Shiv Thakare wedding
मुंबई: बिग बॉस फेम मराठमोळा शिव ठाकरे लग्नबंधनात अडकला आहे. गेल्या अनेक दिवसांपासून शिवच्या लग्नाच्या चर्चा रंगत होत्या, अखेर आज (दि. १२) शिवने आपल्या इन्स्टाग्राम अकाउंटवर नवरदेवाच्या वेशात एक फोटो शेअर करून चाहत्यांना सुखद धक्का दिला आहे. हा फोटो पाहिल्यानंतर शिवने गुपचूप लग्न उरकल्याची चर्चा रंगली आहे.
शिवने १२ जानेवारी रोजी इन्स्टाग्रामवर एक फोटो पोस्ट केला. या फोटोमध्ये तो पारंपरिक मराठी नवरदेवाच्या पेहरावात दिसत असून सोबत एक तरुणी आहे. विशेष म्हणजे, या फोटोत त्या तरुणीचा चेहरा स्पष्ट दिसत नाही. शिवने या फोटोला "फायनली" असे कॅप्शन देऊन सोबत हार्ट इमोजी पोस्ट केला आहे. यामुळे शिवने अखेर लग्नाची गाठ बांधली की काय, असा प्रश्न विचारला जात आहे. त्याच्या समोर पाठमोरी उभी असलेली मुलगी नक्की कोण आहे? याबाबत त्याने अद्याप कोणताही खुलासा केलेला नाही.
शिवची ही पोस्ट पाहताच चाहत्यांनी आणि कलाकारांनी त्याच्यावर अभिनंदनाचा वर्षाव सुरू केला आहे. सेलिब्रिटींनी देखील या पोस्टवर कमेंट करत त्याचे अभिनंदन केले आहे. "ती मुलगी कोण आहे?", असे प्रश्न त्याचे चाहते विचारत आहेत.
शिवच्या या पोस्टवर मनोरंजन क्षेत्रातील दिग्गज कलाकारांनी अभिनंदनाचा वर्षाव केला आहे. अभिनेत्री भारती सिंगने "हे कधी झाले भावा? तुझे अभिनंदन!" अशी कमेंट केली आहे. तर पूनम पांडे, रिधिमा तिवारी आणि आकांक्षा पुरी यांनीही त्याचे अभिनंदन केले आहे. अभिनेत्री जयंती वाघधारेने "व्हॉट?" अशी कमेंट करत आश्चर्य व्यक्त केले आहे. मित्रांच्या या प्रतिक्रियांमुळे या लग्नाची अधिक चर्चा होत आहे.
