पिंपरी: महापालिकेच्या वायसीएम रुग्णालयात उपचार सुरू असताना वैद्यकीय अधिकाऱ्यांना अरेरावी करणाऱ्यांना रोखण्याचा प्रयत्न केल्याने कर्तव्यावरील पोलिस कर्मचाऱ्यावर जीवघेणा हल्ला करण्यात आला. ही घटना शनिवार (दि. २४) पहाटे घडली. या प्रकरणी चिंचवडमधील बड्या राजकीय नेत्याच्या तीन कार्यकर्त्यांना संत तुकारामनगर पोलिसांनी ताब्यात घेतले आहे.
वैभव सुभाष साळुंखे (३२, रा. आदर्शनगर, सांगवी), कुशाल नैना गोयल (२८, रा. पवनानगर, पिंपळे गुरव) व सोहेल शब्बीर शेख (२७, रा. मोरया पार्क, पिंपळे गुरव) अशी अटक केलेल्या संशयित आरोपींची नावे आहे.
पोलिसांनी दिलेल्या माहितीनुसार हवालदार अमोल शिंदे (३२) आणि हवालदार डगवार हे शनिवार (दि. २४) रात्री ‘वायसीएम’ रुग्णालयात बंदोबस्तासाठी तैनात होते. पहाटे साडे चारच्या सुमारास संशयित आरोपी वैभव साळुंखे, कुशाल गोयल आणि सोहेल शेख हे तिघे त्यांचा मित्र कौस्तुभ गुप्ता याच्या उपचारासाठी वायसीएम रुग्णालयात आले.
चौकीत घुसून गळा आवळला
पोलिसांच्या मदतीसाठी पोलिस हवालदार शिंदे हे रुग्णालयातील पोलिस चौकीमध्ये गेले असता, संशयित वैभव साळुंखे हा त्यांच्या पाठीमागून चौकीत घुसला. तुझ्यात किती दम आहे ते बघतोच, तुला जिवंत सोडत नाही, अशी धमकी देत शिंदे यांचा गळा दाबला. एवढ्यावरच न थांबता संशयित साळुंखे याने हातातील जाड लोखंडी कडे पंजात धरून जीवे मारण्याच्या उद्देशाने शिंदे यांच्या तोंडावर जोरात मारले. या हल्ल्यात शिंदे यांच्या डाव्या डोळ्यावर आणि कपाळावर गंभीर दुखापत झाली आहे. त्याच वेळी इतर दोन आरोपी कुशाल गोयल आणि सोहेल शेख यांनीही शिवीगाळ करत, तू बाहेर भेट, तुला संपवून टाकतो अशी धमकी दिली.
डॉक्टरांना शिवीगाळ अन् पोलिसांवर हल्ला
वैद्यकीय अधिकारी रुग्णावर उपचार करत असताना आरोपींनी त्यांच्या कामात अडथळा निर्माण करत आरडाओरडा सुरू केला आणि डॉक्टरांना अरेरावीची भाषा वापरली. बंदोबस्तावर असलेल्या अमोल शिंदे आणि डगवार यांनी आरोपींना, गोंधळ घालू नका, असे समजावून सांगण्याचा प्रयत्न केला, मात्र या तिघांनी पोलिसांना धक्काबुक्की करत त्यांच्या शर्टची कॉलर पकडून शिवीगाळ केली.
