Deepthi Jeevanji Wins 400m T20 Gold: भारताची पॅरा अॅथलीट दीप्ती जीवनजी हिने आशियाई पॅरा गेम्स 2026 मध्ये शानदार कामगिरी करत सुवर्णपदक जिंकले आहे. महिलांच्या 400 मीटर प्रकारात तिने अवघ्या 56.36 सेकंदांत शर्यत पूर्ण केली. यासह तिने स्पर्धेचा नवा विक्रमही आपल्या नावावर केला. दीप्तीच्या या कामगिरीमुळे भारताच्या क्रीडा क्षेत्रात आणखी एका यशाची भर पडली आहे.
तेलंगणाची 23 वर्षीय दीप्ती जीवनजी हिने सुरुवातीपासूनच चांगली कामगिरी केली. तिने आपल्या वेगाच्या जोरावर प्रतिस्पर्धी खेळाडूंना मागे टाकत पहिले स्थान मिळवले. जपानच्या नीना कान्नो हिने 58.92 सेकंदांत शर्यत पूर्ण करून रौप्यपदक जिंकले. तर जपानच्याच अकाने काटो हिने 1 मिनिट 0.26 सेकंद वेळ नोंदवत कांस्यपदक मिळवले.
दीप्ती जीवनजी ही पॅरा अॅथलेटिक्समधील ओळखली जाणारी खेळाडू आहे. यापूर्वीही तिने आंतरराष्ट्रीय स्तरावर भारतासाठी मोठे यश मिळवले आहे. 2024 मध्ये झालेल्या पॅरा जागतिक अजिंक्यपद स्पर्धेत तिने सुवर्णपदक पटकावले होते. तसेच पॅरालिम्पिक स्पर्धेत महिलांच्या 400 मीटर T20 प्रकारात तिने कांस्यपदक जिंकले होते. आता आशियाई पॅरा गेम्समध्ये सुवर्णपदक आणि स्पर्धेचा नवा विक्रम अशी दुहेरी कामगिरी करत दीप्तीने आपल्या यशात आणखी एक मानाचा तुरा रोवला आहे.
पॅरा अॅथलेटिक्समध्ये खेळाडूंचे वर्गीकरण त्यांच्या अपंगत्वाच्या प्रकारानुसार केले जाते. T20 हा प्रकार बौद्धिक अपंगत्व असलेल्या खेळाडूंसाठी आहे.
या प्रकारातील काही खेळाडूंना माहिती समजून घेणे, एकाग्रता टिकवणे आणि शर्यतीदरम्यान आखलेल्या रणनीतीनुसार धावणे यामध्ये अडचणी येऊ शकतात. त्यामुळे या खेळाडूंसाठी स्वतंत्र वर्गीकरण ठेवण्यात आले आहे.
दीप्ती जीवनजी हिने याच प्रकारात आपल्या मेहनतीच्या आणि जिद्दीच्या जोरावर सुवर्णपदक जिंकत भारताचा गौरव वाढवला आहे. तिची ही कामगिरी देशातील नवोदित खेळाडूंसाठी प्रेरणादायी ठरणारी आहे.
