पिंपरी: घर बांधण्यासाठी आणि नवीन दुचाकी घेण्यासाठी माहेराहून पैसे आणण्यावरून महिलेचा शारीरिक आणि मानसिक छळ करून तिला आत्महत्येसाठी प्रवृत्त केले. याप्रकरणी तिचा पती आणि कुटुंबातील इतर सदस्यांविरोधात गुन्हा दाखल करण्यात आला आहे. छळाची घटना 2020 पासून 28 जुलै 2025 या कालावधीत ज्योतिबा नगर काळेवाडी येथे घडली. विवाहितेने 28 जुलै रोजी घरात आत्महत्या केली.
निर्मला परमेश्वर वाघमारे (30) असे आत्महत्या केलेल्या विवाहितेचे नाव आहे. या प्रकरणात प्रकाश दादाराव वाघमारे (33, रा. तळवडे, पुणे) यांनी काळेवाडी पोलिसांत फिर्याद दिली आहे. त्यानुसार, पती परमेश्वर श्रावण वाघमारे (40) सासू गवळणबाई श्रावण वाघमारे, दीर कमलाकर श्रावण वाघमारे, नणंद रमाबाई लेंडेगावकर (सर्व रा. जगळपूर, लातूर) यांच्याविरोधात गुन्हा दाखल करण्यात आला आहे. (Latest Pimpri News)
फिर्यादीची मयत बहीण निर्मला हिचा आरोपी परमेश्वर याच्या सोबत विवाह झाला. त्यानंतर तीन वर्षांनंतर आरोपींनी घर बांधण्यासाठी, दुचाकी गाडी घेण्यासाठी माहेरहून पैसे आणण्याबाबत तिला वेळोवेळी सांगितले. तिचा शारीरिक व मानसिक छळ केला. बहीण कामाला जाऊ लागल्याने तिच्या चारित्र्यावर संशय घेऊन तिला वेळोवेळी शिवीगाळ करून हाताने मारहाण केली. आरोपींनी तिला आत्महत्या करण्यास प्रवृत्त केल्याने तिने राहते घरी साडीने गळफास घेऊन आत्महत्या केली.
