Shreyas Iyer Defends Batters, Says Nobody Played a Bad Shot
वेलिंग्टन : भारत आणि न्यूझीलंड यांच्यात सुरू असलेल्या पाच सामन्यांच्या एकदिवसीय मालिकेतील चौथा सामना माउंट माउंगानुई येथील बे ओव्हल स्टेडियमवर पार पडला. यजमान किवी संघाने हा सामना तब्बल २४४ धावांच्या मोठ्या फरकाने एकतर्फी जिंकत मालिकेत दमदार पुनरागमन केले आहे.
या मालिकेतील सुरुवातीचे दोन्ही सामने भारतीय संघाने जिंकले होते, तर तिसरा सामना पावसामुळे रद्द झाला होता. त्यामुळे या पराभवानंतरही टीम इंडिया मालिकेत २-१ ने आघाडीवर आहे. चौथ्या सामन्यात भारतीय संघाच्या कर्णधारपदाची धुरा सांभाळणाऱ्या श्रेयस अय्यरसाठी ही लढत एखाद्या वाईट स्वप्नापेक्षा कमी नव्हती. या दारुण पराभवानंतर भारतीय फलंदाजांच्या कामगिरीवर चोहोबाजूंनी टीका होत असताना, कर्णधार अय्यरने मात्र आपल्या सहकाऱ्यांची जोरदार पाठराखण केली आहे. कोणत्याही फलंदाजाने बेजबाबदार किंवा खराब फटका मारून आपली विकेट गमावली नाही, असे स्पष्ट मत त्याने व्यक्त केले.
माउंट माउंगानुई येथील पराभवानंतर प्रसारकांशी बोलताना भारतीय कर्णधार श्रेयस अय्यर म्हणाला की, पहिल्या आणि दुसऱ्या डावातील खेळपट्टीच्या स्वभावात खूप मोठा फरक जाणवला. मात्र, मॅट हेन्रीचे कौतुक करायलाच हवे, त्याने पहिल्याच चेंडूपासून अचूक टप्प्यावर अप्रतिम गोलंदाजी केली. पहिल्या डावात आम्ही गोलंदाजीतील सर्व पर्याय आजमावून पाहिले होते. किवी फलंदाज चेंडूच्या उसळीचा उत्तम वापर करत फटकेबाजी करत होते. त्यांनी ३३० हून अधिक धावा उभारल्यामुळे आम्हाला ही खेळपट्टी फलंदाजीसाठी अत्यंत पोषक असल्याचे वाटले होते. अर्थात, आमच्याकडून काही झेलही सुटले, पण क्रिकेटच्या खेळात अशा गोष्टी घडत असतात.
फलंदाजांच्या सुमार कामगिरीचे समर्थन करताना अय्यर पुढे म्हणाला की, ड्रेसिंग रूममध्ये आम्हाला हे आव्हान सहज पार करता येईल, असा आत्मविश्वास होता. परंतु, दुसऱ्या डावात चेंडू ज्या प्रकारे आत आणि बाहेर वळत (सीम) होता, ते पाहता नेमके कसे खेळावे हे ठरवणे फलंदाजांसाठी अत्यंत कठीण झाले होते. फलंदाज बाद होण्याची पद्धत पाहिली, तर कोणीही खराब फटका खेळून विकेट गमावलेली नाही; किवी गोलंदाजांनी टाकलेले ते सर्वच चेंडू अत्यंत दर्जेदार होते. आता हा पराभव मागे टाकून पुढील सामन्यापूर्वी गोलंदाजी आणि फलंदाजीतील चुकांचा आढावा घेणे गरजेचे आहे. आपण मालिकेतील पहिले दोन सामने जिंकले आहेत, हे विसरून चालणार नाही. त्यामुळे त्या विजयांतून प्रेरणा घेऊन पुढील सामन्यात नव्या उमेदीने आणि सकारात्मक विचारांसह मैदानात उतरू, असा विश्वासही त्याने व्यक्त केला.