चेन्नई; वृत्तसंस्था : साई सुदर्शनचे (46 चेंडूंत 87) धडाकेबाज अर्धशतक तसेच कर्णधार शुभमन गिल (33) व जोस बटलर (नाबाद 39) यांच्या उपयुक्त खेळीच्या जोरावर गुजरात टायटन्सने चेन्नई सुपर किंग्जवर 8 गडी राखून दणदणीत विजय मिळवला. रविवारी चेपॉक स्टेडियमवर झालेल्या या सामन्यात गुजरातने चेन्नईचे 159 धावांचे आव्हान अवघ्या 16.4 षटकांत पूर्ण केले. या विजयासह गुजरातने गुणतालिकेत पाचव्या स्थानावर झेप घेत प्ले ऑफच्या शर्यतीत आपले आव्हान अधिक मजबूत केले आहे.
159 धावांच्या लक्ष्याचा पाठलाग करताना गुजरातच्या शुभमन गिल व साई सुदर्शन या जोडीने पॉवर प्लेचा पुरेपूर फायदा घेत 55 धावांची सलामी दिली. गिल 33 धावांवर नूर अहमदच्या गोलंदाजीवर संजू सॅमसनकरवी यष्टिचीत झाला. मात्र सुदर्शनने आक्रमक पवित्रा कायम ठेवताना 33 चेंडूंत अर्धशतक पूर्ण केले. सुदर्शनने 46 चेंडूंत 87 धावांची खेळी करताना अकिल हुसेन आणि गुरजपनीत सिंग यांचा जोरदार समाचार घेतला.
तिसर्या क्रमांकावर आलेल्या जोस बटलरने (नाबाद 39) सुदर्शनला उत्तम साथ दिली. सुदर्शन विजयाच्या उंबरठ्यावर असताना बाद झाला, मात्र तोपर्यंत गुजरातचा विजय निश्चित झाला होता. बटलरने विजयी षटकार खेचत 20 चेंडू राखून गुजरातच्या विजयावर शिक्कामोर्तब केले.
तत्पूर्वी, नाणेफेक जिंकून प्रथम गोलंदाजी करण्याचा गुजरातचा निर्णय सार्थ ठरला. कागिसो रबाडाने (3/25) चेन्नईच्या आघाडीच्या फळीला सुरुवातीलाच धक्के दिले. संजू सॅमसन (11) आणि उर्विल पटेल (4) स्वस्तात बाद झाले. डेवाल्ड ब्रेविस आणि शिवम दुबे यांनाही मोठी खेळी करता आली नाही. अशा परिस्थितीत कर्णधार ऋतुराज गायकवाडने 60 चेंडूंत 74 धावांची झुंजार खेळी करत संघाला 158 धावांपर्यंत पोहोचवले. जेमी ओव्हरटनने 6 चेंडूंत 18 धावांचे योगदान दिले.
गुजरातच्या वतीने रबाडाने 25 धावांत 3 बळी घेत चेन्नईच्या डावाला खिंडार पाडले. मोहम्मद सिराज (1/23) आणि मानव सुतार (1/22) यांनीही अत्यंत किफायतशीर गोलंदाजी करत चेन्नईच्या धावसंख्येला लगाम घातला.
