अटलांटा; वृत्तसंस्था : वादग्रस्त रेड कार्डमुळे १८ मिनिटे १० खेळाडूनिशी खेळण्याची नामुष्की, प्रतिकूल वातावरण, प्रतिकूल परिस्थिती...पण, स्वित्झर्लंडचे इरादे बुलंद होते....अगदी सामना जादा वेळेपर्यंत रेटून नेण्यातही त्यांनी यश मिळवलेले....पण, अतिरिक्त वेळेत अर्जेंटिनाच्या ज्युलियन अल्वारेझचा २५ यार्डावरून बुलेटसारखा सुसाट स्टनर सुटला आणि त्याने सार्याच समीकरणांची उलथापालथ करून टाकली. या स्टनरने गोलजाळे तर भेदलेच, शिवाय, डोकेदुखी ठरणारी स्वित्झर्लंडची चिरेबंदी देखील शब्दश: उद्ध्वस्त केली. या सुपर स्टनर गोलनेच रविवारी अर्जेंटिनाच्या विजयाची दास्ताँ लिहिली!
१० खेळाडूंसह खेळणाऱ्या स्वित्झर्लंडचा ३-१ असा पराभव
ज्युलियन अल्वारेझने अतिरिक्त वेळेत केलेल्या एका प्रेक्षणीय गोलच्या जोरावर गतविजेत्या अर्जेंटिनाने १० खेळाडूंसह खेळणाऱ्या स्वित्झर्लंडचा ३-१ असा पराभव केला. या रोमहर्षक विजयासह अर्जेंटिनाने फिफा विश्वचषकाच्या उपांत्य फेरीत धडक मारली. आता अंतिम फेरीत पोहोचण्यासाठी त्यांचा सामना पारंपरिक प्रतिस्पर्धी इंग्लंडविरुद्ध होईल. १० व्या मिनिटालाच लिओनेल मेस्सीच्या उत्कृष्ट कॉर्नर पासवर अलेक्सिस मॅक अलिस्टरने हेडरद्वारे सुरेख गोल करत अर्जेंटिनाला १-० अशी आघाडी मिळवून दिली. उत्तरार्धात स्वित्झर्लंडच्या दबावाला यश आले. डॅन न्डोयेने रिकार्डो रॉड्रिग्जच्या पासवर एका कठीण कोनातून गोल करत सामन्यात १-१ अशी बरोबरी साधून दिली. अतिरिक्त वेळेत ज्युलियन अल्वारेझने २५ यार्डांवरून मारलेला एक अद्भुत शॉट थेट गोलपोस्टच्या वरच्या कोपऱ्यात गेला आणि अर्जेंटिनाला २-१ अशी आघाडी मिळाली. सामन्याच्या शेवटच्या क्षणांमध्ये लॉतारे मार्टिनेझने आणखी एक गोल करत अर्जेंटिनाचा ३-१ असा विजय निश्चित केला.
व्हीएआरचा वादग्रस्त निर्णय
स्वित्झर्लंडच्या ब्रील एम्बोलोला मिळालेले रेड कार्ड वादग्रस्त ठरले. सुरुवातीला पंचांनी अर्जेंटिनाच्या लिएँड्रो परेडेसला फाऊलसाठी पिवळे कार्ड दाखवले होते. परंतु, ‘मिस्टेकन आयडेंटिटी’ नियमांतर्गत व्हीएआरने पुनरावलोकन सुचवले. रेफ्री जोआओ पिनहेरो यांनी निर्णय बदलून एम्बोलोने ‘सिम्युलेशन’ (खोटा फाऊल दाखवणे) केल्याचे स्पष्ट केले आणि त्याला दुसरे पिवळे म्हणजेच रेड कार्ड देऊन मैदानाबाहेर काढले. हा निर्णय स्वित्झर्लंडसाठी घातक ठरला.
ज्युलियन अल्वारेझचा ‘सुपर स्टनर’ गोल
स्वित्झर्लंडने १० खेळाडूंसह खेळतानाही अर्जेंटिनाला ९० मिनिटांपर्यंत १-१ असे रोखून धरले होते. परंतु, अतिरिक्त वेळेत ज्युलियन अल्वारेझने २५ यार्डांवरून मारलेला गोल इतका अप्रतिम होता की, त्याने सामन्याचे पारडे पूर्णपणे अर्जेंटिनाच्या बाजूने झुकवले.
२४ वर्षांनंतरचा ‘ब्लॉकबस्टर’
फुटबॉल विश्वात अर्जेंटिना आणि इंग्लंड यांच्यातील मैदानी वैर जगप्रसिद्ध आहे. या विजयामुळे आता हे दोन्ही संघ तब्बल २४ वर्षांनंतर पहिल्यांदाच एखाद्या प्रमुख आंतरराष्ट्रीय स्पर्धात्मक सामन्यात एकमेकांसमोर येणार आहेत. त्यामुळे हा सामना ‘ब्लॉकबस्टर’ ठरू शकतो.
