IND vs SA ODI : भारताचे द. आफ्रिकेला 297 धावांचे लक्ष्य, सॅमसनचे शतक
पुढारी ऑनलाईन डेस्क : IND vs SA ODI : वनडे मालिकेतील तिसऱ्या सामन्यात भारताने दक्षिण आफ्रिकेला विजयासाठी 297 धावांचे लक्ष्य दिले आहे. पार्ल येथील बोलँड पार्क स्टेडियमवर नाणेफेक गमावल्यानंतर टीम इंडियाने प्रथम फलंदाजी करताना 50 षटकांत 8 गडी गमावून 296 धावा केल्या. संजू सॅमसनने 114 चेंडूत 108 धावांची खेळी केली. त्याने 6 चौकार आणि 3 षटकार मारले. संजूचे हे वनडे कारकिर्दीतील पहिले शतक ठरले.
तिलक वर्माने 52 धावांची खेळी केली. त्याने आपल्या वनडे कारकिर्दीतील पहिले अर्धशतक झळकावले. रिंकू सिंगने 27 चेंडूत 38 धावांची खेळी केली. पहिला एकदिवसीय सामना खेळणाऱ्या रजत पाटीदारने 16 चेंडूत 22 तर कर्णधार केएल राहुलने 35 चेंडूत 21 धावा केल्या. वॉशिंग्टन सुंदर 14 धावा करून बाद झाला तर साई सुदर्शन 10 धावा करून बाद झाला. अक्षर पटेलला एकच धाव करता आली. अर्शदीप सिंग सात आणि आवेश खान एक धाव करून नाबाद राहिले. दक्षिण आफ्रिकेकडून ब्युरेन हेंड्रिक्सने सर्वाधिक तीन बळी घेतले. नांद्रे बर्जरला दोन विकेट मिळाल्या. लिझाद विल्यम्स, विआन मुल्डर आणि केशव महाराज यांना प्रत्येकी एक बळी मिळाला.
भारताची सुरुवात खराब झाली. सलामीवीर रजत पाटीदारने 16 चेंडूत 22 धावा करून पॅव्हेलियनमध्ये परतला. त्यानंतर साई सुदर्शन 16 चेंडूत 10 धावा करून बाद झाला. कर्णधार केएल राहुलही या सामन्यात विशेष काही करू शकला नाही आणि 21 धावा करून बाद झाला. यानंतर तिलक आणि सॅमसनने डावाची धुरा सांभाळली आणि 136 चेंडूत 116 धावांची भागीदारी केली.
सॅमसनचे वनडे कारकिर्दीतील पहिले शतक
या सामन्यात सॅमसन तिसऱ्या क्रमांकावर फलंदाजीला आला. त्याने 110 चेंडूंचा सामना करत आपले शतक पूर्ण केले. त्याच्या बॅटमधून 6 चौकार आणि 3 षटकार आले. त्याचा स्ट्राईक रेट 94.74 होता. हे त्याचे वनडे कारकिर्दीतील पहिले शतक ठरले. त्याने 16 व्या सामन्यात ही कामगिरी केली. एकदिवसीय क्रिकेटमध्ये त्याची सरासरी आता 60 पेक्षा जास्त आहे. या डावात त्याने वनडेत 500 धावाही पूर्ण केल्या.
बोलंड पार्कमध्ये शतक झळकावणारा भारताचा केवळ तिसरा फलंदाज
बोलँड पार्क स्टेडियमवर एकदिवसीय सामन्यांमध्ये शतक झळकावणारा सॅमसन हा केवळ तिसरा भारतीय फलंदाज ठरला आहे. त्याच्या आधी सचिन तेंडुलकर आणि सौरव गांगुली यांनी हा पराक्रम केला होता. या दोघांनी 2001 मध्ये केनिया क्रिकेट संघाविरुद्ध शतक झळकावले होते.
राहुलने केला विक्रम
या सामन्यात भारतीय कर्णधार राहुलने 13 धावा केल्या आणि वर्ष 2023 मध्ये एकदिवसीय सामन्यात यष्टीरक्षक फलंदाज म्हणून 1000 धावा पूर्ण केल्या. ही कामगिरी करणारा तो दुसरा भारतीय यष्टीरक्षक फलंदाज ठरला आहे. यापूर्वी महेंद्रसिंग धोनीने 2008 मध्ये 1,097 आणि 2009 मध्ये 1,198 धावा केल्या होत्या. राहुलच्या आधी शुबमन गिल (1,584), विराट कोहली (1,377) आणि रोहित शर्मा (1,255) यांनी यावर्षी 1000 हून अधिक धावा केल्या आहेत.
सॅमसनने ‘हा’ विक्रमही आपल्या नावावर केला
दक्षिण आफ्रिकेच्या भूमीवर वनडेमध्ये शतक झळकावणारा सॅमसन हा केवळ 8वा भारतीय फलंदाज आहे. त्यांच्या व्यतिरिक्त कोहली (1), शिखर धवन (1), रोहित (1), सचिन (1), गांगुली (1), युसूफ पठाण (1) आणि वुरकेरी रमन (1) यांनी शतके झळकावली आहेत.
तिलकचे वनडे कारकिर्दीतील पहिले अर्धशतक
भारतीय संघाचा युवा फलंदाज टिळकने 52 धावांची खेळी केली. त्याचे वनडे कारकिर्दीतील हे पहिले अर्धशतक होते. त्याने आपल्या डावात 77 चेंडूंचा सामना केला आणि 5 चौकारांसह 1 षटकारही लगावला. त्याचा स्ट्राईक रेट फक्त 67.53 होता. तिलक यांनी भारतीय संघासाठी आतापर्यंत 4 एकदिवसीय सामने खेळले आहेत आणि 4 डावात 22.67 च्या सरासरीने 68 धावा केल्या आहेत.
दक्षिण आफ्रिकेचा संघ
रीझा हेंड्रिक्स, टोनी डी जॉर्जी, रॅसी व्हॅन डर डुसेन, एडन मार्कराम (कर्णधार), हेनरिक क्लासेन (यष्टीरक्षक), डेव्हिड मिलर, विआन मुल्डर, केशव महाराज, नांद्रे बर्गर, लिझाद विल्यम्स, ब्यूरन हेंड्रिक्स.
भारतीय संघ
संजू सॅमसन, साई सुदर्शन, रजत पाटीदार, तिलक वर्मा, केएल राहुल (यष्टीरक्षक/कर्णधार), रिंकू सिंह, वॉशिंग्टन सुंदर, अक्षर पटेल, अर्शदीप सिंग, आवेश खान, मुकेश कुमार.
रजत पाटीदारला पदार्पणाची संधी मिळाली आहे. हा सामना जिंकणारा संघ मालिका खिशात घालेल. सध्या 3 सामन्यांची द्विपक्षीय मालिका 1-1 अशी बरोबरीत आहे. पहिला सामना भारताने 8 गडी राखून जिंकला होता, तर दुसरा सामना यजमान दक्षिण आफ्रिकेने 8 विकेटने जिंकला होता.
भारतीय संघाने या सामन्यात विजय मिळवल्यास आफ्रिकेच्या भूमीवर दुसरी वनडे मालिका जिंकली जाईल. 2018 मध्ये विराट कोहलीच्या नेतृत्वाखाली संघाने तेथे पहिली मालिका जिंकली होती. मात्र, पार्लच्या मैदानावर टीम इंडियाचे रेकॉर्ड खराब आहे. भारतीय संघाने येथे एकूण 5 एकदिवसीय सामने खेळले आहेत. त्यापैकी 2 दक्षिण आफ्रिकेविरुद्ध होते. या दोन्ही सामन्यांमध्ये भारतीय संघाला पराभवाचा सामना करावा लागला आहे. 2003 पासून टीम इंडियाला या मैदानावर विजय मिळवता आलेला नाही. संघाचा शेवटचा विजय नेदरलँडविरुद्ध होता. भारत आणि दक्षिण आफ्रिका यांच्यात आतापर्यंत 15 द्विपक्षीय मालिका झाल्या आहेत. दोन्ही संघांनी 7-7 अशी मालिका जिंकली आहे.