नवी दिल्ली ; वृत्तसंस्था : आयपीएल सुरू होण्यापूर्वी दिल्ली कॅपिटल्सच्या संघाला मोठा धक्का बसू शकतो. कारण, तब्बल सहा कोटी रुपये खर्च करून आपल्या ताफ्यात दाखल केलेला एन्रिच नोर्त्जे हा वेगवान गोलंदाज आयपीएलचे सामने खेळू शकणार नसल्याचे दिसत आहे.
आयपीएलमध्ये यापूर्वीही दिल्लीच्या संघाकडून खेळताना या नोर्त्जेने घवघवीत यश मिळवले होते. त्यामुळेच तब्बल सहा कोटी रुपये मोजत दिल्लीच्या संघाने या खेळाडूला आपल्या ताफ्यात दाखल केले होते. पण, आता हा मॅचविनर खेळाडू आयपीएलमध्ये खेळू शकणार नसल्याचे समोर येत आहे. नोर्त्जेने आतापर्यंत आयपीएलमध्ये दिल्लीकडून खेळताना अचूक आणि भेदक मारा केला होता. गेल्या बर्याच दिवसांपासून नोर्त्जे हा दुखापतग्रस्त आहे.
नोर्त्जेच्या माकडहाडाला दुखापत झाली असून तो यामधून सावरलेला नाही. त्यामुळेच बांगला देशविरुद्धच्या सामन्यांसाठी दक्षिण आफ्रिकेच्या संघात त्याची निवड करण्यात आलेली नाही. आता नोर्त्जे आयपीएलच्या काही सामन्यांमध्ये खेळू शकणार नाही, असे समोर आले आहे. पण, या गंभीर दुखापतीमधून एन्रिच नोर्त्जे अजूनपर्यंत सावरलेला नसल्याने त्याला फिट व्हायला अजून 2-3 महिन्यांचा कालावधी लागू शकतो, असे म्हटले जात आहे.
जर 2-3 महिन्यांमध्ये नोर्त्जे फिट होऊ शकला नाही तर त्याला आयपीएलमधील एकही सामना खेळता येणार नाही. त्यामुळे आता नोर्त्जेच्या जागी दिल्लीच्या संघात कोणत्या खेळाडूची निवड केली जाते, याकडे सर्वांचे लक्ष लागलेले असेल. यासाठी आता बीसीसीआय दक्षिण आफ्रिकेच्या क्रिकेट मंडळाशी चर्चा करत आहे.
नोर्त्जेच्या दुखापतीची नेमकी स्थिती काय आहे आणि तो किती दिवसांमध्ये फिट होऊ शकतो, याचा अंदाच बीसीसीआय घेत असून त्याला आयपीएल पाठवण्यासाठी दक्षिण आफ्रिकेचे क्रिकेट मंडळ कोणती आडकाठी करणार नाही ना, याकडेही त्यांचे लक्ष आहे. नोर्त्जे आणि रबाडा या जोडगोळीने एक काळ चांगलाच गाजवला होता आणि दिल्लीच्या संघाला आयपीएलच्या अंतिम फेरीत पोहोचवण्यासाठी त्यांनी मोलाची भूमिका बजावली होती.
