाडी मिळवून दिली. पहिल्या अर्ध्यात भारताने 14 वेळा वर्तुळात शिरकाव करत वर्चस्व गाजवले आणि हाफटाईमनंतर 2-0 अशी भक्कम आघाडी घेतली. तिसऱ्या सत्राच्या सुरुवातीला वेल्सच्या गोलरक्षकाच्या बचावातून उडालेला चेंडू इशिकाला (31’) मिळाला आणि तिने सहज गोल करत भारताला 3-0 अशी आघाडी दिली. ज्योती सिंह यांच्या मार्गदर्शनाखाली भारतीय संघाने खेळाचा वेग आणि लय नियंत्रित ठेवत वेल्सच्या बचावफळीला सतत दडपणाखाली ठेवले.
शेवटच्या सत्रातही भारताने चेंडूवरील पकड कायम ठेवत आणखी गोल करण्याच्या संधी शोधल्या. तथापि, वेल्सने एका प्रतिआक्रमणाची संधी निर्माण केली आणि एलोइस मोआतने (52’) गोल करत संघाचे खाते उघडले. मात्र हा गोल वेल्ससाठी एकमेव ठरला. त्यानंतर भारताने 3-1 विजयावर शिक्कामोर्तब केले. भारताचा पुढील सामना 9 डिसेंबर रोजी उरुग्वेविरुद्ध होणार आहे.
