दक्षिण आफ्रिकेचा युवा फलंदाज डेवाल्ड ब्रेव्हिसचे नाव क्रिकेटच्या इतिहासात सुवर्ण अक्षरांनी कोरले गेले आहे. ऑस्ट्रेलियाविरुद्ध आंतरराष्ट्रीय टी२० सामन्यात शतक झळकावणारा तो दक्षिण आफ्रिकेचा पहिला फलंदाज ठरला आहे. अवघ्या २२ वर्षीय ब्रेव्हिसने ऑस्ट्रेलियाविरुद्धच्या दुसऱ्या टी२० सामन्यात चौथ्या क्रमांकावर फलंदाजीस येत केवळ ४१ चेंडूंत आपले शतक पूर्ण केले. या वादळी खेळीने त्याने अनेक दिग्गजांचे विक्रम मोडीत काढले.
यापूर्वी, ऑस्ट्रेलियाविरुद्ध टी२० सामन्यात सर्वाधिक धावा करण्याचा विक्रम हाशिम अमलाच्या नावावर होता. त्याने २०१६ मध्ये ६२ चेंडूंत नाबाद ९७ धावांची खेळी केली होती. ब्रेव्हिसने हा विक्रम सहज मागे टाकला.
ब्रेव्हिसने त्याच्या खेळीत १२ चौकार आणि ८ षटकार लगावले. यासह त्याने अनेक विक्रम आपल्या नावे केले. त्याने २२ वर्षे आणि १०५ दिवसांच्या वयात शतक झळकावत, आंतरराष्ट्रीय टी२० मध्ये शतक करणारा दक्षिण आफ्रिकेचा सर्वात तरुण फलंदाज ठरला आहे.
दुसरे वेगवान टी२० शतक : केवळ ४१ चेंडूंतील त्याचे शतक हे दक्षिण आफ्रिकेच्या फलंदाजातर्फे दुसरे सर्वात वेगवान आंतरराष्ट्रीय टी२० शतक आहे. या यादीत त्याच्या पुढे फक्त डेव्हिड मिलर (३५ चेंडू) आहे.
फॉफ डू प्लेसिसचा विक्रम मोडीत : ब्रेव्हिसने नाबाद १२५ धावांची खेळी करत फॉफ डू प्लेसिसचा जवळपास १० वर्षे जुना विक्रम मोडला. डू प्लेसिसने २०१५ मध्ये वेस्ट इंडिजविरुद्ध ११९ धावा केल्या होत्या, जी दक्षिण आफ्रिकेकडून टी२० मधील सर्वोच्च वैयक्तिक धावसंख्या होती.
ऑस्ट्रेलियाविरुद्ध पहिला शतकवीर : तो ऑस्ट्रेलियाविरुद्ध आंतरराष्ट्रीय टी२० मध्ये शतक करणारा पहिला आफ्रिकन फलंदाज ठरला.
षटकारांचा विक्रम : ऑस्ट्रेलियाविरुद्ध एका टी२० सामन्यात ५ पेक्षा जास्त षटकार मारणारा तो पहिला आफ्रिकन फलंदाज बनला आहे.
पाचव्या षटकात एडन मार्करम बाद झाल्यानंतर ब्रेव्हिस मैदानात उतरला. त्यानंतर संघाची आणखी एक विकेट गेली आणि धावसंख्या ३ बाद ५७ अशी झाली. यानंतर ब्रेव्हिसने गोलंदाजांवर हल्ला चढवला आणि मागे वळून पाहिले नाही. त्याने ट्रिस्टन स्टब्ससोबत मिळून शतकी भागीदारी रचली. ब्रेव्हिसने आपले अर्धशतक २५ चेंडूंत आणि शतक केवळ ४१ चेंडूंत पूर्ण केले.
ब्रेव्हिस अखेरपर्यंत नाबाद राहिला. त्याने ५६ चेंडूंत १२ चौकार आणि ८ षटकारांसह नाबाद १२५ धावा केल्या. त्याच्याशिवाय स्टब्सने ३१ धावांचे योगदान दिले. ब्रेव्हिसच्या या खेळीमुळे दक्षिण आफ्रिकेच्या संघाने २० षटकांत ७ गडी गमावून २१८ धावांचा डोंगर उभारला.
ब्रेव्हिसने सुरुवातीपासूनच आक्रमक पवित्रा घेतला होता. पहिले अर्धशतक पूर्ण केल्यानंतर त्याने अधिकच वेग वाढवला आणि पुढील ५१ धावा अवघ्या १६ चेंडूंत वसूल केल्या. त्याच्या आक्रमणापुढे ऑस्ट्रेलियन गोलंदाजांकडे कोणतेही उत्तर नव्हते. वेगवान गोलंदाज असोत किंवा फिरकीपटू, प्रत्येकाची त्याने सणसणीत धुलाई केली.
ब्रेव्हिसच्या या खेळीनंतर क्रिकेट तज्ज्ञ आणि माजी खेळाडूंनी त्याचे कौतुक केले आहे. अनेकांनी त्याची तुलना एबी डिव्हिलियर्ससारख्या दिग्गजांशी करत त्याला दक्षिण आफ्रिकेचे भविष्य म्हटले आहे. ही खेळी ब्रेव्हिसच्या कारकिर्दीसाठी एक मैलाचा दगड ठरू शकते, कारण त्याने केवळ विक्रमच केले नाहीत, तर मोठ्या सामन्यांमध्ये संघाला विजय मिळवून देण्याची क्षमताही सिद्ध केली आहे.
