Big Setback for Rohit Sharma and Virat Kohli in BCCI Central Contracts
मुंबई : भारतीय क्रिकेट नियामक मंडळ (BCCI) आपल्या खेळाडूंच्या वार्षिक कराराच्या (Central Contract) संरचनेत आमूलाग्र बदल करण्याच्या तयारीत आहे. या नवीन आराखड्यामुळे संघातील दिग्गज फलंदाज रोहित शर्मा आणि विराट कोहली यांना मोठा आर्थिक फटका बसण्याची शक्यता वर्तवण्यात येत आहे. बीसीसीआय आपल्या करार पद्धतीतून 'ए प्लस' (A+) ही सर्वोच्च श्रेणी रद्द करून केवळ ए, बी आणि सी अशा तीनच श्रेणी कायम ठेवण्याचा विचार करत आहे.
बीसीसीआयच्या या संभाव्य निर्णयामुळे केवळ विराट आणि रोहितच नव्हे, तर जसप्रीत बुमराह आणि रवींद्र जडेजा यांच्या श्रेणीतही घट होऊ शकते. सध्या हे चारही खेळाडू 'ए प्लस' श्रेणीचा भाग आहेत. 'एएनआय'ने दिलेल्या वृत्तानुसार, जर नवीन मॉडेल लागू झाले, तर विराट कोहली, रोहित शर्मा आणि रवींद्र जडेजा यांची रवानगी थेट 'ग्रेड-बी' मध्ये केली जाऊ शकते, तर जसप्रीत बुमराहला 'ग्रेड-ए' मध्ये स्थान मिळू शकते.
अजित आगरकर यांच्या नेतृत्वाखालील निवड समितीने सेंट्रल कॉन्ट्रॅक्टच्या रचनेत बदल करण्याची सूचना केली आहे. समितीने ७ कोटी रुपये मानधन असलेली 'ए प्लस' श्रेणी रद्द करून केवळ तीन श्रेणी ठेवण्याचा सल्ला दिला आहे. या बदलामुळे खेळाडूंच्या मानधनाच्या रचनेतही मोठे फेरबदल होतील.
ग्रेड-ए प्लस : ७ कोटी रुपये
ग्रेड-ए : ५ कोटी रुपये
ग्रेड-बी : ३ कोटी रुपये
ग्रेड-सी : १ कोटी रुपये
नवीन मॉडेल अमलात आल्यास या मानधनाच्या आकड्यांमध्येही बीसीसीआय सुधारणा करण्याची शक्यता आहे.
एप्रिल २०२५ मध्ये जाहीर करण्यात आलेल्या करारानुसार, रोहित, विराट, जडेजा आणि बुमराह हे 'ए प्लस' श्रेणीत होते. तर मोहम्मद सिराज, केएल राहुल, शुभमन गिल, हार्दिक पंड्या, मोहम्मद शमी आणि ऋषभ पंत यांचा समावेश 'ग्रेड-ए' मध्ये करण्यात आला होता. सूर्यकुमार यादव, यशस्वी जैस्वाल आणि कुलदीप यादव यांसारखे खेळाडू 'ग्रेड-बी' मध्ये होते, तर रिंकू सिंह, शिवम दुबे आणि संजू सॅमसन यांच्यासह अनेक तरुण खेळाडूंना 'ग्रेड-सी' मध्ये स्थान मिळाले होते.
निवड समितीच्या या प्रस्तावावर बीसीसीआय अंतिम मोहोर कधी उमटवते, याकडे आता क्रिकेट वर्तुळाचे लक्ष लागले आहे.
