गुवाहाटी : सध्या संपूर्ण देशभरात इंडियन प्रीमियर लीगचा (IPL 2026) थरार पाहायला मिळत आहे. आयपीएलचा अंतिम सामना ३१ मे रोजी खेळवला जाणार असून, त्यानंतर लगेचच भारतीय संघ आंतरराष्ट्रीय क्रिकेटच्या मैदानात उतरणार आहे. भारतीय संघ जून महिन्यामध्ये अफगाणिस्तानविरुद्ध कसोटी आणि एकदिवसीय (ODI) मालिका खेळणार असून, या दौऱ्यासाठी आज भारतीय संघाची घोषणा करण्यात आली आहे.
भारतीय क्रिकेट नियामक मंडळ (BCCI) जून महिन्यात अफगाणिस्तान क्रिकेट संघाचे यजमानपद भूषवणार आहे. या दौऱ्यात दोन्ही देशांदरम्यान एक एकमेव कसोटी सामना आणि ३ सामन्यांची एकदिवसीय मालिका खेळवली जाईल. या पार्श्वभूमीवर, १९ मे रोजी गुवाहाटी येथे मुख्य निवड समितीची एक महत्त्वाची बैठक पार पडली, ज्यामध्ये कसोटी आणि एकदिवसीय अशा दोन्ही मालिकांसाठी भारतीय संघाची निवड करण्यात आली. दोन्ही देशांमधील एकमेव कसोटी सामन्याला ६ जूनपासून मुल्लांपुर येथे सुरुवात होणार असून, या सामन्यासाठी १४ सदस्यीय भारतीय संघाची घोषणा करण्यात आली आहे.
विशेष म्हणजे, २०१८ नंतर अफगाणिस्तानचा संघ भारतामध्ये पहिलीच कसोटी खेळणार आहे. २०१८ मध्ये अफगाणिस्तानने बंगळुरू येथील एम. चिन्नास्वामी स्टेडियमवर भारताच्या विरोधातच आपल्या कसोटी कारकिर्दीची अधिकृत सुरुवात केली होती. भारताने तो सामना एक डाव आणि २६२ धावांनी मोठ्या फरकाने जिंकला होता.
अफगाणिस्तानविरुद्धच्या एकदिवसीय मालिकेसाठी १५ खेळाडूंचा संघ निवडण्यात आला असून, यामध्ये अनुभवी फलंदाज विराट कोहली आणि रोहित शर्मा यांचे स्थान कायम ठेवण्यात आले आहे. मात्र, या एकदिवसीय मालिकेतून यष्टिरक्षक फलंदाज ऋषभ पंतला बाहेरचा रस्ता दाखवण्यात आला आहे. दुसरीकडे, कसोटी संघाच्या उपकर्णधारपदाची धुरा के. एल. राहुलकडे सोपवण्यात आली आहे. यापूर्वी कसोटी संघाचे उपकर्णधारपद पंतकडे होते; परंतु उपकर्णधारपद गेले असले तरी पंत कसोटी संघात आपले स्थान राखण्यात यशस्वी ठरला आहे. वेगवान गोलंदाज मोहम्मद शमीला या मालिकेतही डावलण्यात आले आहे. निवड समितीचे अध्यक्ष अजित आगरकर यांनी स्पष्ट केले की, निवड समितीच्या बैठकीत मोहम्मद शमीच्या नावावर कोणतीही चर्चा झाली नाही.
भारताचा प्रमुख वेगवान गोलंदाज जसप्रीत बुमराहला आगामी इंग्लंड दौऱ्याच्या पार्श्वभूमीवर आणि वर्कलोड मॅनेजमेंटचा (कामाचा ताण) विचार करून या संपूर्ण मालिकेतून विश्रांती देण्यात आली आहे. दरम्यान, निवड समितीने दोन्ही संघांमध्ये काही नव्या दमाच्या युवा खेळाडूंना संधी दिली आहे. यामध्ये मानव सुथार, हर्ष दुबे, गुरनूर बराड आणि प्रिन्स यादव यांचा समावेश आहे. मानव सुथारची पहिल्यांदाच कसोटी संघात निवड झाली आहे, तर गुरनूर बराड आणि हर्ष दुबे या दोघांनी कसोटी व एकदिवसीय अशा दोन्ही संघांमध्ये स्थान मिळवले आहे. तसेच, प्रिन्स यादवचा पहिल्यांदाच एकदिवसीय संघात समावेश करण्यात आला आहे.
६ जून: एकमेव कसोटी सामना, न्यू चंदीगड (सकाळी ९:३० वाजता)
१४ जून: पहिली एकदिवसीय मॅच, धरमशाळा (दुपारी १:३० वाजता)
१७ जून: दुसरी एकदिवसीय मॅच, लखनऊ (दुपारी १:३० वाजता)
२० जून: तिसरी एकदिवसीय मॅच, चेन्नई (दुपारी १:३० वाजता)
शुभमन गिल (कर्णधार), यशस्वी जयस्वाल, के. एल. राहुल (उपकर्णधार), साई सुदर्शन, ऋषभ पंत, देवदत्त पडिक्कल, वॉशिंग्टन सुंदर, कुलदीप यादव, मोहम्मद सिराज, प्रसिद्ध कृष्णा, मानव सुथार, गुरनूर बराड, हर्ष दुबे, ध्रुव जुरेल.
शुभमन गिल (कर्णधार), रोहित शर्मा, विराट कोहली, श्रेयस अय्यर, के. एल. राहुल, इशान किशन, हार्दिक पंड्या, नितीश रेड्डी, वॉशिंग्टन सुंदर, कुलदीप यादव, अर्शदीप सिंह, प्रसिद्ध कृष्णा, प्रिन्स यादव, गुरनूर बराड, हर्ष दुबे.
