ॲटलांटा; वृत्तसंस्था : खेळ जगात श्रेष्ठ का, याचा मूर्तिमंत दाखला देणारा विजय प्रत्यक्ष मैदानावर साकारत अर्जेंटिनाने नाट्यमय लढतीत इंग्लंडवर २-१ गोलने विजय मिळवत फिफा वर्ल्डकपच्या अंतिम फेरीत मुसंडी मारली! एकवेळ एक गोलने पिछाडीवर पडलेल्या अर्जेंटिनाला फर्नांडेझने सामन्याच्या ८५ व्या मिनिटाला १-१ अशी बरोबरी साधून दिली आणि तेथूनच सामन्याचा नूर बदलला. त्यानंतर स्टॉपेज टाईममधील दुसर्या मिनिटाला (९२ वे मिनिट) मार्टिनेझने स्वप्नवत गोल मारत अर्जेंटिनाला फायनलमध्ये जोरदार धडक मारून दिली! या स्वप्नवत विजयाने अर्जेंटिनाच्या समर्थकांसाठी आकाश ठेंगणे झाले नसते तरच नवल होते!
गॉर्डनच्या गोलमुळे इंग्लंडची ती धक्कादायक आघाडी... जेमतेम ३५ मिनिटांचा खेळ हाताशी... अर्जेंटिनाची केविलवाणी धडपड यशस्वी ठरणार की नाही, याची धाकधूक... पण, कठीण प्रसंग असतो तेव्हा हमखास खेळ बहरतो, याची रोखठोक प्रचिती देणारी खेळी अर्जेंटिनाने येथे साकारली आणि इंग्लंडच्या अक्षरश: जबड्यात हात घालत विजय शब्दश: खेचून आणला. २-१ फरकाने त्यांनी मिळवलेला विजय अवघ्या फुटबॉल विश्वाला स्तिमित करून सोडणारा ठरला.
फिफा वर्ल्डकपच्या दुसऱ्या उपांत्य फेरीत फुटबॉल विश्वाला थक्क करणारी एक ऐतिहासिक आणि स्वप्नवत मुसंडी पाहायला मिळाली. सामन्याच्या ५४ व्या मिनिटाला इंग्लंडच्या अँथनी गॉर्डनने गोल करून आपल्या संघाला १-० अशी आघाडी मिळवून दिली होती. इंग्लंड विजयाच्या उंबरठ्यावर असतानाच, गतविजेत्या अर्जेंटिनाने फिनिक्स पक्ष्यासारखी झेप घेत सामन्याचा नूर पूर्णपणे पालटवला आणि २-१ अशा थरारक फरकाने विजय मिळवून महाअंतिम फेरीत धडक मारली.
उत्तरार्धात इंग्लंडने आघाडी घेतल्यानंतर अर्जेंटिनाचा संघ प्रचंड दबावाखाली होता. इंग्लंडचा पोलादी बचाव भेदणे अशक्य वाटत होते आणि वेळ वेगाने निघून जात होती; पण कर्णधार लियोनेल मेस्सीच्या एका इशाऱ्यावर अर्जेंटिनाने 'करो या मरो'च्या थाटात इंग्लंडच्या गोलपोस्टवर एकापाठोपाठ एक वादळी आक्रमणे रचण्यास सुरुवात केली.
सामन्याच्या ७५ व्या मिनिटाला मैदानावर ‘मेस्सी मॅजिक’ पाहायला मिळाले. मेस्सीने इंग्लंडच्या तीन डिफेंडर्सना चकवत डी-बॉक्सच्या आत ज्युलियन अल्वारेझला एक अप्रतिम आणि अचूक पास दिला. अल्वारेझने कोणतीही चूक न करता चेंडू थेट इंग्लंडच्या गोलपोस्टच्या उजव्या कोपऱ्यात धाडला. या गोलसह अर्जेंटिनाने सामन्यात १-१ अशी बरोबरी साधली आणि संपूर्ण स्टेडियममध्ये एकच जल्लोष झाला.
अर्जेंटिनाचा संघ यापूर्वी इजिप्तविरुद्ध उपांत्यपूर्व लढतीतदेखील पिछाडीवर होता. मात्र, अवघ्या १३ मिनिटांत ३ गोल करत त्यांनी जोरदार मुसंडी मारली होती. त्याचीच पुनरावृत्ती त्यांनी येथे उपांत्य सामन्यात इंग्लंडविरुद्धदेखील केली आणि इंग्लंडच्या जबड्यात हात घालून विजय अक्षरश: हिसकावून घेतला.
सामना एक्स्ट्रा टाईममध्ये जाणार असे वाटत असतानाच, भरपाई वेळेत अर्जेंटिनाला कॉर्नर मिळाला. मेस्सीने घेतलेल्या या कॉर्नरवर मिडफिल्डर मार्टिनेझने हवेत सूर मारत एक कडक हेडर लावला. इंग्लंडचा गोलकीपर जॉर्डन पिकफोर्डला चेंडू रोखण्याची साधी संधीही मिळाली नाही आणि अर्जेंटिनाने २-१ अशी चमत्कारिक आघाडी घेतली.
