Sai Sudharsan IPL Star Performer Rising Star of Indian Cricket
पुढारी ऑनलाईन डेस्क : भारतीय क्रिकेटच्या क्षितिजावर सध्या अनेक युवा खेळाडू आपल्या प्रतिभेने रंग भरत आहेत. त्यामध्ये भरद्वाज साई सुदर्शन नावाचा एक चमकता तारा वेगाने झळकत आहे. 15 ऑक्टोबर 2001 रोजी चेन्नईत जन्मलेल्या साईने त्याच्या झुंजार खेळीच्या जोरावर आणि सातत्यपूर्ण कामगिरीने देश-विदेशातील क्रिकेटप्रेमींचे लक्ष वेधून घेतले आहे. आयपीएल 2025 मध्ये त्यांनी 15 सामन्यांमध्ये 759 धावा करून ऑरेंज कॅपचा मानकरी ठरला आहे. त्याच्या खेळातील शिस्त, तांत्रिक कौशल्य आणि दबावाखाली शांत राहण्याची क्षमता यामुळे तो भारतीय क्रिकेटचा भविष्यकालीन आधारस्तंभ मानला जात आहे.
जेव्हा एक तरुण खेळाडू क्रिकेटच्या मैदानावर बॅट हाती घेऊन उतरतो, तेव्हा तो केवळ खेळाडू नसतो, तर तो स्वप्नांचा एक प्रवास घेऊन येतो. साई सुदर्शन हा असाच एक स्वप्नांचा सागर, प्रतिभेचा दीपस्तंभ आणि मेहनतीचा मूर्तिमंत आविष्कार आहे. चेन्नईच्या मातीतून उगम पावलेला हा 23 वर्षांचा तरुण क्रिकेटच्या विश्वात आपल्या खेळाने सर्वांचे मन जिंकत आहे. त्याच्या प्रत्येक फटक्यातून उत्साह, शांतता आणि समर्पणाची कहाणी ऐकू येते, जी प्रत्येक क्रिकेटप्रेमीच्या हृदयाला स्पर्श करते.
साई सुदर्शन याच्या रक्तातच क्रीडाप्रेम आहे. त्याचे वडील आर. भारद्वाज हे राष्ट्रीय स्तरावरील धावपटू होते. त्यांनी 1993 मध्ये ढाका येथे झालेल्या दक्षिण आशियाई क्रीडा स्पर्धेत (SAF Games) भारताचे प्रतिनिधित्व केले. तर त्याची आई उषा भारद्वाज (पूर्वाश्रमीची उषा अलागू) या राज्यस्तरीय व्हॉलीबॉल खेळाडू होत्या. सध्या त्या एक अनुभवी स्ट्रेंथ अँड कंडिशनिंग प्रशिक्षक आहेत. त्यांनी एल. बालाजी, अभिनव मुकुंद, डी. हेमलता, एन. निरंजनासह जोश्ना चिनप्पा आणि दीपिका पल्लीकल यांसारख्या खेळाडूंना प्रशिक्षण दिले आहे.
अशा क्रीडाप्रेमी कुटुंबातून आलेल्या साईने लहानपणापासूनच भारतातील लोकप्रिय खेळ क्रिकेटला आपली आवड बनवली. तामिळनाडूसाठी देशांतर्गत क्रिकेट खेळताना त्याने आपल्या तांत्रिकदृष्ट्या परिपूर्ण फलंदाजीने सर्वांचे लक्ष वेधले. 2019-20 च्या पालायमपट्टी शील्ड स्पर्धेत त्याने अल्वारपेट सीसीसाठी 52.92 सरासरीने 625 धावा केल्या. या खेळीच्या जोरावर त्याने त्याच्या प्रतिभेची चुणूक दाखवली.
साई सुदर्शनने 2021 मध्ये तामिळनाडूसाठी सय्यद मुश्ताक अली ट्रॉफी (टी-20) आणि विजय हजारे ट्रॉफी (लिस्ट ए) मध्ये पदार्पण केले. त्याच्या लिस्ट ए क्रिकेटमधील कामगिरी विशेष उल्लेखनीय आहे. 28 सामन्यांमध्ये त्याने 60.69 च्या सरासरीने 1396 धावा फटकावल्या, ज्यामध्ये 6 शतके आणि 6 अर्धशतकांचा समावेश आहे.
या लक्षवेधी कामगिरीने तो आयपीएलच्या रडारवर आला आणि 2022 मध्ये गुजरात टायटन्सने त्याला 20 लाख रुपयांना करारबद्ध केले. येथून त्याच्या कारकिर्दीला खऱ्या अर्थाने बहर आला. पहिल्याच हंगामात त्याने पाच सामन्यांत 145 धावा काढत आपली चमक दाखवली. पण 2023 चा आयपीएल हा त्यांच्यासाठी खऱ्या अर्थाने स्वप्नवत ठरला. त्याने अवघ्या आठ सामन्यांत 362 धावा फटकावल्या. यात तीन अर्धशतकांचा समावेश होता. चेन्नई सुपर किंग्जविरुद्धच्या अंतिम सामन्यात त्याने 8 चौकार आणि 6 षटकार ठोकून 47 चेंडूत 96 धावांची तुफानी खेळी केली. ही खेळी भलेही गुजरातला विजय मिळवून देऊ शकली नाही, तरी साईने क्रिकेट विश्वाला आपली ओळख करून दिली. त्यांच्या प्रत्येक फटक्यातून एक नवा संदेश उमटत होता - ‘मी आलोय, आणि मी थांबणार नाही!’
2024 मध्ये साईने आपली कामगिरी आणखी उंचावली. गुजरात टायटन्ससाठी सर्वाधिक धावा करणारा फलंदाज म्हणून त्यांने 527 धावा काढल्या. यात चेन्नई सुपर किंग्सविरुद्धचे एक शतक (103) आणि दोन अर्धशतकांचा समावेश होता.
आयपीएल 2025 मध्ये तर 14 सामन्यांमध्ये 54.21च्या सरासरीने आणि 156.21 च्या स्ट्राइक रेटने 759 धावा ठोकल्या. यादरम्यान त्याने 1 शतक आणि 6 अर्धशतके तडकावली. यासह तो आयपीएलच्या एका हंगामात 700+ धावा करणारा सर्वात तरुण फलंदाज ठरला. त्याने शुभमन गिललाही मागे टाकले. आयपीएल 2025 च्या एलिमिनेटर सामन्यातील 80 धावांची खेळी ही त्याच्या प्रतिभेची आणि सामन्याला कलाटणी देण्याच्या क्षमतेची साक्ष आहे.
साई सुदर्शनने डिसेंबर 2023 मध्ये दक्षिण आफ्रिकेविरुद्धच्या एकदिवसीय मालिकेत भारतासाठी पदार्पण केले, ज्यामुळे तो भारतासाठी आंतरराष्ट्रीय क्रिकेट खेळणारा 400 वा खेळाडू ठरला. पहिल्याच सामन्यात त्याने 9 चौकारांसह 43 चेंडूत नाबाद 55 धावांची खेळी करून आपली क्षमता दाखवली. दुसऱ्या सामन्यात त्याने 62 धावांची खेळी केली, ज्यामुळे भारतासाठी पहिल्या दोन एकदिवसीय सामन्यांमध्ये सलग 50+ धावा करणारा तो नवजोत सिंग सिद्धू (1987) नंतरचा दुसरा फलंदाज ठरला. या मालिकेत भारताने दक्षिण आफ्रिकेला 2-1 असे हरवले, आणि साईच्या खेळीने विजयात महत्त्वाची भूमिका बजावली.
दबावाखाली शांत राहून खेळण्याची क्षमता, शरीराजवळून ताकदीने ड्राईव्ह करण्याचे तंत्र ही साई सुदर्शनच्या फलंदाजीची वैशिष्ट्य आहे. आयपीएल 2025 मध्ये शुभमन गिलसोबत त्याने 909 धावांची भागीदारी केली, जी आयपीएलच्या एका हंगामातील सर्वोच्च भागीदारींपैकी एक आहे. त्याच्या खेळीतून दिसणारी सातत्यता आणि मोठ्या सामन्यांमध्ये चमक दाखवण्याची क्षमता यामुळे तो ‘मॅच विनर’ म्हणून ओळखला जात आहे.
तो आता कसोटी क्रिकेटमध्येही छाप पाडण्यास सज्ज झाला आहे. त्याची इंग्लंड दौऱ्यासाठी भारतीय कसोटी संघात निवड झाली आहे. गिलच्या नेतृत्वाखालील या संघात साईला मधल्या फळीतील फलंदाज म्हणून संधी मिळण्याची शक्यता आहे. त्याचा संयमी खेळ आणि लांबलचक डाव खेळण्याची क्षमता कसोटीच्या लाल चेंडूसाठी उपयुक्त ठरेल असा विश्वास आहे. तो इंग्लंडच्या स्विंग गोलंदाजांविरुद्ध फायदेशीर ठरू शकतो. भारतीय कसोटी संघात सध्या यशस्वी जैस्वाल आणि शुभमन गिल यांच्यासारखे युवा फलंदाज स्थिरावले असले, तरी मधल्या फळीत अनुभवाची कमतरता जाणवते. साई सुदर्शनला तिसऱ्या किंवा चौथ्या क्रमांकावर फलंदाजीची संधी मिळू शकते.
त्याने इंग्लंड दौऱ्यापूर्वी आपली तयारी तीव्र केली आहे. इंग्लिश खेळपट्ट्यांवरील स्विंग आणि सीम गोलंदाजीचा सामना करण्यासाठी विशेष सराव करत आहे. त्याने आपल्या मुलाखतीत सांगितले, ‘कसोटी क्रिकेट हे माझे स्वप्न आहे. इंग्लंडमधील परिस्थिती आव्हानात्मक आहे, पण मी त्यासाठी तयार आहे. माझ्या कुटुंबाचा आणि प्रशिक्षकांचा पाठिंबा मला प्रेरणा देतो.’
साईच्या कसोटी क्रिकेटमधील यशाची गुरुकिल्ली त्याच्या शिकण्याच्या वृत्तीत आहे. जर तो इंग्लंडमधील आव्हानात्मक परिस्थितीत यशस्वी झाला, तर तो भारतीय मधल्या फळीतील कायमस्वरूपी स्थान मिळवू शकतो. त्याच्यात भविष्यातील विराट कोहली किंवा चेतेश्वर पुजारा यांच्यासारखा विश्वासार्ह कसोटी फलंदाज बनण्याची क्षमता आहे. क्रिकेट तज्ज्ञांच्या मते, साई हा असा खेळाडू आहे, जो 2027 च्या विश्वचषकापर्यंत आणि त्यानंतरच्या कसोटी चॅम्पियनशिपमध्ये भारताचा आधारस्तंभ बनू शकतो.
साईचा प्रवास प्रत्येक तरुण क्रिकेटपटूसाठी प्रेरणादायी आहे. भारतीय अंडर-19 संघात स्थान मिळाले नाही, तरीही त्याने हार न मानता देशांतर्गत क्रिकेट आणि आयपीएलमधील संधीचे सोने केले. त्याच्या मेहनतीने आणि सातत्याने तो आज भारतीय क्रिकेटमधील सर्वात आशादायी खेळाडूंपैकी एक बनला आहे. त्याच्या खेळीतील उत्कटता, कुटुंबाचा पाठिंबा आणि स्वतःला सिद्ध करण्याची जिद्द यामुळे त्याने लाखो क्रिकेटप्रेमींच्या मनात स्थान मिळवले आहे.
प्रथम श्रेणी सामने 29 : धावा 1957 : सरासरी 39.9 : शतके 7 : अर्धशतके 5.
लिस्ट ए सामने 28 : धावा 1396 : सरासरी 60.69 : शतके 6 : अर्शधतके 6.
टी-20 सामने 60 : धावा 2271 : सरासरी 43.67 : शतके 2 : अर्धशतके 14.
आयपीएल 2025 चे सामने 15 : धावा 759 : सरासरी 54.21 : स्ट्राइक रेट 156.21 : शतक 1 : अर्धशतके 6.
