पर्थ : कसोटी क्रिकेटचा थरार आणि वेगवान गोलंदाजीचा कहर म्हणजे काय असतो, याचा अनुभव क्रिकेट चाहत्यांनी शुक्रवारी (दि. २१) पर्थ स्टेडियमवर झालेल्या ॲशेस मालिकेतील पहिल्या कसोटीच्या पहिल्याच दिवशी घेतला. एका दिवसात तब्बल १९ बळी पडण्याचा विक्रम नोंदवत ऑस्ट्रेलियाचा वेगवान गोलंदाज मिचेल स्टार्क आणि इंग्लंडचा कर्णधार बेन स्टोक्स यांनी आपल्या भेदक माऱ्याने सामन्यावर ठसा उमटवला. हा दिवस केवळ विक्रमीच नाही तर नाट्यमय वळणांनी भरलेला 'ब्लॉकबस्टर' ठरला.
पर्थचे वाका मैदान (WACA) नेहमीच वेगवान गोलंदाजांसाठी ओळखले जाते आणि त्याने पुन्हा एकदा आपली ही 'आक्रमक' ओळख सिद्ध केली. गोलंदाजांनी अभूतपूर्व वेग, आग ओकणारे स्पेल, उसळी घेणारे चेंडू आणि विकेट्सची मालिका लावत मैदानावर आपला दबदबा निर्माण केला.
शुक्रवारी (दि. २१) ॲशेस मालिकेतील पहिल्या कसोटीचा पहिला दिवस क्रिकेटच्या इतिहासातील एका वेगळ्या विक्रमाने गाजला. एकाच दिवसात तब्बल १९ विकेट्स पडल्या. याहूनही अधिक रोमांचक बाब म्हणजे, या सर्व १९ विकेट्स फक्त आणि फक्त वेगवान गोलंदाजांच्या नावावर जमा झाल्या. पहिल्या सत्रात ऑस्ट्रेलियाचा वेगवान गोलंदाज मिचेल स्टार्कच्या भेदक मा-याने पाहुण्या इंग्लिश फलंदाजांची भांबेरी उडाली. तर तर दुसऱ्या सत्रात इंग्लंडचा कर्णधार बेन स्टोक्सने आपल्या जबरदस्त पलटवार करून यजमान कांगारू संघाच्या फलंदाजीला सुरुंग लावला.
सामन्याच्या पूर्वार्धावर ऑस्ट्रेलियाचा अनुभवी वेगवान गोलंदाज मिचेल स्टार्क याचे पूर्णपणे वर्चस्व राहिले. नियमित कर्णधार पॅट कमिन्स आणि अनुभवी जोश हेजलवूड यांच्या अनुपस्थितीत ऑस्ट्रेलियन आक्रमणाची धुरा सांभाळणाऱ्या मिचेल स्टार्कने धडाकेबाज कामगिरी केली. त्याने आपला अनुभव पणाला लावत सामन्याच्या पहिल्याच षटकाच्या शेवटच्या चेंडूवर सलामीवीर जॅक क्रॉलीला तंबूचा रस्ता दाखवून इंग्लंडच्या डावाला खिंडार पाडले. स्टार्कच्या घातक माऱ्यासमोर इंग्लंडचा संपूर्ण फलंदाजी क्रम पत्त्यांच्या बंगल्याप्रमाणे कोसळला आणि त्यांचा डाव अवघ्या १७२ धावांत संपुष्टात आला. स्टार्कने आपल्या कसोटी कारकिर्दीतील सर्वोत्कृष्ट कामगिरी नोंदवत एका दिवसात ७ बळी घेण्याचा विक्रमी टप्पा गाठला. त्याची ही 'आग' गोलंदाजी क्रिकेट चाहत्यांसाठी एक अविस्मरणीय मेजवानी ठरली.
स्टार्कने आपल्या भेदक गोलंदाजीने इंग्लंडच्या फलंदाजांना एकापाठोपाठ तंबूत धाडले असले तरी, दिवसाच्या उत्तरार्धात इंग्लिश कर्णधार बेन स्टोक्स याने हार मानली नाही. पहिल्या डावात १७२ धावांवर बाद होऊन इंग्लंड बॅकफूटवर होता, पण स्टोक्सने गोलंदाजीमध्ये त्वरित प्रत्युत्तर दिले. ऑस्ट्रेलियन फलंदाजी सुरू होताच, जोफ्रा आर्चरने पदार्पण करणाऱ्या वेदरल्डला दुसऱ्याच चेंडूवर शून्यावर बाद केले.
मात्र, त्यानंतर दिवसाचे चित्र पालटले ते स्टोक्सच्या 'जादुई स्पेल'ने. इंग्लिश कर्णधाराने आपल्या ६ षटकांच्या नियंत्रित मा-याने ऑस्ट्रेलियाच्या मधल्या फळीला अक्षरशः नेस्तनाब केले. त्याने अतिशय अचूक टप्प्यावर गोलंदाजी करत आणि चेंडूच्या गतीत बदल करत ६ षटकांत २३ धावांच्या मोबदल्यात पाच बळी घेतले. यादरम्यान त्याला ब्रायडन कार्से, जोफ्रा आर्चर यांची मोलाची साथ मिळाली. ज्यामुळे पर्थ कसोटीच्या पहिल्या दिवसाअखेर यजमान ऑस्ट्रेलियाची अवस्था ९ बाद १२३ धावा अशी झाली.
पर्थच्या या मैदानावर पहिल्या दिवशी १९ बळी पडण्याची ही पहिलीच वेळ आहे. यापूर्वी, याच मैदानावर झालेल्या पाच कसोटी सामन्यांमध्ये (२०१७ पासून) पहिल्या दिवशी सर्वाधिक १७ (२०२४) आणि चार कसोटींमध्ये मिळून १५ बळी पडले होते. सर्वात महत्त्वाचं म्हणजे, गेल्या १०० वर्षांतील ॲशेस कसोटीच्या पहिल्या दिवशी पडलेल्या बळींमध्ये हा विक्रम सर्वांत मोठा ठरला आहे.
पर्थ स्टेडियम (२०२५) : १९ बळी (इंग्लंड १०, ऑस्ट्रेलिया ९)
ट्रेंट ब्रिज (२००१) : १७ बळी (इंग्लंड १०, ऑस्ट्रेलिया ७)
लॉर्ड्स (२००५) : १७ बळी (ऑस्ट्रेलिया १०, इंग्लंड ७)
या १९ बळींपैकी एकही बळी फिरकीपटूला मिळाला नाही; सर्वच्या सर्व बळी वेगवान गोलंदाजांनी घेतले. पर्थची खेळपट्टी वेगवान गोलंदाजांसाठी स्वर्ग मानली जाते आणि सामन्याच्या पहिल्या दिवशी ती अपेक्षा पूर्ण झाली.
हा दिवस म्हणजे 'बॉक्स ऑफिस' क्रिकेटचा उत्तम नमुना होता. प्रचंड वेग, भेदक गोलंदाजी आणि नाट्यमय उलथापालथ यामुळे क्रिकेटप्रेमींना एक अविस्मरणीय दिवस अनुभवायला मिळाला. पहिला दिवस संपला असला तरी, उद्या प्रत्येक चेंडू आणि प्रत्येक वळणावर नजर असेल, कारण 'ॲशेस' मालिकेला खऱ्या अर्थाने एक 'ब्लॉकबस्टर' सुरुवात झाली आहे
