मुंबई : भारतीय क्रिकेट संघासाठी न्यूझीलंडविरुद्धच्या एकदिवसीय मालिकेपूर्वी एक अत्यंत दिलासादायक बातमी समोर आली आहे. संघाचा धडाकेबाज फलंदाज आणि उपकर्णधार श्रेयस अय्यर पूर्णपणे तंदुरुस्त असल्याचे घोषित करण्यात आले असून, तो आता चौथ्या क्रमांकावर पुन्हा एकदा फलंदाजीसाठी सज्ज झाला आहे.
ऑक्टोबर महिन्यात ऑस्ट्रेलिया दौऱ्यादरम्यान श्रेयसच्या छातीला गंभीर दुखापत झाली होती, ज्यामुळे त्याला अंतर्गत रक्तस्रावाचाही सामना करावा लागला. या दुखापतीमुळे तो गेल्या काही महिन्यांपासून आंतरराष्ट्रीय क्रिकेटपासून दूर होता.
वृत्तानुसार, बेंगळुरू येथील 'सेंटर ऑफ एक्सलन्स' (COE) मधील वैद्यकीय पथकाने श्रेयसला फिट घोषित केले आहे. श्रेयसने नुकत्याच झालेल्या विजय हजारे करंडकातील हिमाचल प्रदेशविरुद्धच्या सामन्यात मुंबईचे नेतृत्व करताना आपली तंदुरुस्ती सिद्ध केली. या महत्त्वपूर्ण सामन्यात त्याने केवळ ८२ धावांची झंझावाती खेळीच केली नाही, तर आपल्या संघाला विजय मिळवून देण्यात मोलाची भूमिका बजावली.
सिडनी येथे ऑस्ट्रेलियाविरुद्धच्या तिसऱ्या एकदिवसीय सामन्यात झालेल्या दुखापतीमुळे श्रेयसला प्रदीर्घ काळ पुनर्वसनाच्या प्रक्रियेतून जावे लागले. या दीर्घ विश्रांतीनंतर त्याने घरगुती क्रिकेटमध्ये मुंबईकडून खेळताना दमदार पुनरागमन केले. संघ व्यवस्थापनाने त्याच्या नेतृत्वगुणांवर विश्वास दाखवत त्याच्याकडे कर्णधारपद सोपवले होते, ज्याला त्याने पूर्ण न्याय दिला.
न्यूझीलंड मालिकेसाठी भारतीय संघात श्रेयसची उपकर्णधार म्हणून निवड करण्यात आली होती, मात्र त्याचे खेळणे हे तंदुरुस्तीवर अवलंबून होते. बीसीसीआयने स्पष्ट केले होते की, ‘‘श्रेयसची उपलब्धता ही 'सीओई'च्या फिटनेस क्लिअरन्सवर आधारित असेल.’’ विजय हजारे करंडकात ५३ चेंडूत १० चौकार आणि ३ षटकारांच्या मदतीने केलेल्या ८२ धावांच्या खेळीने त्याने आपल्या तंदुरुस्तीबाबतचे सर्व संभ्रम दूर केले आहेत.
न्यूझीलंडविरुद्धच्या मालिकेत श्रेयस अय्यर चौथ्या क्रमांकावर फलंदाजीला येईल. त्याच्या अनुपस्थितीत दक्षिण आफ्रिकेविरुद्धच्या मालिकेत ऋतुराज गायकवाडने या क्रमांकाची जबाबदारी सांभाळली होती.
श्रेयससोबतच सलामीवीर शुभमन गिल देखील मानेच्या दुखापतीतून सावरून संघात परतणार आहे. शुभमनच्या पुनरागमनामुळे सलामीच्या जोडीत बदल होऊ शकतो, परिणामी यशस्वी जैस्वालला पुन्हा एकदा राखीव खेळाडूंच्या बाकावर बसावे लागण्याची शक्यता आहे.
