Vijay Deverakonda Rashmika Mandanna video:
नागरकुर्नूल: दाक्षिणात्य सिनेसृष्टीतील लोकप्रिय जोडी विजय देवरकोंडा आणि रश्मिका मंदाना यांच्या शाही विवाहाची सध्या देशभरात चर्चा आहे. २६ फेब्रुवारी रोजी उदयपूरमध्ये पारंपरिक पद्धतीने विवाहबंधनात अडकल्यानंतर, हे नवदाम्पत्य आता आपल्या आयुष्याच्या नव्या इनिंगची सुरुवात करत आहे. लग्नानंतर विजय रश्मिकासोबत पहिल्यांदाच तेलंगणातील नागरकुर्नूल जिल्ह्यातील आपल्या 'थुम्मनपेट' या मूळ गावी पोहोचला.
विजयचे गावकरी आपल्या लाडक्या अभिनेत्याच्या आणि सुनेच्या स्वागतासाठी आतुर होते. विजयचे वडिलोपार्जित घर फुलांनी आणि रोषणाईने उजळून निघाले होते. ढोल-ताशांच्या गजरात आणि पारंपरिक नृत्यांच्या सादरीकरणात या जोडीचे गावात जंगी स्वागत करण्यात आले.
घरी पोहोचल्यानंतर विजय आणि रश्मिका यांनी सत्यनारायण पूजा केली. दक्षिण भारतात कोणत्याही शुभ कार्याची सुरुवात किंवा गृहप्रवेशानंतर ही पूजा करण्याची प्राचीन परंपरा आहे. यावेळी विजय आणि रश्मिका दोघेही पांढऱ्या आणि लाल रंगाच्या पारंपरिक वेशभूषेत दिसत होते. कुटुंबात सुख-शांती आणि समृद्धी नांदावी, या उद्देशाने हा विधी पूर्ण करण्यात आला.
या आनंदाच्या प्रसंगी संपूर्ण गाव लोटले होते. पूजा संपन्न झाल्यानंतर देवरकोंडा कुटुंबातर्फे गावकऱ्यांसाठी भोजनाचे आयोजन करण्यात आले होते. सुमारे दोन हजार लोकांनी या मेजवानीचा आस्वाद घेतला. आपल्या गावातील लोकांशी आनंद वाटून घेण्याची ही त्यांची कौटुंबिक पद्धत असल्याचे बोलले जाते.
गावी जाण्यापूर्वी या जोडीने हैदराबादमधील मंदिरात जाऊन दर्शन घेतले होते. आता सर्वांचे लक्ष त्यांच्या लग्नाच्या रिसेप्शनकडे लागले आहे. ४ मार्च रोजी हैदराबादमध्ये एका खास कार्यक्रमाचे आयोजन करण्यात आले आहे. हा सोहळा अत्यंत खासगी आणि मर्यादित पाहुण्यांच्या उपस्थितीत होणार असला, तरी भारतीय सिनेसृष्टीतील दिग्गज कलाकार आणि बड्या राजकीय नेत्यांची याला उपस्थिती लाभण्याची शक्यता आहे.
