ICC Test Rankings |वर्ल्ड टेस्ट चॅम्पियनशिप (WTC) स्पर्धेच्या अंतिम सामन्यात ऑस्ट्रेलियाचा पराभव करत शनिवार, १४ जून रोजी दक्षिण आफ्रिकेने कसोटी विश्वचषकावर आपलं नाव कोरलं. मात्र या पराभवानंतरही ऑस्ट्रेलियाचा संघ आयसीसी टेस्ट रँकिंगमध्ये अव्वल स्थानावर कायम आहे.
वर्ल्ड टेस्ट चॅम्पियनशिप फायनल जिंकूनही दक्षिण आफ्रिका संघ अव्वल स्थानापासून वंचित राहिला असला तरी फायनल जिंकण्याचा फायदा झाला आहे. कारण हा संघ आता आयसीसी टेस्ट रँकिंगमध्ये तिसऱ्या वरून दुसऱ्या स्थानावर पोहोचला आहे. वर्ल्ड टेस्ट चॅम्पियनशिपच्या अंतिम सामन्यात पराभव पत्करूनही ऑस्ट्रेलियाच्या खात्यात १२३ गुण आहेत, तर दक्षिण आफ्रिकेच्या खात्यात ११४ गुण आहेत. इंग्लंडच्या संघाच्या खात्यात ११३ गुण आहेत. दक्षिण आफ्रिका संघ ऑस्ट्रेलियापेक्षा ९ गुणांनी मागे आहे.
आयसीसी टेस्ट रँकिंगमध्ये इंग्लंडला एका स्थानाचे नुकसान सहन करावे लागले आहे. भारतीय संघ १०५ गुणांसह चौथ्या क्रमांकावर आहे. पुढील काही सामन्यांनंतरही, ऑस्ट्रेलियाचे कसोटीतील अव्वल स्थान धोक्यात नाही, कारण रेटिंग गुणांचे अंतर खूप जास्त आहे.
वर्ल्ड टेस्ट चॅम्पियनशिपचे पुढील चक्र १७ जूनपासून सुरू होणार आहे. पहिला सामना श्रीलंकेतील गॅले येथे श्रीलंका आणि बांगलादेश यांच्यात खेळवला जाईल.ऑस्ट्रेलियन संघ स्वतः या महिन्याच्या अखेरीस वेस्ट इंडिजविरुद्ध तीन सामन्यांची कसोटी मालिका खेळण्यास सुरुवात करेल. ऑस्ट्रेलियन संघाने ती मालिका गमावली तर रँकिंगमध्ये नुकसान होऊ शकते, परंतु जर कांगारू संघाने मालिका जिंकली तर ते इतर संघांपेक्षा आणखी पुढे जाईल.
वेळापत्रकानुसार, ऑस्ट्रेलिया यावेळी जास्तीत जास्त २२ सामने खेळेल, तर इंग्लंडला २१ सामने खेळावे लागतील. या वर्षाच्या अखेरीस अॅशेस मालिकेदरम्यान दोन्ही संघ एकमेकांशी भिडतील. तर भारतीय संघ २० जूनपासून नव्या वर्ल्ड टेस्ट चॅम्पियनशिप मोहिमेला सुरूवात करणार आहे.एकूण ७१ सामने असलेले आणि पुढील दोन वर्षांच्या कालावधीत होणाऱ्या WTC 2025-27 या चक्रामध्ये नऊ संघ सहभागी होतील. वर्ल्ड टेस्ट चॅम्पियनशिपमधील दोन वेळा उपविजेता ठरलेली टीम इंडियाचा शुभमन गिलच्या नेतृत्वाखाली इंग्लंडविरुद्धच्या सामन्याने सुरुवात करेल.
२०२५-२७ च्या वर्ल्ड टेस्ट चॅम्पियनशिप चक्रात भारत १८ कसोटी सामने खेळणार आहे. यामध्ये वेस्ट इंडिज, दक्षिण आफ्रिका आणि ऑस्ट्रेलियाविरुद्ध घरच्या मैदानावर मालिका, तसेच इंग्लंड, श्रीलंका आणि न्यूझीलंड दौऱ्यावर संघ जाणार आहे.
