पुणे, पुढारी वृत्तसेवा: दिल्लीतील एका टोळीने विमानाने येऊन पुण्यातील हाय प्रोफाईल कॉन्सर्टमधून तब्बल 30 लाख 27 हजाराचे मोबाईल चोरी केले. यामध्ये 21 आयफोनचा समावेश आहे. या टोळीला विमानतळ पोलिसांनी सापळा रचून अटक केली. त्यांच्या टोळीप्रमुखाचा पोलिस शोध घेत आहेत.
असद गुलजार महंमद (32 रा. दिल्ली), निजाम बाबु कुरेशी (35 रा. गाझीयाबाद, उत्तरप्रदेश), शाहबाज भोले खान (26 रा. दिल्ली ), राहुल लीलीधर कंगाले (30 रा. गाझीयाबाद, उत्तरप्रदेश ) आणि नदीम इब्राहिम मलीक (40 रा. दिल्ली ) यांच्याकडून एकुण 28 लाख 40 हजार रुपये किंमतीचे एकुण 39 महागडे मोबाईल फोन जप्त केलेले आहेत. तसेच कार्यक्रमामध्ये 24 फेब्रुवारी रोजी मोबाईल फोन चोरी करणार्या प्रशांत के. कुमार (शिमोगा, राज्य कर्नाटक) याच्याकडून 1 लाख 87 हजार रुपये किंमतीचे एकुण 5 मोबाईल फोन हस्तगत करण्यात आले आहेत.
पोलिसांनी दिलेल्या माहितीनुसार, विमानतळ पोलीस ठाण्याच्या हद्दीत महालक्ष्मी लॉन्स येथे 24 ते 26 फेब्रुवारी दरम्यान व्हिएचवन सुपरसॉनिक कॉन्सर्ट कार्यक्रमाचे आयोजन करण्यात आले होते. यामध्ये मोबाईल चोरी होत असल्याबाबतच्या तक्रारी येत होत्या. त्या अनुषंगाने पोलिसांचे एक पथक कार्यक्रम स्थळी गस्त घालत होते. त्यावेळी सहायक पोलीस निरीक्षक अविनाश शेवाळे यांना असद महंमद हा संशयितरित्या फिरताना दिसला. त्याला पाठलाग करुन पकडण्यात आले. त्याच्याकडे चौकशी केली असता त्याने आम्ही कार्यक्रमामध्ये मोबाईल फोन चोरी करण्यासाठी दिल्लीहून आलो असुन माझे साथीदार हे पुणे स्टेशन येथील मिलन हॉटेलमध्ये उतरल्याचे सांगितले. त्यानुसार त्याच्या चार साथीदारांना हॉटेलमधून ताब्यात घेण्यात आले.
ही कारवाई पोलीस उप आयुक्त शशिकांत बोराटे, सहा आयुक्त किशोर जाधव यांच्या मार्गदर्शनाखाली वरिष्ठ पोलीस निरीक्षक विलास सोंडे, संगीता माळी, उप निरीक्षक रविंद्र ढावरे, समु चौधरी, कर्मचारी सचिन जाधव, अविनाश शेवाळे, सचिन कदम, रुपेश पिसाळ, अंकुश जोगदंडे, नाना कर्चे, योगेश थोपटे, दादासाहेब बर्डे, ज्ञानदेव आवारी, शिवराज चव्हाण यांचे पथकाने केलेली आहे.
