फलंदाजी व गोलंदाजी या दोन्ही आघाड्यांवर उत्तम वर्चस्व गाजवणार्या भारताने आशिया चषक टी20 स्पर्धेतील दुसर्या सुपर4 लढतीत बांगलादेशचा 41 धावांनी धुव्वा उडवला आणि यासह स्पर्धेच्या अंतिम फेरीत जोरदार धडक मारली. प्रारंभी, बांगलादेशने भारताला बिनबाद 77 वरुन 6 बाद 168 धावांवर रोखून धरण्यात मोठे यश मिळवले. मात्र, ही धावसंख्याही त्यांच्यासाठी आवाक्याबाहेरील ठरली. त्यांना 19.3 षटकात सर्वबाद 127 धावांवरच गाशा गुंडाळावा लागला.
भारतीय संघातर्फे कुलदीप यादवने 18 धावात 3 तर बुमराह व चक्रवर्ती यांनी प्रत्येकी 2 विकेटस घेतले. अक्षर व तिलक यांनाही प्रत्येकी एक बळी मिळाला. तिलकने रहमानला पटेलकरवी झेलबाद केले आणि येथेच भारताच्या धडाकेबाज विजयावर शिक्कामोर्तब झाले.
विजयासाठी 169 धावांचे आव्हान असताना बांगलादेशची सुरुवात खराब झाली. दुसरा सलामीवीर तंजिद हसन बुमराहच्या गोलंदाजीवर दुबेकडे झेल देत अवघ्या एका धावेवर तंबूत परतला तर परवेझ होसेनला 21 धावांवर कुलदीप यादवने बाद केले. कुलदीपच्या चेंडूवर उत्तुंग फटका मारण्याच्या प्रयत्नात परवेझने डीप मिडविकेटवरील अभिषेककडे सोपा झेल दिला. कुलदीपने या लढतीत देखील संघाला ब्रेकथ्रू मिळवून देण्याची परंपरा कायम राखली.
सैफ हसनने सातत्याने धावफलक हलता ठेवत दडपण दूर करण्यावर भर दिला. मात्र, तौहिद हृदोय देखील केवळ 7 धावांवर बाद झाल्याने बांगलादेशला आणखी एक धक्का बसला. तौहिद बाद झाला, त्यावेळी बांगलादेशची 9.4 षटकात 3 बाद 65 अशी स्थिती होती. नंतर वरुण चक्रवर्तीने शमिम होसेनला बाद करत आणखी एक धक्का दिला. जाकर अली, सैफुद्दीन व रिषाद हे देखील लागोपाठ अंतराने बाद झाले आणि यामुळे पाहता पाहता बांगलादेशची 7 बाद 112 अशी पडझड झाली.
सकिब आठव्या गड्याच्या रुपाने बाद झाल्यानंतर एक बाजून लावून धरत 69 धावा झोडपणारा सैफ हसन 18 व्या षटकात बुमराहचे सावज ठरला.
भारताला उत्तम प्रारंभानंतरही केवळ 168 धावांवर रोखून धरणारा बांगलादेशचा संघ गोलंदाजीनंतर फ लंदाजीतही असाच करिष्मा साकारणार का, अशी साशंकता काही काळापुरती जरुर निर्माण झाली होती. पण, पहिल्या 65 धावातच 3 गडी गमावल्यानंतर यातून हा संघ सावरु शकला नाही आणि यानंतर भारताने सहज बाजी मारली.
कित्येक जीवदाने मिळालेल्या सलामवीर सैफ हसनने या लढतीत 51 चेंडूत 69 धावांची आतषबाजी करत भारतावर सातत्याने दडपण राखले होते. त्याच्या या अर्धशतकी खेळीत 3 चौकार व 5 उत्तुंग षटकारांचा समावेश होता. एकीकडे ठरावीक अंतराने गडी बाद होत असताना सैफने मात्र या लढतीत आपल्या एकाकी प्रतिकाराने वेगळाच रंग भरला. पण, नंतर बुमराहच्या गोलंदाजीवर उत्तुंग फटका मारण्याच्या प्रयत्नात त्याने लाँगऑनवर तैनात पटेलकडे सोपा झेल दिला आणि इथेच त्याच्यासह बांगलादेशची झुंज देखील जवळपास संपुष्टात आली!
या स्पर्धेत भारताचा प्रतिस्पर्धी पाकिस्तान किंवा बांगलादेश यांच्यापैकी एक असणार असून त्याचा फैसलाही आजच होईल. आज हेच दोन्ही संघ आपल्या शेवटच्या साखळी फेरीत आमनेसामने येणार असून यातील विजेता संघ फायनलमध्ये भारताविरुद्ध आव्हान उभे करेल. या स्पर्धेत भारताचा शेवटचा साखळी सामना उद्या दि. 26 श्रीलंकेविरुद्ध होईल. पण, लंकेचे स्पर्धेतील आव्हान यापूर्वीच संपुष्टात आले आहे.
बुमराहने सैफ हसनचा अडसर दूर केला. अक्षरने अप्रतिम झेल पकडला. सैफ हसनने बुमराहवर हल्ला करण्याचा प्रयत्न केला आणि चेंडू लाँग-ऑनच्या दिशेने खूप उंच हवेत मारला. तो एक उंच उडालेला चेंडू होता आणि अक्षरने पहिल्या प्रयत्नात तो सोडला, पण दुसऱ्या प्रयत्नात पकडला. यासह, भारत आशिया कपच्या अंतिम फेरीत स्थान निश्चित करण्यापासून फक्त एक विकेट दूर आहे. सैफ हसनने ६९(५१) धावा केल्या.
कुलदीप यादवने तन्झीम हसन साकिबला क्लिन बोल्ड केले. कुलदीपने सलग दोन चेंडूंवर दोन विकेट्स घेतल्या. हा गुगली चेंडू होता. तन्झीम हसन साकिबने जोरदार फटका मारण्याचा प्रयत्न केला पण तो चुकला. आणि चेंडू स्टंपवर आदळला. हसनला खातेही उघडता आले नाही.
कुलदीप यादवने रिशद होसेन याला बाद केले. तिलक वर्माने झेल घेतला. मधल्या आणि लेग स्टंपच्या दिशेने टाकलेला चेंडू रिशद होसेनने स्लॉगस्वीप करण्याचा प्रयत्न केला. चेंडू बॅटला नीट लागला नाही आणि तिलक वर्माने पुन्हा एकदा एक सुरक्षित झेल घेतला. त्याने डीप मिड-विकेटजवळ हा झेल पकडला आणि बांगलादेशची सातवी विकेट पडली आहे. कुलदीपचा हा दुसरा बळी आहे. रिशद होसेनने २(३) धावा केल्या.
वरुण चक्रवर्तीने सैफुद्दीनला बाद केले. तिलक वर्माने झेल पकडला. चेंडू ऑफच्या दिशेने थोडासा कमी लांबीचा होता आणि सैफुद्दीनने त्याला हवेत मारण्याचा प्रयत्न केला. त्याने तो चेंडू लाँग-ऑनच्या दिशेने उंचावून मारला आणि डीपमध्ये उभ्या असलेल्या तिलक वर्माने कोणतीही चूक न करता तो सहज झेल पकडला. हा एक सुरक्षित झेल होता, आणि यासह बांगलादेशने त्यांची सहावी विकेट गमावली. सैफुद्दीनने ४(७) धावा केल्या.
जाकेर अली धावबाद झाला. हा बांगलादेशसाठी पाचवा धक्का आहे. सैफ हसनने चेंडूला कव्हरच्या समोर हलक्या हाताने टॅप केले आणि एक जलद धाव घेण्यासाठी जाकेर अलीला कॉल केला. जाकेर अली लगेचच धावला, पण सूर्यकुमार यादवने चेंडू पकडला आणि चपळाईने पुढे झेप घेऊन यष्टिरक्षकाच्या दिशेने थेट थ्रो मारला. फलंदाजाने डाईव्ह मारली, पण तो क्रिजमध्ये पोहचू शकला नाही. जाकेर अली ४(५) धावांवर बाद झाला.
वरुण चक्रवर्ती शमीम होसेन याचा त्रिफळा उडाला. होसेनने स्टंप ओपन कसून सरळ आलेल्या चेंडूला फटकावण्याचा प्रयत्न केला. बांगलादेशने एकापाठोपाठ एक विकेट गमावल्यामुळे ते आता सामन्यातून बाजूला होत आहेत. शमीम होसेनला खातेही उघदता आले नाही.
अक्षर पटेलने तौहिद हृदोयची विकेट घेतली. अभिषेक शर्माने झेल घेतला. अक्षरने लेग स्टंपच्या दिशेने टाकलेला चेंडू तौहिदने मोठा फटका मारण्यासाठी पुढे सरकत मारला, परंतु चेंडू बॅटच्या मधोमध न लागता चुकीच्या पद्धतीने लाँग-ऑनच्या दिशेने गेला आणि तिथे उभ्या असलेल्या क्षेत्ररक्षकाने हवेत उडालेला तो झेल पकडला. तौहिद हृदोयला या सामन्यात प्रभाव पाडता आला नाही. त्याने केलेला हा फटका खूपच बेजबाबदार होता, कारण त्याच षटकात एक षटकार मारला असतानाही तो पुन्हा मोठा फटका मारण्याचा प्रयत्न करत होता. या विकेटसह ड्रिंक्स ब्रेक घेण्यात आला आहे. तौहिद हृदोयने ७(१०) धावा केल्या.
कुलदीप यादवने गोलंदाजीला यतील भारताला दुसरी विकेट मिळवून दिली. त्याने परवेझ होसेन इमॉनचा अडसर दूर केला. अभिषेक शर्माने त्याचा झेल घेतला. कुलदीपने आपल्या दुसऱ्याच चेंडूवर बळी घेतला. परवेझने स्वीप शॉट मारून धावा मिळवल्या होत्या, पण त्याच शॉटमुळे तो बादही झाला. कुलदीपने चतुराईने चेंडूची लांबी मागे खेचली आणि परवेझला स्वीपवर पूर्ण नियंत्रण ठेवता आले नाही. चेंडू बॅटच्या वरच्या कडेला लागून हवेत उडाला आणि अभिषेकने डीप स्क्वेअर लेगजवळ सहजपणे झेल पकडला. परवेझ इमॉनने २१(१९) धावा केल्या.
पहिले षटक हार्दिक पंड्याने टाकल्यानंतर जसप्रीत बुमराह दुसरे षटक टाकण्यासाठी आला. त्याने दुस-याच चेंडूवर भारताला पहिली विकेट मिळवून दिली. तन्झीद हसनच्या रुपात बांगलादेशला पहिल झटका बसला. त्याचा झेल शिवम दुबेने घेतला. हा एक सोपा झेल होता. १३५.६ किमी/तास वेगाने टाकलेला, चांगल्या लांबीचा चेंडू तन्झीद हसनने बॅटच्या कडेला लागला आणि चेंडू वर गेला. दुबेने मिड-ऑनजवळ जाऊन तो सोपा झेल पकडला. तन्झीद हसनने १(३) धाव केली.
भारताने बांगलादेशसमोर १६९ धावांचे लक्ष्य ठेवले. बांगलादेशचा कर्णधार झाकीर अली याने टॉस जिंकून भारताला प्रथम फलंदाजीसाठी आमंत्रित केले. अभिषेक शर्मा आणि शुभमन गिल यांनी पहिल्या विकेटसाठी ७७ धावांची भागीदारी करत संघाला चांगली सुरुवात करून दिली. त्यानंतर, भारताच्या फलंदाजी संघाला चांगली कामगिरी करता आली नाही. अभिषेक ३७ चेंडूत ७५ धावांवर बाद झाला आणि गिल २९ धावा करून पॅव्हेलियनमध्ये परतला. दरम्यान, हार्दिक पंड्याने २९ चेंडूत ३८ धावा केल्या. बांगलादेशकडून रिशाद हुसेनने दोन बळी घेतले, तर तन्झीह हसन सकीब, मुस्तफिजुर रहमान आणि मोहम्मद सैफुद्दीन यांनी प्रत्येकी एक बळी घेतला.
तन्झीम हसन साकिबने तिलक वर्माची विकेट घेतली. यासह भारताला पाचवा धक्का बसला. सैफ हसनने तिलकचा झेल घेतला. ५ पेक्षा जास्त षटके बाकी असताना भारताने ५ विकेट्स गमावल्या. तन्झीम हसन साकिबने हा चेंडू संथ गतीने टाकला आणि वेगाच्या अभावामुळे फलंदाज फसला. तिलक वर्माने चेंडूला डीप स्क्वेअर लेगच्या दिशेने मारले आणि तिथे उभ्या असलेल्या क्षेत्ररक्षकाने हवेत उडालेला तो झेल योग्यरित्या पकडला. तिलक वर्माने ५ (७) धावा केल्या.
भारतीय कर्णधार बाद झाला. एकाच षटकात दोन बळी मिळाल्याने बांगलादेश हळूहळू सामन्यावर पकड मिळवत आहे. मुस्तफिजूरचा चेंडू लेग-साईडच्या दिशेने कमी उंचीचा होता आणि सूर्यकुमार यादवने त्याला फ्लिक करण्याचा प्रयत्न केला. चेंडू बॅटची कड घेऊन गेला आणि जाकेर अलीने डाव्या बाजूला झेप घेऊन एक चांगला झेल घेतला. अल्ट्रा-एजवर स्पष्ट डिफ्लेक्शन दिसले. त्यामुळे मैदानी पंचांचा निर्णय बदलावा लागला. सूर्यकुमारने केवळ ५(११) धावा केल्या.
भारताला तिसरा धक्का अभिषेक शर्माच्या रूपात बसला. तो ७५ धावांवर धावबाद झाला.
मुस्तफिजूरचा चेंडू ऑफ स्टंपच्या बाहेर, कमी उंचीचा आणि रुंद होता. सूर्यकुमार यादवने त्याला बॅकवर्ड पॉइंटच्या दिशेने कट केले, जिथे रिशद होसेनने झेप घेऊन चेंडू अडवला. नॉन-स्ट्रायकरला असलेला अभिषेक शर्मा धाव घेण्यासाठी क्रीजमधून बाहेर पडला, पण त्याला परत पाठवण्यात आले. रिशदने थोडा वेळ थांबून गोलंदाजाच्या दिशेने वेगाने आणि सपाट थ्रो फेकला. मुस्तफिजूरने तितक्याच शांतपणे तो चेंडू पकडला आणि फलंदाज क्रीजमध्ये परत येण्याआधी बेल्स उडवल्या. यासह अभिषेक शर्माच्या उत्कृष्ट खेळीचा शेवट झाला. मागील सामन्यात पाकिस्तानविरुद्ध ७४ धावा केल्यानंतर, आजच्या सामन्यात ७५ धावा काढून तो तंबूत परतला.
सलामीवीर फलंदाज अभिषेक शर्माने सलग दुसऱ्या सामन्यात अर्धशतक झळकावले. त्याने २५ चेंडूत त्याच्या टी-२० कारकिर्दीतील चौथे अर्धशतक पूर्ण केले. यापूर्वी त्याने पाकिस्तानविरुद्ध अर्धशतक पूर्ण केले होते.
रिशद होसेनने भारताची पहिली विकेट घेतली. तन्झीम हसन साकिबने झेल घेतला. बांगलादेशला अत्यंत आवश्यक असलेला बळी मिळाला. ही जोडी अखेर फुटली. गिल मोठा फटका मारण्याच्या प्रयत्नात बाद झाला. पण याचे श्रेय रिशदला जाते. चौकार बसल्यानंतरही त्याने चेंडूला पुन्हा उसळी दिली, फक्त थोडी लांबी कमी केली आणि गिलने चेंडूला बॅटच्या टोकापासून (toe-end) हवेत मारले. साकिबने लाँग-ऑफजवळ शांतपणे उभे राहून एक उत्तम झेल घेतला. गिलने २९ (१९ चेंडू) धावा केल्या.
शुभमन गिल आणि अभिषेक शर्मा यांनी पॉवरप्लेमध्ये भारताला चांगली सुरुवात करून दिली. या जोडीने चौकार षटकांचा पाऊस पाडत 72 धावा कुटल्या.
शुभमन गिल आणि अभिषेक शर्मा यांनी भारताला जलद सुरुवात करून दिली. पहिल्या चार षटकांनंतर भारताने विकेट न गमावता होता 38 धावा केल्या. तर 5 व्या षटकाअखेर धावफलकावर अर्धशतक झळकावले.
नासूम अहमदने चौथे टाकले. या षटकाच्या पहिल्याच चेंडूवर गिलने चौकार मारला. त्याने पुढे येऊन चेंडू हाफ-व्हॉलीमध्ये रूपांतरित केला आणि मिड-ऑनच्या दिशेने थेट भिरकावला. त्यानंतर पुढच्याच चेंडूवर अप्रतिम फटका मारत चेंडू बाउंड्री बाहेर पाठवला. या षटकारासह गिलने बांगलादेशवर दबाव टाकला. या पुढच्या चेंडूवर एक धाव घेतली. तर त्याच्या पुढच्या चेंडूवर तीन धावा मिळाल्या. शेवटच्या चेंडूवर अभिषेकने उत्तुंग षटकार खेचला. यासह या षटकातून भारताला 21 धावा मिळाल्या.
तान्झिम हसन साकिबच्या गोलंदाजीवर अभिषेक शर्माचा झेल सुटला. ही एक चांगली संधी होती पण विकेटकिपर जाकेर अलीला तो झेल पकडता आला नाही. चेंडू ऑफ स्टंपच्या बाहेर, आणि थोडासा बाहेरच्या दिशेने वळला. त्यामुळे अबिषेक गडबडला आणि चेंडू बॅटची कड घेऊन विकेटच्या मागे गेला. पण विकेटकिपरला तो पकडता आला नाही.
भारत : अभिषेक शर्मा, शुभमन गिल, सूर्यकुमार यादव (कर्णधार), तिलक वर्मा, संजू सॅमसन (यष्टीरक्षक), शिवम दुबे, हार्दिक पंड्या, अक्षर पटेल, कुलदीप यादव, जसप्रीत बुमराह, वरुण चक्रवर्ती.
बांगलादेश : सैफ हसन, तन्झिद हसन तमीम, परवेझ हुसेन इमॉन, तौहीद ह्रदोय, शमीम हुसेन, झाकीर अली (यष्टीरक्षक/कर्णधार), मोहम्मद सैफुद्दीन, रिशाद हुसेन, तन्झिम हसन साकिब, नसुम अहमद, मुस्तफिजुर रहमान.
बांगलादेशचा कर्णधार लिटन दास दुखापतीमुळे या सामन्यात खेळत नाहीये. त्याच्या जागी झाकीर अली नेतृत्व करत आहे. बांगलादेशने टॉस जिंकून प्रथम गोलंदाजी करण्याचा निर्णय घेतला. झाकीरने संघात चार बदल केले आहेत, तर भारत एकही बदल न करता मैदानात उतरणार आहे.
कागदावर आणि मैदानात दोन्हींच्या बाबतीत बांगलादेशचा संघ टीम इंडियाच्या जवळपासही नाही. सूर्यकुमार यादवची टीम आणखी एका प्रभावी विजयासाठी प्रबळ दावेदार आहे. तथापि, या फॉर्मेटमध्ये भाकितं करणं अशक्य आहेत आणि बांगलादेशचे फिरकीपटू दमदार कामगिरीने खेळपट्टी उलथवून टाकू शकतात. तथापि, फलंदाजीत बांगलादेश भारताशी जुळवून घेऊ शकत नाही. भारतीय सलामीवीर अभिषेक शर्मा उत्कृष्ट फॉर्ममध्ये आहे, त्याने २१० च्या सरासरीने धावा केल्या आहेत. दरम्यान, पाकिस्तानविरुद्धच्या सामन्यानंतर शुभमन गिलचा स्ट्राईक रेट सुमारे १५८ आहे.
सांख्यिकीयदृष्ट्या भारताचा वरचष्मा आहे. आकडेवारी पाहता, हा सामना एकतर्फी होण्याची अपेक्षा आहे, कारण बांगलादेशने दोन्ही संघांमधील १७ टी-२० सामन्यांपैकी फक्त एकच सामना जिंकला आहे. २०१५ च्या एकदिवसीय विश्वचषकादरम्यान रोहित शर्माला संशयाचा फायदा देऊन नाबाद घोषित करण्यात आल्यापासून दोन्ही संघांमधील सामने तणावपूर्ण राहिले आहेत. शेख हसीना सरकार पडल्यानंतर भारताचे बांगलादेशशी राजनैतिक संबंधही ताणले गेले आहेत. लोकशाही पद्धतीने निवडून आलेले सरकार सत्तेत असल्यास बीसीसीआयने या वर्षी ऑगस्टमध्ये बांगलादेशमध्ये होणारी व्हाईट-बॉल मालिका २०२६ पर्यंत पुढे ढकलली आहे.
रिंकू सिंहला आतापर्यंत या स्पर्धेत खेळण्याची संधी मिळाली नाहीय. बांगलादेशविरुद्धच्या सामन्यात तो अक्षर पटेलची जागा घेऊ शकतो असे मानले जात आहे. खरं तर, मागील सामन्यात कर्णधार सूर्यकुमार यादवने त्याला फक्त एकच षटक टाकण्यास सांगितले होते. दरम्यान, वेगवान गोलंदाज जसप्रीत बुमराहला पुन्हा एकदा विश्रांती दिली जाऊ शकते. त्याच्या जागी अर्शदीप सिंग अंतिम अकराच्या संघात परतू शकतो. खरं तर, बुमराहने पाकिस्तानविरुद्धच्या चार षटकांच्या स्पेलमध्ये सर्वाधिक धावा (४५) दिल्या. त्याची इकॉनॉमी देखील ११.२५ होती आणि त्याला एकही विकेट मिळाली नाही. दरम्यान, अर्शदीपला आतापर्यंत फक्त एकाच सामन्यात खेळण्याची संधी मिळाली आहे, ज्यामध्ये त्याने एकच विकेट घेतली आहे.
आशिया कप २०२५ चा उत्साह चाहत्यांमध्ये शिगेला पोहोचला आहे. सुपर फोरच्या लढाईतील दुसऱ्या सामन्यासाठी भारत सज्ज आहे. सूर्यकुमार यादवच्या नेतृत्वाखालील टीम इंडिया बांगलादेशशी सामना करण्यासाठी सज्ज आहे. दुबई आंतरराष्ट्रीय स्टेडियमवर बुधवारी होणाऱ्या सामन्यासाठी भारत त्यांच्या प्लेइंग इलेव्हनमध्ये दोन बदल करू शकतो.
