पुढारी ऑनलाईन डेस्क : India vs Bangladesh T20 Series : बांगलादेशविरुद्धच्या पहिल्या टी-20 सामन्यात भारतीय संघाची प्रत्येक चाल बरोबर ठरली. भारतीय कर्णधार सूर्यकुमार यादवने नाणेफेक जिंकून गोलंदाजी करण्याचा निर्णय घेतला, जो योग्य ठरला. बांगलादेशचा संघ अवघ्या 127 धावांवर गारद झाला. यानंतर भारतीय संघाने या लक्ष्याचा सहज पाठलाग केला. हार्दिक पंड्या, सूर्यकुमार यादव, संजू सॅमसन, वरुण चक्रवर्ती आणि अर्शदीप सिंग यांनी टीम इंडियासाठी अप्रतिम कामगिरी केली. या खेळाडूंमुळेच भारतीय संघ मालिकेत 1-0 अशी आघाडी घेण्यात यशस्वी ठरला.
कर्णधार सूर्याने उदयोन्मुख आयपीएल गोलंदाज मयंक यादव आणि नितीश कुमार रेड्डी यांना पदार्पणाची संधी दिली. यासह भारताकडून टी-20 आंतरराष्ट्रीय सामने खेळणा-या खेळाडूंची संख्या 117 वर पोहचली आहे. याबाबतीत भारताने पाकिस्तानचा विश्वविक्रम मोडला असून पहिल्या स्थानी झेप घेतली आहे. पाकिस्तानकडून टी-20 आंतरराष्ट्रीय क्रिकेटमध्ये आतापर्यंत एकूण 116 खेळाडू खेळले आहेत. ऑस्ट्रेलियाचा संघ तिसऱ्या क्रमांकावर आहे. आतापर्यंत एकूण 111 खेळाडूंनी टी-20 आंतरराष्ट्रीय क्रिकेटमध्ये पदार्पण केले आहे.
टीम इंडिया : 117 खेळाडू
पाकिस्तान : 116 खेळाडू
ऑस्ट्रेलिया : 111 खेळाडू
श्रीलंका : 108 खेळाडू
द. आफ्रिका : 107 खेळाडू
इंग्लंड : 104 खेळाडू
न्यूझीलंड : 103 खेळाडू
22 वर्षीय मयंक यादवने आपल्या पदार्पणाच्या सामन्यातच अप्रतिम कामगिरी केली आहे. त्याने आपल्या टी-20 आंतरराष्ट्रीय कारकिर्दीतील पहिलेच षटक निर्धाव टाकले. यानंतर दुसऱ्या षटकात त्याने विकेट घेतली. भारतीय प्लेईंग इलेव्हनमध्ये 3 वर्षांनंतर पुनरागमन करणाऱ्या वरुण चक्रवर्तीने तीन बळी घेतले. त्याच्याशिवाय अर्शदीप सिंगने 3.5 षटकांत 3 बळी घेतले. या गोलंदाजांसमोर बांगलादेशी फलंदाजांना यश मिळाले नाही आणि संघ पूर्ण 20 षटकेही खेळू शकला नाही.
संजू सॅमसनने संघाला दमदार सुरुवात करून दिली. त्याने 29 धावा केल्या. त्याच्याशिवाय कर्णधार सूर्यकुमार यादवने 14 चेंडूंत 2 चौकार आणि 3 षटकारांसह 29 धावा केल्या. हार्दिक पंड्याने षटकार ठोकत संघाला विजयाकडे नेले. त्याने उत्कृष्ट खेळी खेळली आणि 16 चेंडूत नाबाद 39 धावा केल्या. आपल्या खेळीदरम्यान हार्दिकने 5 चौकार आणि 2 षटकार मारले.
