The secret behind Alia's success revealed; Pooja Bhatt says: She understands the games of Bollywood perfectly
पुढारी ऑनलाईन :
90 च्या दशकातील प्रसिद्ध अभिनेत्री आणि आलियाची मोठी बहीण पूजा भट्टने आलियाबद्दल काही रंजक खुलासे केले आहेत. पूजा म्हणाली की, बॉलिवूडमध्ये टिकून राहण्यासाठी लागणारे सगळे डावपेच आलियाला चांगलेच अवगत आहेत. इतकंच नाही तर त्यांनी रणबीर-आलियाची मुलगी राहाबद्दलही मोठी भविष्यवाणी केली आहे.
आलिया भट्ट आगामी काळात अल्फा आणि लव्ह अँड वॉर सारख्या मोठ्या चित्रपटांमुळे इंडस्ट्रीच्या टॉपवर कायम राहण्यासाठी सज्ज आहे. गेल्या काही वर्षांत ती सतत बॉलिवूडमधील आघाडीच्या अभिनेत्रींपैकी एक राहिली आहे. मात्र, आलियाच्या एंट्रीच्या काही दशकांपूर्वी तिची बहीण पूजा भट्टदेखील इंडस्ट्रीतील लोकप्रिय अभिनेत्री होती. महेश भट्ट यांची मोठी मुलगी पूजाने दिल है कि मानता नहीं, सड़क, चाहत आणि जख्म सारख्या चित्रपटांतून केवळ बॉक्स ऑफिसवर यश मिळवलं नाही, तर दोन राष्ट्रीय पुरस्कारही जिंकले. आता पूजाने सांगितलं की, ती आलियाला स्वतःचं “अपडेटेड व्हर्जन” का मानते.
‘आलिया खूप चलाख आहे’
विक्की ललवानी यांना दिलेल्या मुलाखतीत पूजा भट्ट म्हणाली की, तिची आलियाशी स्वतःची तुलना वाटत नाही. ती म्हणाली, “आम्ही दोघी खूप वेगळ्या आहोत. माझा एक काळ होता, आता तिचा काळ आहे आणि तिच्या स्वतःच्या खासियत आहेत. इंडस्ट्रीमध्ये स्वतःची जागा निर्माण करण्याची तिची पद्धत वेगळी आहे, जी मला जमत नव्हती. ती खूप चलाख आहे. बॉलिवूडमध्ये टिकण्यासाठी जे खेळ खेळावे लागतात, ते तिला उत्तम प्रकारे खेळता येतात.”
पूजाने आलियाच्या चित्रपट निवडीचं आणि दिग्दर्शक निवडीचंही भरभरून कौतुक केलं. ती पुढे म्हणाली, “एक व्यक्ती म्हणून ती कधी बोलायचं आणि कधी शांत राहायचं हे उत्तम ओळखते. स्वतःबद्दल किती गोष्टी जगासमोर मांडायच्या आणि किती लपवायच्या, हा तिचा वैयक्तिक निर्णय आहे. मी तिला किंवा कुणालाही आयुष्य कसं जगायचं हे सांगू शकत नाही.”
2019 मध्ये धाकटी बहीण शाहीन भट्टच्या पुस्तक प्रकाशन सोहळ्याची आठवण सांगताना पूजा म्हणाली की, “मी तेव्हाही तिला सांगितलं होतं की, तू आयुष्यात जास्त यशस्वी झाली आहेस कारण तुला जगासमोर काय दाखवायचं आणि काय लपवून ठेवायचं हे चांगलं माहीत आहे.”
‘राहा अभिनेत्री होण्यासाठीच जन्माला आली आहे’
पूजा भट्टने असंही म्हटलं की, आलिया आणि रणबीर कपूरची मुलगी राहा पुढे जाऊन अभिनय क्षेत्रात येऊ शकते. ती म्हणाली, “राहा, आलिया, मी… शाहीनबद्दल बोलत नाही कारण ती अभिनयात आली नाही. जसं आपण नवीन फीचर्स असलेला फोन घेतो, तसं प्रत्येक पिढीत अपग्रेड होत जातं. मला वाटतं आलिया माझ्यापेक्षा अपग्रेडेड मॉडेल आहे आणि तिची मुलगी जर अभिनेत्री बनली तर ती तिच्यापेक्षाही अधिक अपडेटेड मॉडेल ठरेल.”
जेव्हा पूजाला विचारण्यात आलं की राहा पुढे अभिनेत्री बनेल का, तेव्हा ती म्हणाली, “ती याच कामासाठी जन्माला आली आहे, फक्त ती नासा सायंटिस्ट झाली नाही तर! त्या मुलीकडे बघा, ती किती गोड आहे आणि हे सगळं तिच्या जीन्समुळे आहे.”
पूजाला राहाला पडद्यावर अभिनय करताना पाहायचं असलं तरी, आलियाने एकदा सांगितलं होतं की तिला तिची मुलगी एक खेळाडू म्हणून पाहायला आवडेल.
राहा पुढे काय बनेल हे काळच ठरवेल. पण सध्या आलिया तिच्या आगामी अल्फा चित्रपटात दमदार अॅथलेटिक परफॉर्मन्स देताना दिसणार आहे. स्पाय-युनिव्हर्समधील या चित्रपटासाठी तिने जबरदस्त अॅक्शन सीन केले आहेत, असं तिचे सहकलाकार बॉबी देओल यांनी नुकतंच सांगितलं. अल्फामधील आलियाचा हा भन्नाट अवतार 10 जुलै रोजी चित्रपट प्रदर्शित झाल्यानंतर थिएटरमध्ये पाहायला मिळणार आहे.
