पुढारी ऑनलाईन डेस्क : Shah Rukh Khan : बॉलिवूड अभिनेता शाहरुख खान याला रुग्णालयात दाखल करण्यात आले आहे. प्रकृती अस्वस्थेतेमुळे त्याला अहमदाबादमधील केडी हॉस्पीटलमध्ये उपचारासाठी दाखल करण्यात आले. दरम्यान, किंग खानला नेमका कशाचा त्रास झाला, याबाबत देखील डॉक्टरांनी अपडेट दिली आहे.
मुळात मंगळवारी रात्री कोलकाता नाईट रायडर्स विरुद्ध हैदराबाद सनरायजर्सं यांच्यात आयपीएलच्या हंगामातील क्वालिफायर सामना झाला. या सामन्यात शाहरुख खानची मालकी असलेल्या केकेआरने बाजी मारली. त्यानंतर, शाहरुखने स्वत: मैदानात फिरून चाहत्यांना अभिवादन केले. तसेच केकेआरच्या विजयाचा जल्लोष देखील साजरा केला. मात्र, आज बुधवारी शाहरुख खानला उन्हाच्या त्रासामुळे उपचारासाठी दाखल करण्यात आल्याची माहिती देण्यात आली आहे. (Shah Rukh Khan)
शाहरुख खान सध्या त्याच्या केकेआर टीमसह अहमदाबादमध्ये आहे. आयपीएल हंगामातील यंदाचे सामने तो सहकुटुंब एन्जॉय करताना दिसून येतो. अहमदाबादमध्येही उन्हाळ्याचा कडाका जाणवत असून तिथे 40 अंश सेल्सियस एवढे तापमाने आहे. त्यातच शाहरुखला बुधवारी दुपारी अस्वस्थ वाटू लागल्याने अहमदाबादच्या केडी हॉस्पिटलमध्ये दाखल करण्यात आले. सध्या, शाहरुखला डॉक्टरांच्या देखरेखीखाली ठेवण्यात आले असून शाहरुखची प्रकृती उत्तम आहे. केवळ, उष्माघाताचा त्रास जाणवू लागल्याने त्याला रुग्णालयात दाखल केले. (Shah Rukh Khan)
शाहरुखच्या प्रकृतीबद्दलची बातमी सोशल मीडियावर व्हायरल झाली. या बातमीने चाहत्यांना मोठा झटका बसला. त्यामुळे शाहरुखचे चाहते सध्या त्याच्या प्रकृतीसाठी प्रार्थना करताना दिसत आहेत. मात्र शाहरुखची प्रकृती सध्या स्थिर आहे.
आयपीएल 2024 मधील क्वालिफायर 1 सामन्यात कोलकाता नाईट रायडर्सने हैदराबादचा आठ विकेट्सनी धुव्वा उडवून फायनलमध्ये धडक मारली. अहमदाबादच्या नरेंद्र मोदी स्टेडियमवरच्या या सामन्यात कोलकात्याच्या गोलंदाजांनी खरोखरच कमाल केली. त्यांनी हैदराबादचा अख्खा डाव 159 धावांत गुंडाळला.
कोलकात्यासमोर विजयासाठी केवळ 160 धावांचं आव्हान होतं. कोलकात्यानं तब्बल 38 चेंडू आणि आठ विकेट्स राखून विजयी लक्ष्य गाठलं. वेंकटेश अय्यर आणि कर्णधार श्रेयस अय्यरची नाबाद अर्धशतकं कोलकात्याच्या विजयात निर्णायक ठरली. फायनलमध्ये धडक मारल्यानंतर कोलकात्याच्या खेळाडूंनी जोरदार जल्लोष केला. मंगळवारी रात्री कोलकात्याची खेळाडूंनी पार्टी केली. डिस्कोमध्ये खेळाडूंनी जोरदार डान्स केला. याचा व्हिडीओ सोशल मीडियावर व्हायरल झालाय.
