पुढारी ऑनलाईन डेस्क
अभिनेत्री आदिती राव हैदरी आणि अभिनेता सिद्धार्थ (Aditi Rao Hydari-Siddharth) यांनी लग्नगाठ बांधली आहे. एका सुंदर अशा दक्षिण भारतीय विवाह सोहळ्यात दोघे विवाहबद्ध झालेत. या नवदाम्पत्याने त्यांच्या लग्नाचे फोटो सोशल मीडिया प्लॅटफॉर्म इन्स्टाग्रामवर शेअर केले आहेत. दोघांनीही लग्नावेळी भारतीय पारंपारिक पोशाख परिधान केला होता. यावेळी त्यांच्या कुटुंबातील सदस्य आणि जवळची मित्रमंडळी उपस्थिती होती.
एका ऐतिहासिक मंदिरात हा विवाहसोहळा पार पडला. अदितीने लग्नाचे फोटो, "तू माझा सूर्य, माझा चंद्र आणि माझे सर्व तारे आहेस." अशी कॅप्शन देत शेअर केलेत. अदितीने एक आकर्षक टिश्यू ऑर्गेन्झा लेहेंगा मॅचिंग गोल्डन ब्लाउजसह परिधान केला होता. त्यावर सोनेरी जरी वर्क होते. तसेच त्यावर फिचर्ड स्ट्रीप्चेस आणि हँड एम्ब्रॉयडरी केलेली बॉर्डर दिसते. सोन्याचे आणि रुबीच्या पारंपारिक सोन्याचे दागिने, सैल बांधलेल्या वेणीत गजरा असा आदितीचा वधू लूक होता. वर म्हणून सिद्धार्थने एक साधा कुर्ता परिधान केला होता. त्यावर सुरेख अशी एम्ब्रॉयडरी केलेली दिसते. अदिती आणि सिद्धार्थ कॅमेऱ्यासमोर पोझ देत असताना सर्वात आनंदी दिसले.
हे दोघे गेल्या काही वर्षांपासून डेट करत होते. त्यांनी या वर्षाच्या सुरुवातीला त्यांच्या प्रेमाची कबुली दिली होती. त्यांनी आज सोमवारी, १६ सप्टेंबर रोजी गुपचूप लग्न उरकून त्यांच्या चाहत्यांना आश्चर्याचा धक्का दिला. याआधी Vogue ला दिलेल्या मुलाखतीत आदितीने सिद्धार्थने तिला लग्नासाठी प्रपोज केलेल्या क्षणाविषयी सांगितले होते. हे सगळे किती स्वप्नवत वाटत होते, असे तिने म्हटले होते.
२०२१ मध्ये दोघांची पहिल्यांदा तेलगू चित्रपट महा समुद्रमच्या सेटवर भेट झाली होती. सिद्धार्थने तिला पहिल्यांदा "हॅलो, beautiful girl" असे म्हटले होते. तिने त्याच मुलाखतीत पुढे म्हटले होते की त्यांचे बाँडिंग इतके सोपे होते की ते किशोरवयात भेटले असते तरी ते लगेच एकमेकांच्या प्रेमात पडले असते.