sunny deol fitness routine age of 69 ramayana actor follows 3 habits for fit body
पुढारी ऑनलाईन : अभिनेता सनी देओल वयाच्या ६९ व्या वर्षीही फिट आणि तरुण दिसतात. त्यांच्या या फिटनेसचे रहस्य म्हणजे त्यांनी वर्षानुवर्षे जपलेल्या काही साध्या सवयी. चला तर जाणून घेऊया सनी पाजींच्या फिटनेस रुटीनविषयी.
अभिनेता सनी देओल वयाच्या ६९ व्या वर्षीही तंदुरुस्त आणि उत्साही दिसतात. त्यांना पाहून त्यांच्या वयाचा अंदाज लावणेही कठीण आहे. ज्या वयात अनेकजण केवळ आराम करण्याला प्राधान्य देतात, त्या वयात सनी देओल चित्रपटांमध्ये सक्रिय आहेत. 'रामायण' चित्रपटात त्यांनी हनुमानाची भूमिका साकारली असून, त्यांच्या अभिनयाचे आणि लूकचेही प्रेक्षकांनी कौतुक केले. हनुमानाच्या भूमिकेसाठी मजबूत आणि दमदार शरीरयष्टी असलेल्या अभिनेत्याची गरज होती. सनी देओल या भूमिकेसाठी अगदी योग्य ठरले.
फिटनेसबाबत सनी देओल यांचे म्हणणे आहे की, शरीर तंदुरुस्त ठेवण्यासाठी फार काही करण्याची गरज नसते. थोडी मेहनत आणि काही चांगल्या सवयी अंगीकारल्या, तरी फिट राहता येते. तुम्हालाही सनी देओल यांच्याप्रमाणे वयाच्या उत्तरार्धात तंदुरुस्त राहायचे असेल, तर त्यांच्या फिटनेस रुटीनमधील या सवयी जाणून घ्या.
स्वतःला आजही समजतात तरुण
सनी देओल यांनी एका मुलाखतीत सांगितले होते की, ते वयाचा फारसा विचार करत नाहीत. आजही ते स्वतःला तरुण अभिनेता समजतात. त्यांच्या मते, जेव्हा तुम्ही स्वतःला म्हातारे समजू लागता, तेव्हा शरीरही त्याच पद्धतीने प्रतिसाद देऊ लागते. मात्र, तुम्ही मनातून स्वतःला फिट आणि आनंदी समजत असाल, तर त्याचा सकारात्मक परिणाम शरीरावरही दिसून येतो. फिट राहण्यासाठी सनी पाजी फार मेहनत घेत नाहीत, तर काही साध्या सवयी नियमितपणे पाळतात.
सकाळी लवकर उठण्याची आणि व्यायामाची सवय
सनी देओल अनेक वर्षांपासून सकाळी लवकर उठण्याची सवय पाळत आहेत. ते साधारण सकाळी ५.३० वाजता उठतात. त्यानंतर आपली दैनंदिन कामे उरकून व्यायाम करतात. ते सकाळी जवळपास दीड तास वर्कआउट करतात. त्यांच्या व्यायामाच्या रुटीनमध्ये कार्डिओ आणि वेट ट्रेनिंगचा समावेश असतो. त्यांचा उद्देश सिक्स पॅक अ‍ॅब्स बनवणे नसून शरीर तंदुरुस्त ठेवणे हा असतो. शरीर फिट ठेवा, बाकी आरोग्याची काळजी आपोआप घेतली जाईल, असे त्यांचे मत आहे.
खाण्यापिण्याबाबत कोणतेही कडक निर्बंध नाहीत
तुम्हाला हे जाणून आश्चर्य वाटेल की, सनी देओल खाण्यापिण्याबाबत फारसे निर्बंध पाळत नाहीत. त्यांना आवडणारे समोसे, छोले-भटुरे आणि तुपासोबतचे पराठेही ते आवडीने खातात. मात्र, त्यांना जंक फूड फारसे आवडत नाही. आजकालचे फास्ट फूड खाण्यापेक्षा साधे आणि घरगुती जेवण त्यांना अधिक पसंत आहे. याच आहारातून ते स्वतःला निरोगी ठेवतात. त्यांच्या आहारात विशेषतः हिरव्या पालेभाज्या आणि सॅलडचा समावेश असतो. तसेच पांढऱ्या साखरेऐवजी गूळ खाणे त्यांना आवडते.
सक्रिय जीवनशैलीही तितकीच महत्त्वाची
सनी देओल यांच्या मते, तुम्ही जितके अधिक सक्रिय राहाल, तितके अधिक फिट राहू शकाल. नियमित व्यायाम आणि योग्य आहार घेतला, तरी दिवसभर अंथरुणावर पडून राहिल्याने शरीर तंदुरुस्त राहणार नाही. त्यासाठी चालणे, धावणे आणि शारीरिक हालचाली करणेही आवश्यक आहे. त्यामुळे सनी पाजींना फिरायला जाणे, घरातील छोटी-मोठी कामे करणे आणि खेळणे आवडते. या सक्रिय जीवनशैलीमुळे ते आजही उत्साही आणि तंदुरुस्त राहतात.