बेंगळुरू : सुपरस्टार यशचा अत्यंत बहुप्रतीक्षित चित्रपट ‘टॉक्सिक - अ फेअरी टेल फॉर ग्रोन अप्स’ २६ ऑगस्ट रोजी चित्रपटगृहांमध्ये धडकणार आहे. भारतीय चित्रपटसृष्टीमध्ये सर्वसाधारणपणे नवे चित्रपट शुक्रवारी प्रदर्शित करण्याची परंपरा आहे; मात्र गीतू मोहनदास यांच्या दिग्दर्शनाखाली साकारलेला हा भव्य चित्रपट थेट बुधवारी (दि. २६) प्रदर्शित करण्याचा निर्णय घेण्यात आला आहे.
वीकेंडच्या जोरावर पहिल्याच टप्प्यात तगडी कमाई करण्याचा सर्वसाधारण पायंडा असताना, निर्मात्यांनी ‘टॉक्सिक’च्या प्रदर्शनासाठी बुधवारचा मुहूर्त का निवडला, यामागे बॉक्स ऑफिसचे एक अत्यंत काटेकोर व्यावसायिक गणित आखण्यात आले आहे.
‘टाइम्स नाऊ’च्या वृत्तानुसार, हा चित्रपट बुधवारी प्रदर्शित करण्याचा निर्णय ही अत्यंत धोरणात्मक आणि दूरगामी व्यावसायिक खेळी मानली जात आहे. चित्रपटाला चित्रपटगृहांमध्ये कमाईसाठी अधिक मोठा कालावधी (लॉन्ग थिएट्रिकल रनवे) मिळावा, हा यामागचा प्रमुख उद्देश आहे.
वीकेंड सुरू होण्यापूर्वीच दोन दिवस आधी प्रदर्शित झाल्यामुळे चित्रपटाला दोन अतिरिक्त दिवसांचा थेट फायदा मिळणार आहे. म्हणजेच बुधवार आणि गुरुवार या दोन दिवसांत चित्रपट बॉक्स ऑफिसवर आपली मजबूत पकड निर्माण करेल आणि त्यानंतर शुक्रवार, शनिवार व रविवार या सलग तीन दिवसांच्या वीकेंडला कमाईचा वेग कित्येक पटींनी वाढेल.
याशिवाय, पहिल्या दोन दिवसांत जर चित्रपटाला प्रेक्षकांकडून सकारात्मक प्रतिसाद आणि उत्तम ‘माउथ पब्लिसिटी’ मिळाली, तर वीकेंडच्या कमाईत विक्रमी वाढ होण्याची दाट शक्यता आहे. या रणनीतीमागे सणासुदीच्या सुट्ट्यांचे कॅलेंडरही अत्यंत बारकाईने लक्षात घेण्यात आले आहे.
२८ ऑगस्ट रोजी ‘ओणम’ हा मोठा सण येत असून, त्याच दिवसापासून दीर्घ वीकेंडचीही सुरुवात होत आहे. त्यामुळे ऐन ओणम आणि वीकेंडच्या काळात या चित्रपटाभोवती निर्माण झालेली उत्सुकता शिगेला पोहोचलेली असेल, ज्याचा थेट आर्थिक फायदा चित्रपटाला चित्रपटगृहांमध्ये मिळणे निश्चित मानले जात आहे.
दरम्यान, प्रदर्शनापूर्वीच चित्रपटाच्या अॅडव्हान्स बुकिंगने बॉक्स ऑफिसवर ऐतिहासिक विक्रम नोंदवण्यास सुरुवात केली आहे. प्राथमिक माहितीनुसार, पहिल्या दिवसासाठी चित्रपटाची तब्बल ९ लाखांहून अधिक तिकिटे विकली गेली आहेत. ब्लॉक केलेल्या जागा वगळता अॅडव्हान्स बुकिंगमधून झालेल्या कमाईने ३१ कोटी रुपयांचा टप्पा ओलांडला असून, आरक्षित जागांचा समावेश केल्यास हा आकडा ४१ कोटी रुपयांच्याही पुढे गेला आहे. चित्रपटाच्या ट्रेलरने आधीच प्रेक्षकांमध्ये प्रचंड उत्सुकता निर्माण केली आहे.
‘केजीएफ’ मालिकेच्या अफाट यशानंतर प्रेक्षकांना यशचा अॅक्शन अवतार विशेष भावला होता; मात्र ‘टॉक्सिक’मध्ये तो अधिक हिंसक आणि बोल्ड अवतारात प्रेक्षकांच्या भेटीस येत आहे. या चित्रपटाचे भारतातच नव्हे, तर जागतिक स्तरावरही अत्यंत आक्रमकपणे प्रमोशन केले जात असून बॉक्स ऑफिसवर हा चित्रपट कमाईचे नवे उच्चांक प्रस्थापित करेल, असा ठाम विश्वास चित्रपटसृष्टीतून व्यक्त होत आहे.
