पुढारी ऑनलाईन
भारतीय अभिनेत्री प्रियांका चोप्राने हॉलीवूडमध्ये आता स्वतःची ओळख निर्माण केली आहे. हॉलीवूडच्या विविध चित्रपटांत ती दिसत असते. शिवाय, विविध वेबसीरीजमध्येही ती काम करत आहे. दरम्यान, प्रियांकाशिवाय बॉलीवूडचे इतरही काही कलाकार आता हॉलीवूड चित्रपटांमध्ये दिसणार आहेत, त्यांच्याविषयी…
जबरदस्त अभिनयाने अलीकडच्या काळात सर्वांच्या तोंडी नाव असलेला अभिनेता म्हणजे पंकज त्रिपाठी. आता पंकजही हॉलीवूडपटात दिसणार आहे. यापूर्वी तो 'थॉर' म्हणजेच अभिनेता ख्रिस हेम्सवर्थच्या 'एक्स्ट्रॅक्शन'मध्ये रणदीप हुडासोबत दिसला होता. आता पंकजने हॉलीवूडच्या एका चित्रपटाचे एक शूटिंग शेड्युल नुकतेच पूर्ण केले आहे.
दाक्षिणात्य चित्रपटसृष्टीसह बॉलीवूडमध्ये नाव कमावलेला जबरदस्त अभिनेता धनुषने हॉलीवूडच्या एका बिग बजेट चित्रपटाचे शूटिंग पूर्ण केले आहे. नेटफ्लिक्सने या चित्रपटाची निर्मिती केली असून, या चित्रपटाचे नाव आहे 'द ग्रे मॅन.' 'अ‍ॅव्हेंजर्स एंडगेम'ची दिग्दर्शक जोडी ज्यो रूसो आणि अँथनी रूसो या रूसो बंधूंनी हा चित्रपट दिग्दर्शित केला आहे. या चित्रपटात धनुषसह ख्रिस इव्हान्स आणि रायन गॉसलिंग हे अभिनेतेही आहेत.
सध्या सबा आझाद या नव्या मैत्रिणीमुळे चर्चेत असलेला हृतिकदेखील हॉलीवूडमध्ये दिसू शकतो. नुकतेच हृतिकला अमेरिकेतील गेर्श एजन्सी या टॅलेंट कंपनीने साईन केले आहे. ही एजन्सी सातत्याने हृतिकसाठी विविध स्क्रिप्ट पाठवत आहे. त्यामुळे लवकरच हृतिक हॉलीवूडपटात दिसल्यास आश्‍चर्य वाटायला नको.
'डोंट स्टॉप स्ट्रिमिंग'मधून आंतरराष्ट्रीय पदार्पण केलेला बॉलीवूड अभिनेता सुनील शेट्टी आता लवकरच 'कॉल सेंटर' या चित्रपटातून हॉलीवूडमध्ये पदार्पण करत आहे. सत्य घटनेवर आधारित या चित्रपटात सुनील शेट्टी एका शीख पोलिसाच्या भूमिकेत दिसणार आहे. यापूर्वी 2007 मध्ये हॉलीवूडच्या एका चित्रपटात सुनीलने कॅमियो केला होता.
सिडक्टिव्ह आणि बोल्ड भारतीय अभिनेत्री शोभिता धुलिपाला यापूर्वी 'रमन राघव 2.0', 'बॉडी' यासह विविध चित्रपटांत दिसली आहे. आता शोभिता हॉलीवूडच्या 'मंकी मॅन' या चित्रपटात दिसणार आहे. अभिनेता देव पटेल या चित्रपटाद्वारे दिग्दर्शकीय पदार्पण करत आहे. हा चित्रपट नेटफ्लिक्सवर रीलिज होणार आहे. याच चित्रपटातून अभिनेता अनुपम खेर यांचा मुलगा अभिनेता सिकंदर खेरदेखील हॉलीवूडमध्ये पदार्पण करत आहे.
