दुबई : अंडर-१९ आशिया चषकाच्या महाअंतिम सामन्यात पाकिस्तानने फलंदाजीसाठी पोषक असलेल्या खेळपट्टीचा पूर्ण फायदा उठवत भारतासमोर विजयासाठी ३४८ धावांचे डोंगरासारखे विशाल लक्ष्य ठेवले आहे. पाकिस्तानचा सलामीवीर समीर मिन्हास याने खेळलेल्या १७२ धावांच्या ऐतिहासिक खेळीमुळे भारताची गोलंदाजी पूर्णपणे विखुरलेली पाहायला मिळाली.
टॉस जिंकून प्रथम फलंदाजी करणाऱ्या पाकिस्तानने सुरुवातीपासूनच आक्रमक पवित्रा घेतला. समीर मिन्हासने अवघ्या ११३ चेंडूंमध्ये १७२ धावा कुटल्या. त्याने पहिल्यांदा उस्मान खानसोबत ९२ धावांची, तर अहमद हुसेनसोबत १३७ धावांची महत्त्वपूर्ण भागीदारी करून भारतीय संघाला बॅकफुटवर ढकलले. ४३ व्या षटकापर्यंत पाकिस्तानची स्थिती ३ बाद ३०२ अशी मजबूत होती आणि ते ४०० धावांचा टप्पा ओलांडतील असे वाटत होते.
भारतीय संघ आज मैदानात काहीसा दबावाखाली दिसला. शिस्तीचा अभाव असलेली गोलंदाजी आणि क्षेत्ररक्षणातील चुकांमुळे पाकिस्तानला मोठी धावसंख्या उभारता आली. मात्र, ४० व्या षटकानंतर भारतीय गोलंदाजांनी सामन्यावर थोडे नियंत्रण मिळवले. अवघ्या २५ धावांच्या अंतरात पाकिस्तानने ५ गडी गमावले, ज्यामुळे त्यांची धावसंख्या ८ बाद ३२७ अशी झाली होती. अखेरच्या फळीतील फलंदाजांनी २० धावांची भर घालत निर्धारित ५० षटकात पाकिस्तानला ८ बाद ३४७ पर्यंत पोहोचवले.
आशिया चषकावर नाव कोरण्यासाठी भारताला आता विक्रमी पाठलाग करावा लागणार आहे. हे आव्हान कठीण असले तरी अशक्य नाही. भारतीय संघात आयुष म्हात्रे आणि अवघ्या १४ व्या वर्षी खळबळ उडवून देणारा वैभव सूर्यवंशी यांसारखी तगडी फलंदाजीची फळी आहे. या युवा खेळाडूंना सुरुवातीपासूनच आक्रमक खेळ करावा लागेल.
पाकिस्तान : ३४७/८ (५० षटके)
प्रमुख फलंदाज : समीर मिन्हास (१७२), अहमद हुसेन.
भारतासमोर लक्ष्य : ३४८ धावा.
